Read Dikateny Iombonana Eto Madagasikara Bena-Siràka 50 Bible Online

Bena-Siràka 50 - Dikateny Iombonana Eto Madagasikara bible

Bena-Siràka 50

¹I Simôna mpisorombe I Simôna, zanakalahin’i Ônià[480], no mpisorombe nanamboatra ny tranon’Andriamanitra fahavelony ary nanamafy ny tempoly tamin’ny androny.

²Izy no nandatsaka ny fototr’ilay rindrina izay avo roa heny mba hanjary fanorenana ho an’ny fefy manodidina ny tempoly.

³Tamin’ny androny koa no nanaovana ny famorian-drano, dia dobo anankiray izay mitovy refy vava amin’ilay dobo lehibe famorian-drano[481] tao an-tempoly.

⁴Nokarakarainy ny vahoakany tsy hiharan’ny faharavana ary nohamafisiny ny tanàna mba hahatoha fahirano.

⁵Akory ity voninahitra lehibe nananan’i Simôna, rehefa nivoaka ilay Toeramasina voaefitra lamba izy sy nitanjozotra mandeha manodidina ny tempoly.

⁶Toy ny kintana fitarikandro eo afovoan-drahona izy na ny volana fenomanana amin’ny andro Paska;

⁷toy ny masoandro manjelanjelatra manazava ny tempolin’ilay Avo Indrindra, na toy ny avana mangirangirana eo anivon-drahona mamirapiratra.

⁸Tsara endrika toy ny vonindraozy lohataona izy, na toy ny felana lisy eo amoron-drenirano na ny zava-maitson’i Libano amin’ny fahavaratra;

⁹mendri-kaja izy, toy ny vovo-javamanitra izay mirehitra eo amin’ny alitara fandorana azy, na toy ny fanaka volamena voaravaka vatosoa isan-karazany.

¹⁰Toy ny hazo ôliva efa mamokatra voa i Simôna na toy ny hazo kipresy mijoalajoala manaka-drahona.

¹¹Rehefa nanao ny akanjo rebareban’ny mpisorombe izy ka nitafy ny fanamiany marevaka rehetra ary niakatra teo amin’ny alitara masina, dia nampihanaka famirapiratana eran’ny faritra manodidina ny Toeramasina.

¹²Nitsangana teo akaikin’ny fatan’ny alitara izy no nandray avy teo an-tanan’ireo mpisorona ny zavatra voarasa mba hatao sorona; ireto mpisorona namany kosa nanao faribolana miendrika satroboninahitra manodidina azy tahaka ny zana-kazo sedera any Libano ary nanemitra azy toy ny vondron’antrendry.

¹³Ireo mpisorona, taranak’i Aharôna, dia teo avokoa samy voatafy fanamiana marevaka ary nitana ny fanatitra ho an’ny Tompo teo anatrehan’ny fiangonan’i Israely manontolo.

¹⁴Tamin’izay i Simôna no nanatontosa ny fanompoana teo amin’ny alitara, ka nandahatra tsara ny fanatitra ho an’ilay Avo Indrindra sady Mpifehy ny tontolo;

¹⁵dia nanatsotra tanana handray ny tsatokaty izy ary nandraraka ny divay izay ram-boaloboka, sy nampihanaka azy teo am-pototry ny alitara mba ho hanitra mamerovero ho an’ny Avo Indrindra, dia ilay Mpanjakan’izao tontolo izao[482].

¹⁶Amin’izany ireo mpisorona, taranak’i Aharôna, dia nihoby sy nitsoka trompetra volafotsy ary nanao horaka mitalakotrokotroka mba ho fanankinana ny vahoaka amin’ny fahatsiarovan’ilay Avo Indrindra[483].

¹⁷Ny vahoaka rehetra kosa tamin’izay dia indray nientana nihohoka tamin’ny tany mba hitsaoka ny Tompon’izy ireo, dia ilay Andriamanitra Mahefa sy Avo Indrindra.

¹⁸Avy eo dia ny mpihira no nanampatra feo nidera Azy ka hira mahafinaritra no indray nireondreona mafy.

¹⁹Ary nitaraina tamin’ny Tompo Avo Indrindra ny vahoaka izay naharitra nivavaka teo anatrehan’ilay Mpamindrafo, mandra-pahatapitry ny fomba fanajana ny Tompo ka vitan’ny mpisorona avokoa ny fanompoam-pivavahana.

²⁰Dia nidina niala ny alitara tamin’izay i Simôna mpisorombe ary nanandra-tanana tambonin’ny Israelita rehetra tafangona ka niloa-bava nanome azy ny tsodrano avy amin’ny Tompo. Izany no nananany voninahitra hanonona ny anaran’ny Tompo[484].

²¹Dia niankohoka fanindroany ny vahoaka tafangona mba handray ny tsodrano avy amin’ilay Avo Indrindra. Vavaka fankalazana ny Tompo

²²Ankehitriny àry dia misaora ilay Andriamanitr’izao rehetra izao, mpanao zava-dehibe hatraiza hatraiza, satria Izy no mampitombo antsika hatrany am-bohòka sady mitondra antsika araka ny famindrampony.

²³Enga anie hanome hafaliam-po antsika Izy ary hampisy fiadanana amin’izao androntsika izao toraka ny tamin’ny fahagola teo amin’i Israely!

²⁴Ho azo antoka ho antsika hatrany anie ny famindrampony ka hanavotra antsika mandritra ny androm-piainantsika[485]! Firenena telo ankahalaina

²⁵Misy firenena roa ankahalain’ny foko ary ny fahatelony aza tsy firenena akory:

²⁶dia ireo mponina any an-tendrombohitra Sehîra sy ny Filistinina ary ilay vahoaka adala izay miorim-ponenana ao Sekema[486]. Ny mpanoratra sy ny bokiny

²⁷I Jesoa, Bena-Siràka sy zafin’i Elehazara avy ao Jerosalema, no nanoratra fampianarana mirakitra fahiratan-tsaina sy fahaizana ato amin’ity boky ity. Ao no natosany tahaka ny ranonorana ny fahendrena nameno ny fony.

²⁸Sambatra izay mahavatra mamaky ireo anatra ireo; ho tonga hendry izay mandray azy ao am-pony.

²⁹Raha mampihatra ireny izy, dia hahery amin’ny zava-drehetra satria ny fahazavàn’ny Tompo no andehanany[487].