Read Dikateny Iombonana Eto Madagasikara Bena-Siràka 43 Bible Online

Bena-Siràka 43 - Dikateny Iombonana Eto Madagasikara bible

Bena-Siràka 43

¹Ny habakabaka sy ny masoandro Endrey ny habakabaka, erỳ ambony, fa madio mangatsakatsaka tokoa[382]; endrey ny endriky ny lanitra, rehefa tazana mamirapiratra!

²Ny masoandro miseho amin’ny fiposahany dia manambara fa tena zava-mahagaga ny asa ataon’ilay Avo Indrindra.

³Ny masoandro, rehefa mitataovovonana, dia mahakarankaina ny tany; ka iza no hahatanty ny hafanàny?

⁴Arehitra hivaivay ny afon’ny lafaoro ho an’ny asa mitaky hafanàna; fa intelo henin’izany ny hafanàn’ny masoandro izay mampidonaka ny tendrombohitra. Mifofofofo mamoaka eton’afo ny masoandro ary mandefa tara-pahazavana izay mampanjambena ny maso.

⁵Lehibe ny Tompo Izay nanao ny masoandro; ary araka ny didiny no anohizany ny fihazakazahana tontosainy[383]. Ny volana

⁶Ny volana koa dia manaraka lalandava ny ora voatendry hiposahany ho fanondroana ny fotoanandro ary ho famantarana ny faharetany.

⁷Ny volana no famantarana ny andro fety, fony izy mihena hazavana, aorian’ny fenomanana[384].

⁸Avy aminy no mahazo anarana ny volana fitsinjaran-taona; ary mampitolagaga ny fitombony ao anatin’ny fiovaovàny samy hafa. Izy no fanala manilo ny kintana izay tafika mitoby eny ambony eny; izy no fanala mamirapiratra eo amin’ny habakabaky ny lanitra. Ny kintana sy ny planeta

⁹Ny kintana sy ny planeta manjopiaka no mampisy endrika ny habakabaka: izany no ravaka mamirapiratra eny amin’ny toerana ambony dia ambony eny.

¹⁰Araka ny didin’ilay Masina no aharetany eo amin’ny sehatra izay voatendry hisy azy avy; ary tsy mba misy mihalangalana ireny eo amin’ny fiambenana sahaniny. Ny zava-mahatalanjona eo amin’ny voaary

¹¹Jereo ny avana, ka isaory Ilay nanao azy; fa tsara tarehy fatratra ny avana amin’ny fahazavàny mangarangarana.

¹²Faribolana mamiratra no soritany eny amin’ny habakabaka eny; ny tanan’ilay Avo Indrindra mihitsy no efa nanenjana azy toy izany.

¹³Noho ny baiko ataon’ny Tompo ihany no irotsahan’ny vongan-dranomandry sy mahadodom-piavy ny hela-baratra izay mpanatanteraka ny fitsarany.

¹⁴Izany no isokafan’ny firaketany ka ivoahan’ny rahona miala tao sy anidinkidinany toy ny vorona.

¹⁵Ny fahefàn’Andriamanitra no mampivongana ny rahona ary mampisilasilaka azy hanjary havandra vaventy.

¹⁷Mampihorohoro ny tany ny fidoboky ny kotrokorany; ary rehefa miseho Izy, dia mihozona ny tendrombohitra[385]. Araka ny sitrapony no itsofan’ny rivotra avy any atsimo na ny tafioka avy any avaratra sy ny tadio mitambolina. Andriamanitra no mandrotsaka ny oram-panala toy ny vorona midaboka amin’ny tany; ary toy ny andiam-balala hipetraka no filatsahan’izany oram-panala izany[386].

¹⁸Fotsy mangatsakatsaka izy ka mampitolagaga ny maso, ary mivatravatra fiavy ka tena mahavariana ny fo.

¹⁹Afafin’Andriamanitra koa ny fanala ho tahaka ny sira miely amin’ny tany; dia hamafisin’ny hatsiaka ireny ho tahaka ny tendron-tsilo maranidranitra[387].

²⁰Rehefa injay manomboka mifofofofo kosa ny rivotra mangatsiaka avy any avaratra, dia misy ranomandry mivaingana eny ambonin’ny velaran-drano; ny ranovory isan-karazany no iantefan’izany rivotra izany, ka mova tsy akanjo vy fiarovan-tena no fitafiana andrakofany azy.

²¹Mandoro ny tendrombohitra kosa ny rivo-mafana ary mandazolazo ny eny an-tsaha eny, ka toy ny afo mandevona ny zava-maitso.

²²Kanefa ireny zavatra simba ireny dia ny rahona vonton-drano no fanafodiny; ary ny ando tonga no mitondra fiononana aorian’ny hafanàna migaingaina.

²³Araka ny fandaharan’Andriamanitra dia nampitoniany ny ranomasimbe ka nisy nosy novoleny teo anivony[388].

²⁴Tantarain’ireo mandeha an-tsambo eny ambonin’ny ranomasina eny ny loza mety mitranga ao aminy, ka talanjona dia talanjona isika mandre ny famisavisàny azy[389],

²⁵sady ao koa no misy ny zava-boaary hafahafa endrika sy mampitolagaga, dia ny karazan-java-mananaina maro sy ny trozona rehetra anaty ranomasina[390].

²⁶Tantanan’Andriamanitra ny zava-drehetra hizotra tsara mankany amin’izay hiafarany; noho ny teniny no aharetany miara-mirindra[391].

²⁷Afaka milaza betsaka toy izany izahay, nefa tsy hahatapitra ny tokony hambara; ka dia izao no farateny ataonay: Andriamanitra no fototry ny zavatra rehetra.

²⁸Tsy manan-kery velively izahay hanomezam-boninahitra Azy, satria Izy no Ilay Andriamanitra Lehibe, ambony noho ny asany rehetra.

²⁹Mahatahotra ny Tompo sady lehibe tsisy fetra; ary mampitolagaga tokoa ny fahefàny.

³⁰Raha manome voninahitra ny Tompo ianareo, dia manandrata Azy araka izay azonareo atao, kanefa mbola ho tafahoatra noho izany ihany Izy; ary raha manandratra Azy ianareo, dia mahereza hatrany ka aza mitsahatra satria tsy hahatapitra ny tokony hambara.

³¹Iza moa no efa nahita an’Andriamanitra ka afaka hanambara ny momba Azy? Iza no mahay mankalaza Azy araka izay tena tokony ho sahaza Azy[392]?

³²Vitsivitsy amin’ny asany ihany no hitantsika, fa mbola betsaka ny zava-miafina amintsika ary lehibe kokoa noho ireo voatanisa ireo aza[393].

³³Eny, ny Tompo no nanao ny zavatra rehetra; ary ny olona tia vavaka no efa nomeny fahendrena.