Read Dikateny Iombonana Eto Madagasikara Bena-Siràka 7 Bible Online

Bena-Siràka 7 - Dikateny Iombonana Eto Madagasikara bible

Bena-Siràka 7

¹Torohevitra samihafa Aza manao ratsy, dia tsy hiharan’ny ratsy ianao.

²Halaviro ny tsy an-drariny, dia hihataka anao izany.

³Anaka, aoka ianao tsy hamafy amina toerana izay voasoritsoritry ny tsy rariny, raha tsy te hijinja zavatra impito heny toraka izany ianao[58]!

⁴Aza mangata-pahefana amin’ny Tompo na toeram-boninahitra amin’ny mpanjaka.

⁵Aza miseho ho marina eo anatrehan’ny Tompo, na miseho ho hendry eo anatrehan’ny mpanjaka[59].

⁶Aza maniry ho tonga mpitsara ianao raha tsy afa-mamongotra ny tsy an-drariny, fandrao ho raiki-tahotra ianao eo anoloan’ny manampahefana ka ho voatohintohina ny tsy fiangaranao[60].

⁷Aza manisy ratsy ny vondron’olona iray tanàna fa hanambanianao tena eo anivon’ny besinimaro izany.

⁸Aza averinao indroa ny fahotanao, fa ny voalohany aza efa mahameloka anao.

⁹Aza manao hoe: «Ny hamaroan’ny fanatitro no hojeren’Andriamanitra Avo Indrindra; ka rehefa atolotro Azy ireny, dia horaisiny.»

¹⁰Aza matahotahotra rehefa mivavaka ianao ary aza atao tsirambina ny fiantrana.

¹¹Aza latsalatsana ny olona ory fo, satria eo hatrany ilay Andriamanitra Izay manetry sady manandratra koa[61].

¹²Aza mamoron-dainga hamelezana ny mpiray tampo aminao; aza manao toy izany koa hamelezana ny sakaizanao.

¹³Mitandrema mba tsy hilaza lainga na oviana na oviana, fa ny tamana amin’ny lainga dia tsy mahasoa velively.

¹⁴Aza mba be teny amin’ny fivorian’ny loholona, ary aza mamerimberin-teny amin’ny vavakao.

¹⁵Aza mankahala ny asa manasatra na ny asa tany satria ilay Avo Indrindra no nanorina ireny ho antsika[62].

¹⁶Aoka ny tenanao tsy hirotsaka ho anisan’ny andian’olona mpanota; tsarovinao fa tsy ho ela akory ny fahatezeran’Andriamanitra.

¹⁷Aoka ianao hanetry mafy ny fanahinao, fa afo sy kankana no sazin’ny tsy mpivavaka[63]! Ny havana aman-tsakaiza

¹⁸Aza atakalonao tombontsoa ny sakaiza ary koa ny tena mpiray tampo aminao, na dia volamena avy any Ofîra aza no hatolotra anao.

¹⁹Aza midify tsy hanambady vehivavy hendry sy tsara fo, fa sarobidy mihoatra noho ny volamena ny hasoany.

²⁰Aza ratsy fitondra mpanompo azo antoka amin’ny asany na mpikarama mahafoy tena amin’ny tokony hataony.

²¹Aoka hotiavin’ny tenanao ny mpanompo mahira-tsaina; ary aza lavinao ny handefa azy ho olona afaka[64].

²²Raha manana biby fiompy ianao, dia aoka hikolokolo azy; ary raha mahasoa anao ireo, dia tehirizo ao aminao.

²³Raha manana zanakalahy ianao, dia aoka hanabe azy; ary ampianaro hanaiky izy ireny, manomboka amin’ny fahatanorany.

²⁴Raha manana zanakavavy ianao, dia tandrovy ny hahavirijiny ny tenany; ary aoka ianao tsy halemy paika loatra aminy!

²⁵Ampanambadio ny zanakao vavy, dia ho afaka adidy lehibe ianao; nefa lehilahy mahira-tsaina no omeo azy.

²⁶Raha vehivavy araka ny fonao no vadinao, dia aza roahina izy; fa raha vehivavy izay halakalanao kosa, dia aza mitoky aminy ianao.

²⁷Omeo voninahitra amin’ny fonao manontolo ny rainao; ary aza hadinoina ny fijaliana niaretan-dreninao[65].

²⁸Tsarovy fa izy ireo no nahitanao masoandro, ka inona no hamalianao ny soa nataony taminao? Adidy amin’ny mpisorona

²⁹Hajao amin’ny fo manontolo ny Tompo ary omeo haja lehibe ny mpisorony[66].

³⁰Tiava amin’ny herinao manontolo Ilay Mpahary anao ary aza atao tsirambina ireo mpandraharahany.

³¹Hajao ny Tompo; ary omeo voninahitra ny mpisorony ka tolory ny anjarany araka izay voadidy hataonao: dia ny voaloham-bokatra sy ny sorona fanalana ny ota, ny sorok’ireo biby izay natolotra ny Tompo, ary ny fanatitra sy santa-bokatra voatokana[67]. Adidy amin’ny mahantra

³²Atsory ny tananao hanasoa ny mahantra, dia hihatra feno aminao ny tsodrano azonao[68].

³³Aoka ny velona rehetra no hohasoavin’ny fanomezanao; ary aza lavinao koa ny hanisy soa ny maty hahatsara levina azy[69].

³⁴Aza midify tsy hankeo amin’izay mitomany, ary miaraha ory amin’izay ory[70].

³⁵Aza misalasala ny mamangy marary[71]; ny asa toy ireo manko no hitiavana anao.

³⁶Amin’ny ataonao rehetra, tsarovy ny hiafaranao, dia tsy hanota na oviana na oviana ianao.