Read Dikateny Iombonana Eto Madagasikara Bena-Siràka 6 Bible Online

Bena-Siràka 6 - Dikateny Iombonana Eto Madagasikara bible

Bena-Siràka 6

¹Aza mivadika ho fahavalon’ilay sakaizanao taloha, fa ny laza ratsy no mahamenatra sy mahafa-baràka: izany no ho anjaran’ny mpanota miroa lela.

²Aza manandra-tena amin’ny fikasanao fandrao ny herinao ho montsamontsana tahaka ny ombalahy voarasarasa[49].

³Ho toy ny hazo lany ravina sy foana voankazo ianao, hany ka hazo maina sisa no hamelanao ny tenanao.

⁴Ny fanirian-dratsy dia mahavery izay manana azy ka mahatonga azy ho fihomehezan’ny fahavalony. Ny fisakaizana

⁵Ny teny mamy no mahabetsaka ny sakaiza, ary ny fomba fiteny malemy paika no mampitombo ny fifandraisana tsara[50].

⁶Aoka ho maro izay olona mifampiarahaba aminao, nefa aoka iray monja amin’arivo no ho mpanolotsainao[51]!

⁷Raha te hahazo sakaiza ianao, fisedrana azy no aoka hahazoanao azy fa aza mba malaky matoky azy!

⁸Misy manko sakaiza manao an’androny, fa tsy ho eo intsony izy amin’ny andro mahory anao;

⁹misy koa sakaiza mivadika ho fahavalo, ka hanambara ny adinareo hahamenatra anao;

¹⁰ary misy sakaiza hiara-misakafo aminao, fa tsy ho eo intsony izy amin’ny andro mahory anao.

¹¹Rehefa ambinina ianao, dia hiahy volo aminao izy ka ho sahy hanome baiko an’ireo mpanomponao;

¹²raha avy kosa izay hietrenao, dia hanohitra anao izy ary lasa hiery tsy ho hitanao intsony[52].

¹³Aoka ianao hisaraka amin’ny fahavalonao, ary hitandrina ny amin’izay mihambo ho sakaizanao.

¹⁴Ny sakaiza mahatoky dia fiarovana azo antoka ka nahita raki-tsoa izay nahita azy;

¹⁵tsy misy soa azo atakalo ny sakaiza mahatoky, tsy hay tombanana ny maha sarobidiny azy.

¹⁶Ody aina ny sakaiza mahatoky; izay manaja ny Tompo no hahita azy.

¹⁷Izay manaja ny Tompo no mampahitsy fisakaizana satria izay toetrany no hotahafin’ilay namany. Fahazoam-pahendrena

¹⁸Anaka, raha vao manomboka ny hatanoranao, dia meteza hanovo fanabeazana ianao; ary hahazoanao ny fahendrena izany mandra-pahatongan’ny fahanteranao.

¹⁹Aoka hanatona ny fahendrena ianao, ka toy ny mpiasa tany na ny mpamafy no iandraso ny voka-tsoa avy aminy: hisahirananao ihany manko ny mamboly azy, fa vetivety ianao dia hihinana ny vokany[53].

²⁰Sarotra tokoa ny mahazo fahendrena ho an’izay tsy manam-panabeazana; ka tsy haharitra mifikitra aminy raha ny olona tsy ampy fisainana:

²¹toy ny vato ngeza ny fahendrena ho azy, ka hobatainy hitsapany herin-tena, nefa tsy ho ela akory dia hakifiny.

²²Araka ny anarany tokoa ny fahendrena, ka olom-bitsy ihany no isehoany[54].

²³Anaka, mba henoy aho ka raiso ny hevitro ary aza lavinao ny tolotsaina omeko.

²⁴Ao amin’ny parapaingon’ny fahendrena no aoka hampidiranao ny tongotrao ary ao amin’ny gadrany ny vozonao[55]!

²⁵Aondreho ny sorokao hibaby ny fahendrena ary aza sosotra ianao amin’ny fatorany;

²⁶Aoka ho amin’ny fonao manontolo no hankanesanao eo aminy, ary aoka ho amin’ny herinao manontolo no hanarahanao ny sori-dalany!

²⁷Ataovy tsongo dia izy ary katsaho, fa hiseho aminao ka ho fantatrao; ary rehefa voatazonao izy, dia aza avela ho votsotra.

²⁸Fiadanana vokatry ny fahendrena no ho hitanao amin’ny farany, ka hanjary fifaliana ho anao izy.

²⁹Ny parapaingony ho fiarova-mahery ho anao, ary ny gadrany ho fitafiam-boninahitra.

³⁰Eny, toa firavaka volamena ny ziogany ary toa dantelina volomparasy ny fatorany.

³¹Hiakanjonao toa fitafiam-boninahitra izy ary hisotrohanao ho fehiloham-piravoana.

³²Anaka, raha tianao, dia hobeazina ianao; ary raha miezaka ianao, dia hahay.

³³Raha mazoto mihaino ianao, dia hahazo fianarana; ary raha manongilan-tsofina, dia ho tonga hendry.

³⁴Mitoera eo amin’ny fivorian’ny anti-panahy; ny olon-kendry no aoka hiraiketanao fo!

³⁵Aoka ho satrinao hohenoina ny teny rehetra momba an’Andriamanitra, ary aoka tsy hidify aminao ny ohabolana mampisaintsaina[56]!

³⁶Raha mahita olona mahira-tsaina ianao, vao maraina dia tongava eo akaikiny; ary ataovy masaky ny tongotrao ny ambaratonga mankeo am-baravarany.

³⁷Eritrereto ny baikon’ny Tompo, ary saino mandrakariva ny didiny; fa izy mihitsy no hankahery ny fonao, ary ny fahendrena irînao dia homeny anao[57].