Read Dikateny Iombonana Eto Madagasikara Bena-Siràka 51 Bible Online

Bena-Siràka 51 - Dikateny Iombonana Eto Madagasikara bible

Bena-Siràka 51

¹FANAMPINY Vavak’i Jesoa Bena-Siràka Te hankalaza Anao aho, ry Tompo Mpanjaka ô, ary te hidera Anao aho, ry Andriamanitra Mpamonjy ahy; eny, Ianao mihitsy no ankalazaiko

²satria mpiaro ahy sy mpanampy ahy Ianao[488], sady nanafaka ny tenako tamin’ny faharavana sy tamin’ny fandrik’ireo mpanendrikendrika mbamin’ireo olona mpamoron-dainga. Teo anatrehan’ireo mpandrafy ahy

³dia nanampy ahy sy nanafaka ahy Ianao. Ny haben’ny indrafo aman-dazanao no nasehonao fony Ianao nanafaka ahy tamin’ny vangin’ireo vonon-kandrapaka ahy sy tamin’ny tanan’ireo nitady hamono ahy ho faty ary tamin’ny fahoriana rehetra nihatra tamiko.

⁴Nafahanao aho tsy ho sempotry ny arina mivaivay nanodidina ahy ary tsy ho main’ny afo izay tsy narehitro akory.

⁵Notsoahanao tamin’ny hantsan-dalin’ny toeran’ny maty aho, dia tamin’ny resaka maloto sy teny mandainga

⁶ary tamin’ny zana-tsipîka avoaky ny mpanao vava ratsy. Efa teo ambavahaonan’ny fahafatesana aho ary efa nikasika ny toeran’ny maty ny aiko[489];

⁷nanodidina ahy hatraiza hatraiza ny fahavaloko sady tsy nisy olona hanampy ahy; niandrandra vonjy avy amin’ny olombelona aho, kanefa tsy nisy velively akory.

⁸Izay aho, Tompo ô, vao nahatsiaro ny indrafonao sy ny fanasoavanao hatrizay hatrizay; tsaroako fa afahanao ireo fatra-piandry Anao ary vonjenao tsy ho azon’ny fahavalo[490].

⁹Koa hatreto an-tany aho no nanandra-bavaka sy nitalaho taminao hanafaka ahy tsy ho faty.

¹⁰Niantso Anao aho hoe: «Tompo ô, Raiko Ianao, aza ilaozanao aho amin’ny androm-pahoriako, dia amin’ny andro anjakan’ny mpiavonavona ka tsy ahitako fanampiana velively[491].

¹¹Tsy hitsahatra ny hidera Anao aho ary hihira Anao amin’ny hiram-pisaorana.» Dia nohenoinao tokoa ny fivavahako,

¹²fa novonjenao tsy hiharan’ny faharavana aho ary nafahanao tamin’ny andron-doza nanjo ahy. Koa izany no hisaorako Anao sy hiderako Anao ary hankalazako ny anaranao, Tompo ô. Nokarohiko fatratra ny fahendrena

¹³Fony aho mbola tanora, alohan’ny hivezivezeko, dia nitady an-karihary ny fahendrena aho tamin’ny fivavahana nataoko.

¹⁴Teo anoloan’ny Toeramasina no nangatahako izany; ary hatramin’ny farafofonaiko no hitadiavako azy.

¹⁵Rehefa namony tao amiko ny fahendrena, dia mova tsy sampahom-boaloboka mihamatoy, ka nanjary fifalian’ny foko izany; dia lala-mahitsy no nizoran’ny diako, ary nanjohy soritra ny fahendrena aho nanomboka tamin’ny fahatanorako.

¹⁶Nanongilan-tsofina kelikely fotsiny aho hihaino azy, dia efa nandray ny fahendrena sahady ka nahazo fampianarana betsaka ho ahy.

¹⁷Fandrosoana no vokatr’izany teo amiko, ka sitrako ny manome voninahitra an’Ilay nanolotra ahy ny fahendrena.

¹⁸Eny, tapa-kevitra ny hampihatra azy aho; fatra-pitady ny soa aho ka tsy diso fanantenana.

¹⁹Niezaka mafy hitana ny fahendrena aho ary nitandrina tsara hanoa ny lalànan’Andriamanitra. Nanandra-tanana any ambony aho mba hivavaka; ka niekeko ny fanaovako tsirambina ny fahendrena.

²⁰Notarihiko hifantoka aminy ny fanahiko; ary nadio toetra aho ka nahita azy. Hatrany am-boalohany no nahazoako fahalalana taminy, ka izany no tsy hamoizany ahy na oviana na oviana.

²¹Nientam-po hikatsaka azy aho ka nahazo zava-tsoa sarobidy[492].

²²Dia nomen’ny Tompo fahaiza-miteny ho valisoa aho ka ampiasaiko hiderana Azy izany.

²³Manatòna ahy ianareo, ry olona tsy manam-pahalalana, aoka hiorim-ponenana atỳ an-trano fianaram-pahendrena[493].

²⁴Nahoana no milaza ho tsy manana ny hareny ianareo, kanefa mangetaheta fatratra izany ny fanahinareo?

²⁵Miloa-bava aho ka miteny hoe: «Raiso maimaim-poana ny fahendrena[494].

²⁶Aondreho eo ambany ziogany ny vozonareo ary aoka ny fanahinareo handre ny fampianarany[495], fa akaiky dia akaiky anareo izy ka mora hita.

²⁷Aoka hahita maso ianareo fa tsy nikely aina firy aho, dia efa nahazo fitsaharana lehibe ho an’ny tenako.

²⁸Milatsaha hihaino ny fampianarako izay sarobidy toy ny volafotsy betsaka; fa vokatr’izany kosa dia mova tsy volamena betsaka no tombontsoa ho azonareo[496].»

²⁹Mifalia amin’ny indrafon’ny Tompo ianareo, ary aza menatra amin’ny fiderana Azy.

³⁰Tanteraho ny asanareo alohan’ny fotoana hiaviany, dia homeny valisoa ianareo amin’ny fotoanandrony[497].