Read Dikateny Iombonana Eto Madagasikara Isaià 2 Bible Online

Isaià 2 - Dikateny Iombonana Eto Madagasikara bible

Isaià 2

¹Ny toe-javatra hitan’i Isaià, zanakalahin’i Amôtsa, momba ny fanjakan’i Joda sy ny tanànan’i Jerosalema[9].

²Izao no hiseho amin’ny andro any aoriana: Ny tendrombohitra misy ny tranon’ny TOMPO[10] dia hanerinerina ambonin’ny tendrombohitra sisa ka hasandratra ho avo kokoa noho ireo havoana; dia hitanjozotra hankany ny firenena rehetra.

³Handeha ho any ny firenena marobe ka hifampitaona hoe: «Andeha isika hiakatra any an-tendrombohitry ny TOMPO, ho any an-tranon’ilay Andriamanitr’i Jakôba; dia hampianariny antsika ny sori-dàlany, ary harahintsika ny lalana hatorony.» Fa avy ao Tsiôna no ivoahan’ny fampianarana, ary avy ao Jerosalema no iavian’ny tenin’ny TOMPO.

⁴Hitsara ny firenena maro Izy, ary hampanaiky ny vahoaka rehetra ka hanefy ny sabany ho angady ireny, ary hanao ny lefony ho fanetezam-boaloboka[11] sady tsy hianatra hiady intsony.

⁵Ry taranak’i Jakôba, avia, aoka isika handeha amin’ny fahazavàn’ny TOMPO!

⁶TOMPO ô, efa narianao ny vahoakanao, dia ny taranak’i Jakôba, satria nihahohaho tao aminy ny mpimasy avy any atsinanana sady betsaka tahaka ny an’ny Filistinina ny mpanandrony; ary nifandray tendro tamin’ny vahiny izy.

⁷Feno volafotsy sy volamena ny taniny sady tsy hita lany ny hareny; ary feno soavaly ny taniny sady tsy hita isa ny kalesiny.

⁸Feno andriamani-tsiizy koa ny taniny; ary niankohoka amin’ny sampy natao tanana izy, dia ny zavatra nataon’ny tanan’olona.

⁹Noho izany, dia tsy maintsy hihohoka sy haetry amin’ny tany ny olombelona; ka tsy hisy hampiarina azy intsony.[12]

¹⁰Miafena any ambany vatolampy ianareo ary misitriha any anaty tany, mba ho lavitry ny TOMPO mahatahotra sy ho lavitry ny fiandrianany mamirapiratra[13].

¹¹Hitanondrika ny olona mpiandranandrana, ary hihohoka ny olona mpanandra-tena; fa amin’izany andro izany, dia ny TOMPO irery ihany no hasandratra.

¹²Eny, hisy andro omanin’ny TOMPOn’izao rehetra izao hitsarana ny mpirehareha sy ny mpanandra-tena ary koa ny mpiandranandrana rehetra mba ho fampietrena azy ireo:

¹³dia ny sedera rehetra any Libano, izay avo sady mijoalajoala, sy ny hazo ôaka rehetra any Basàna;

¹⁴ny tendrombohitra avo sy ny havoana manerinerina rehetra;

¹⁵ny tilikambo miringiringy sy ny manda mafy rehetra;

¹⁶ary ny sambo vaventy sy ny sambo marevaka rehetra.

¹⁷Hihohoka ny olona mpiandranandrana ary haetry amin’ny tany ny olona mpanandra-tena; fa amin’izany andro izany, dia ny TOMPO irery ihany no hasandratra.

¹⁸Ho levona ny andriamani-tsiizy rehetra.

¹⁹Aoka hiditra any amin’ny lava-bato sy ny zohy fierena ireo olona ireo, mba ho lavitry ny TOMPO mahatahotra sy ho lavitry ny fiandrianany mamirapiratra rehefa hirotsaka an-tsehatra Izy mba hampihorohoro ny tany.

²⁰Amin’izany andro izany, dia harian’ny olona ho an’ny voalavo sy ny ramanavy ny sampy volafotsy sy volamena nataony hiankohofana;

²¹dia hiditra amin’ny hirika sy ny tsefatsefa-bato izy mba ho lavitry ny TOMPO mahatahotra azy sy ho lavitry ny fiandrianany mamirapiratra rehefa hirotsaka an-tsehatra ny Tompo hampihorohoro ny tany.

²²Atsaharo ny fitokiana amin’olombelona fa fofonaina miserana ihany izy ka tsy misy lanjany akory!