Read Dikateny Iombonana Eto Madagasikara Isaià 16 Bible Online

Isaià 16 - Dikateny Iombonana Eto Madagasikara bible

Isaià 16

¹«Avy ao Sela any an-taniefitra no alefaso ny ondrilahin’ilay mpifehy ny tany[94] ho any amin’ny tendrombohitra Tsiôna.»

²Ireo vehivavin’i Môaba dia very hevitra eo am-pitana ao Arnôna[95] toy ny vorona mivezivezy voaroaka tao amin’ny akaniny.

³Nangataka tamin’i Jerosalema ny Môabita hoe: «Manaova fivoriana ary manapaha hevitra. Izao antoandro be izao ny fiarovanao dia ataovy mihanaka aminay toy ny ampielezan’ny alina ny haizina; ka afeno ireo olona voaroaka ary aza aseho ireo mandositra avy atỳ aminay.

⁴Avelao hitoetra ao aminao izay voaroaka ary aoka ho fierena ho azy ianao eo anoloan’ny mpandringana azy! Fa rehefa hitsahatra ny famoretana sy ny fandringanana ary tsy hisy amin’ny tany intsony ny mpampahory,

⁵dia ny fitiavana nasehonao no hanorenana mafy ilay sezafiandrianana ho an’ny taranak’i Davida; hisy mpitsara hipetraka eo sady hombàm-pahamarinana ka hitandro ny rariny sy ho fatra-pandala ny hitsiny.»

⁶Efa renay ny avonavon’i Môaba izay mpiavonavona mihoa-pampana; efa renay ny fireharehany sy ny fizahozahoany ary ny vava tafahoatra sy ny rediredim-poana ataony.

⁷Nefa ankehitriny dia midradradradra ny amin’i Môaba ny Môabita. Eny, samy mitaraina izy rehetra ny amin’ny ampempam-boalobok’i Kira-Heresa[96], ka mitoloko fa tena voa mafy.

⁸Simba ny zaridaina ao Hesbôna sy ny voly voaloboka ao Sibmà, kanefa ny divainy no nahamamo ny andrian’ireo firenena. Nitatra hatrany Jahizera izany voly voaloboka izany, ka nisandrahaka hatrany an-taniefitra; ary ny sampany nandadilady hatrany ampitan’ny Ranomasina Maty[97].

⁹Koa izany no itomaniako ny voly voaloboka any Sibmà miaraka amin’ny mponin’i Jahizera. Hataoko kotsan’ny ranomasoko ianareo, ry Hesbôna sy Elehale, fa niharan’ny akoran’ady ny fiotazanareo sy ny fijinjànareo:

¹⁰Nitsahatra ny koranam-pifaliana avy eny amin’ny saha famokaram-boankazo; ary tsy re intsony ny horakora-pihobiana eny amin’ny tanimboaloboka; sady tsy misy mpanosihosy voaloboka intsony ao amin’ny toeram-pamiazam-boaloboka no tsy ahitan-divay ao anaty barika, fa efa nitsahatra ny akoram-pifaliana[98].

¹¹Mitaraina toy ny feon-dokanga ny foko noho ny amin’i Môaba; eny, mitaraina ny ato anatiko noho ny amin’i Kira-Heresa[99].

¹²Hita ho sasa-poana tokoa i Môaba miakatra eny amin’ny toeram-panasinany sy miditra ao amin’ny tempoliny mba hitalaho amin’ny sampiny, nefa tsy nisy vokany izany.

¹³Izany àry no teny nataon’ny TOMPO fahiny momba an’i Môaba.

¹⁴Fa ankehitriny dia hoy ny TOMPO hoe: «Raha afaka telo taona androany, na ny olo-mangan’i Môaba na ny sarambabem-bahoakany dia samy ho tsinontsinona. Izay sisa tavela aminy dia vitsy kely tsy misy lanjany akory.»