Read Dikateny Iombonana Eto Madagasikara Bena-Siràka 9 Bible Online

Bena-Siràka 9 - Dikateny Iombonana Eto Madagasikara bible

Bena-Siràka 9

¹Ny tokony hatao manoloana ny vehivavy Aza mba saro-piaro ny amin’ny vady lalainao, fandrao hianatra ny ho ratsy fihetsika aminao izy.

²Aza dia mitolo-tena amina vehivavy, ka ny fahefànao no hohitsakitsahiny.

³Aza minia hihaona amina vehivavy janga ianao, fandrao ho tafalatsaka amin’ny famandrihany[77].

⁴Aza mijanona ela miaraka amina vehivavy mpitendry valiha, fandrao ho voafandriny amin’ny fahaizany manodoka ianao.

⁵Aza liam-pijery tovovavy ianao, fandrao hiharan-tsazy noho ny aminy[78].

⁶Aza mitolo-tena amina vehivavy janga ianao, fandrao hahavery ny fanananao izany.

⁷Aza mijerijery etsy sy eroa eny an-dalamben’ny tanàna, ary aza isodisodiana ny toerana mangingina ao aminy.

⁸Avilio ny masonao tsy hifantoka amina vehivavy bikana, ary aza liam-pijery ny hatsaran-tarehim-behivavy hafa; maro ny lehilahy efa voasodokan’ny hatsaran-tarehim-behivavy fa hoatra ny afo mampirehitra ny fitiavany azy izany[79].

⁹Aza mipetraka na oviana na oviana miaraka amina vehivavy vadin’olona; ary aza manao fihinanam-be sy misotro divay miaraka aminy, fandrao ny fonao hirom-pitia mankany aminy ka ho voatariky ny filàndratsinao ho very ianao. Fomba fifandraisana aman’olona

¹⁰Aza mahafoy ny sakaiza tranainy fa tsy mahaleo azy ny vaovao; ny sakaiza vaovao dia toy ny divay vaovao: hosotroinao an-kafaliana izy rehefa miha-antitra.

¹¹Aza mitsiriritra ny voninahitry ny mpanota, fa tsy fantatrao akory izay ho faharavàny[80].

¹²Aoka tsy hankatoavinao ny fahombiazan’ny tsy mpivavaka; tsarovy fa tsy ho afa-maina izy, hatrany amin’ny toeran’ny maty.

¹³Mitoera lavitry ny olona manam-pahefana hamono, dia tsy hanan-tahotra ny fahafatesana ianao; ary raha manatona azy ianao, dia aoka tsy hanao hadisoana, fandrao dia halàny ny ainao! Fantaro fa mandeha eo afovoam-pandrika ianao ary mora asiana toy ny mitety ny mandan’ny tanàna.

¹⁴Tombano araka izay azo atao ny namanao, ka makà torohevitra amin’ny olon-kendry.

¹⁵Mifanakaloza hevitra amin’ny mahira-tsaina, ary aoka ny lalànan’Ilay Avo Indrindra no hiompanan’ny resakao rehetra[81]!

¹⁶Aoka ny olo-marina no hiara-misakafo aminao; ary ny fanajana an’Andriamanitra ho ataovy reharehanao!

¹⁷Ny asan’ny mpahay taozavatra no hiderana ny hakingàny; àry ny lahatenin’ny mpitondra vahoaka no hilazana azy ho hendry.

¹⁸Ny olona mitsaontsaom-bava dia atahorana eo an-tanànany; ary ny olona be resaka loatra koa dia hiharan’ny fankahalana.