Read Dikateny Iombonana Eto Madagasikara Isaià 28 Bible Online

Isaià 28 - Dikateny Iombonana Eto Madagasikara bible

Isaià 28

¹Lozan’i Samaria, tanàna izay satroboninahitra sady reharehan’ny mpidoroka ao Efraîma[150]! Erỳ an-tendron’ny lohasaha lonaka izy, ka ny haingony marevaka dia voninkazo mihamalazo eny an-dohan’ireo lehilahy mamon-divay.

²Indro misy hery lehibe alefan’ny Tompo ka toy ny oram-baratra manavandra izany, toy ny rambon-danitra mpandrava, toy ny oram-be mandriaka mahatondra-drano: indray mipaoka monja no androdanan’ny Tompo ny tanàna manontolo hitrosina amin’ny tany.

³Dia ho voahitsakitsaka am-paladia ilay tanàna miendrika satroboninahitra, sady reharehan’ny mpidoroka ao Efraîma.

⁴Ho voahitsakitsaka am-paladia ny voninkazo mihamalazo izay haingony marevaka terỳ an-tendron’ny lohasaha lonaka. I Samaria dia ho tahaka ny voan’aviavy masaka alohan’ny fahavaratra, ka izay mahita azy dia hioty ary hitelina azy indraim-bava.

⁵Amin’izany andro izany dia ny TOMPOn’izao rehetra izao mihitsy no hanjary satroboninahitra marevaka, fehiloha sy haingon’ireo sisa velona amin’ny vahoakany.

⁶Izy no hanome fahaiza-mitsara an’izay mipetraka hitsara ary koa hanome herimpo an’ireo mpanosika ny fahavalo manafika eo anoloan’ny vavahady.

⁷Ireto koa misy miraingiraingy noho ny divay ary mivembena noho ny toaka: dia ny mpisorona sy ny mpaminany izay miraingiraingy noho ny toaka sy mivembena azon’ny divay. Mivembena azon’ny toaka ireo, miraingiraingy noho ny fahitana, ka misafotofoto mamoaka didim-pitsarana:

⁸Feno loany ny latabatra rehetra misy azy, ka efa tsy misy toerana madio intsony.

⁹Dia velom-panontaniana izy hoe: «Iza no tian’iny Isaià iny hampianarina sy hanazavana ny fanambaràna azony? Ankizy vao notazana ve sa zazakely vao nisara-nono?

¹⁰Fa hoy i Isaià amintsika: TSA ampiana V: TSAV; TSA ampiana V: TSAV. KA ampiana V: KAV; KA ampiana V: KAV. Indray mandeha ity, indray mandeha irỳ[151].»

¹¹Eny, amin’ny fiteny tsy fantatra sy fiteny vahiny no hitenenan’ny Tompo amin’ity firenena ity!

¹²Marina fa efa nilazan’ny Tompo tokoa ireo hoe: «Eto no hahitanareo fialan-tsasatra, avelao hiala sasatra izay vizana, fa toerana milamina eto!» Kanjo tsy nety nihaino ireo[152].

¹³Koa ny tenin’ny TOMPO ho azy ireo dia tonga tsy misy heviny toy ny hoe: «TSA ampiana V: TSAV; TSA ampiana V: TSAV. KA ampiana V: KAV; KA ampiana V: KAV. Indray mandeha ity, indray mandeha irỳ. Ka farany ho tafintohina izy raha mandeha, dia hianjera mitsilany ka hahasimba ny voany, ary hifaningotra tongotra ka tsy ho afa-miarina.

¹⁴Noho izany, mihainoa ny tenin’ny TOMPO ianareo mpaniratsira izay mpitondra ity firenena eto Jerosalema ity

¹⁵Ianareo manao hoe: «Efa nanao fifanekena tamin’ny fahafatesana izahay ary efa nifanaraka tamin’ny toeran’ny maty; koa na ho avy aza ny loza, dia tsy hahatratra anay, fa ny lainga no ataonay fiarovana ary ny fitaka no ataonay fierena.»

¹⁶Koa izao no lazain’ny Tompo ANDRIANANAHARY: «Indro Aho hametraka vato iray ao Tsiôna mba hizahan-toetra anareo, dia vato fehizoro sarobidy natao ho fanorenana mafy; ka izay matoky azy tsy hihontsina[153].

¹⁷Ny rariny no horaisiko ho hazo mahitsy, ary ny fahamarinana no hataoko pilao. Koa hopaohin’ny havandra ny fiarovan-tsandoka ianteheranareo ary hindaosin’ny rano ny fierenareo.

¹⁸Hofoanana ny fifanekenareo tamin’ny fahafatesana ary tsy hateza ny fifanarahanareo tamin’ny fonenan’ny maty; koa raha mandalo ny loza mifofofo fiavy, dia hanapotika anareo.

¹⁹Na maraina na antoandro na alina no andalovan’ny loza, isaky ny mandalo izany, dia hahatratra anareo, ka horohoro moa izao raha vao re ny akon’izany!

²⁰Eny, hoy ny ohabolana, fohy loatra ny farafara ka tsy misy hitsorana, ary kely loatra ny lamba ka tsy ampy hirakofana.

²¹Fa toy ny teo an-tendrombohitra Peratsima no hirotsahan’ny TOMPO an-tsehatra, ary toy ny tao amin’ny lemak’i Gibehôna[154] no hihetsehany hanao ny asany sy hanatanteraka ny zavatra ataony. Kanefa asa hafa kely izany, zavatra tsy araka ny mahazatra.

²²Koa ankehitriny, aza maniratsira intsony ianareo fandrao hihamafy kokoa ny tady eny am-bozonareo; satria ny Tompo ANDRIAMANITR’izao rehetra izao no nandrenesako fa efa voatendry ny handravany tanteraka ity tany ity.

²³Koa manongilàna sofina hihaino tsara ahy, ary tandremo izay lazaiko aminareo:

²⁴Ny tantsaha izay te hanao famafazana dia tsy revo miasa tany fotsiny na manoritsoritra sy mandamaka azy.

²⁵Fa rehefa voaravony ny tany, dia afafiny ny voan’anana nigela na komîna; avy eo dia alahany ny varim-bazaha sy ny ôrza amin’ny toerana voafaritra ho azy[155]; ny ampemba kosa voleny amin’ny sisiny.

²⁶Izany no fomba natoron’Andriamaniny azy; izany no nampianariny azy.

²⁷Fa tsy fitaovam-pivelezana misy vy no anintsanam-boa ny nigela, ary tsy kodian-tsarety no anintsanam-boa ny komina[156]; fa tehina no anintsanam-boa ny nigela, ary fantàka no anintsanam-boa ny komina.

²⁸Saingy ny vary fanao mofo kosa dia tsy tokony homongoina fa hovelesina; hampanitsahana ny salohim-bary ny fitaovam-pivelezana tarihin’omby, kanefa tsy homongoina tsy akory ny vary.

²⁹Izany koa dia avy amin’ny TOMPOn’izao rehetra izao, Ilay maneho fikasana mahagaga sy fahaiza-manao mahatalanjona.