Read Dikateny Iombonana Eto Madagasikara Bena-Siràka 8 Bible Online

Bena-Siràka 8 - Dikateny Iombonana Eto Madagasikara bible

Bena-Siràka 8

¹Fahamalinana eo amin’ny fifandraisana Aza mifanditra amin’olona manam-pahefana, fandrao ho latsaka eo am-pelatanany ianao.

²Aza mifanjihitra amin’olona mpanankarena, fandrao hahery lanja kokoa noho ianao izy; satria efa nahavery olona maro ny volamena, ary efa navaonany mbamin’ny fon’ireo mpanjaka aza.

³Aza mifanditra amin’olona basivava, ary aza tohofana kitay ny afony.

⁴Aza manao vazivazy amin’olona ratsy taiza, fandrao halainy baràka ny razanao.

⁵Aza manome tsiny ny olona miala amin’ny ota; tsarovy fa samy meloka avokoa isika.

⁶Aza maneso olona noho ny fahanterany, fa ny sasany amintsika efa miha-antitra koa.

⁷Aza mifaly raha misy olona maty; tsarovy fa samy ho faty avokoa isika[72].

⁸Aza hamavoina ny tantara ataon’olon-kendry dinidiniho ny fanoharana arosony; satria amin’izy ireny no hahazoanao fanabeazana sy hahaizanao manompo eo anilan’ny lehibe.

⁹Aza mandao ny tantara ataon’ny anti-panahy satria izy koa dia mba nahare tamin’ny razany; sady amin’izy ireny no hahazoanao fahalalana ary koa fahaiza-mamaly rehefa hilaina izany[73].

¹⁰Aoka tsy handrombo mpanota ianao, fa toy ny mandrehitra afon’arina izany ka sao handoro anao ny firedaredany!

¹¹Aza mifanandrina amin’olona be rehaka ianao, fandrao izy mitady haningotra anao amin’ny teninao.

¹²Aza mampisambotra vola an’izay mahery noho ianao; ary raha nisy nampisamborinao, dia ataovy anisan’ny very[74].

¹³Aza manao antoka mihoatra noho izay zakanao; ary raha miantoka ianao, dia manahia ny hanefa bebe kokoa[75].

¹⁴Aza manana ady amin’ny mpitsara, fa ny hajany no hanomezan-drariny azy.

¹⁵Aza miara-dalana amin’olona sahisahy foana, fandrao hovesarany fahasahiranana ianao; ny haitraitrany manko no hanaovany zavatra, ka hiara-maty aminy ianao noho ny hadalàny.

¹⁶Aza mifanditra amin’olona mahery setra ary aza mamaky toera-mangina miaraka aminy; fa tsinontsinona eo imasony ny mandatsa-dra, ka eo amin’ny tsy ahazoanao miantso vonjy no hiantorahany hamotraka anao[76].

¹⁷Aza miara-midinika amin’olona adala, satria tsy mba mahatam-bava izy.

¹⁸Aza manao zavatra an-kiafinafina eo imason’ny vahiny, satria tsy fantatrao izay fihetsika hasetriny an’izany.

¹⁹Aza mamboraka ny fonao amin’izao olona rehetra izao, sady tsy hankasitrahana anao velively izany.