Read Dikateny Iombonana Eto Madagasikara Bena-Siràka 4 Bible Online

Bena-Siràka 4 - Dikateny Iombonana Eto Madagasikara bible

Bena-Siràka 4

¹Anaka, aza lavinao ny fiveloman’ny mahantra ary aza mampipitrapitra maso ny tsy manana ianao[36];

²aza mampahory aina ny noana ianao, ary aza mampangirifiry ny olona fadiranovana.

³Aza vao mainka mampisafoaka ny fo mangirifiry ianao, ary aza mangataka andro rehefa hanome ho an’ny sahirana

⁴Aza atositosikao ny mpangataka ory, ary aza iambohoan-tava ny mahantra.

⁵Aza iambohoanao fijery ny tsy manana, ary aza avela hisy antony hanozonany anao;

⁶fa raha manozona anao amin’alahelom-po izy, dia hohenoin’ilay Mpahary azy ny fivavahany.

⁷Ataovy mahafinaritra eo anivom-bahoaka ny toetranao, ary aoka ianao hiondrika eo anoloan’ny lehibe!

⁸Manongilàna sofina hihaino ny mahantra ianao; ary amin-kamorampo no amalio azy tenim-pihavanana.

⁹Afaho tsy ho voatanan’ny mpampahory azy ny ampahorîna; ary aza resin-kenamaso ianao rehefa mitsara.

¹⁰Aoka ho toy ny ray amin’ny kamboty ianao, ary ho toy ny vady manohana ny renin’ireo; dia ho toy ny zanak’ilay Avo Indrindra ianao ary hotiaviny mihoatra ny fitiavan-dreninao anao. Fomba fanabeazan’ny Fahendrena

¹¹Manandratra an’ireo zanany ny Fahendrena ary miahy an’izay mikatsaka azy[37].

¹²Izay tia Fahendrena, tia fiainana; ary izay mifoha maraina hitady azy, ho heni-kafaliana.

¹³Izay mitazona ny Fahendrena dia ny voninahitra no anjarany; ka ny toerana izay handehanany dia homban’ny Tompo fitahiana[38].

¹⁴Izay manompo ny Fahendrena dia mivavaka amin’ilay Masina; ary tia izay tia fahendrena ny Tompo.

¹⁵Izay mihaino ny Fahendrena, hitsara ara-drariny; ary izay mifikitra aminy, hiorim-ponenana feizay.

¹⁶Izay matoky azy no hanana azy ho anjarany; ary ny taranany dia mbola hitazona izany.

¹⁷Eo am-boalohany manko ny Fahendrena dia hiaraka aminy hitety lalan-tsarotra; avy eo izy hampiavy tahotra sy horohoro aminy ary hampijaly azy amin’ny fifehezany mandra-pahatongany azy ho mahatoky, ka amin’ny didiny no hisedrany azy;

¹⁸rehefa izany, dia hiverina mivantana aminy indray Izy ka hampifaly azy sy hamboraka aminy ny zava-miafiny.

¹⁹Raha mania kosa ilay olona, dia hilaozan’ny Fahendrena ary havelany ho eo am-pelatanan’ny fahaverezana. Henatra tena izy sy henamaso fotsiny

²⁰Tandrovy izay mety, ary fadio ny ratsy; ary aza menatra ny amin’izany toetranao izany[39].

²¹Misy manko henatra mitarika amin’ny fahotana, ary misy henatra ho voninahitra amam-pahasoavana[40].

²²Aza mihenjana loatra amin’ny tenanao kanefa aza asiana henatra mahatonga ho solafaka.

²³Aza mihenahena amin’ny fotoana tokony hitenenana[41],

²⁴satria amin’ny fiteninao no hahalalana ny fahendrenao, ary amin’ny fivolananao no isehoan’ny fahaizanao.

²⁵Aza manohitohitra ny marina; noho ianao tsy ampy fahalalana no aoka hampangasihasy anao!

²⁶Aza menatra ny hiaiky heloka ianao, ary aza mihambo hanoha ny alehan’ny ony.

²⁷Aza mety manaiky olona adala, ary aza resin-kenamason’izay manampahefana.

²⁸Miadia hiaro ny marina mandra-pahafatinao, dia hiady hiaro anao ny Tompo Andriamanitra.

²⁹Aoka ianao tsy ho sahisahy miteny, kanefa kamo sy mitaredretra manao!

³⁰Aoka tsy ho toy ny liona ianao eo amin’ny ankohonanao, kanefa olona kanosa eo amin’ny mpanomponao!

³¹Aoka ny tananao tsy hivelatra raha handray kanefa hikombona kosa rehefa hamerina[42].