Read Dikateny Iombonana Eto Madagasikara Isaià 29 Bible Online

Isaià 29 - Dikateny Iombonana Eto Madagasikara bible

Isaià 29

¹«Indrisy, ry Ariela[157]! Ry Ariela, tanànan’i Jerosalema, nataon’i Davida fahirano fahiny! Na hiverina isan-taona isan-taona aza ny fitsingeringerenan’ny andro fety,

²dia hampahorîko ianao, hoy ny Tompo, ka alahelo sy fahoriana lalina no hanjo anao, ary ho tonga «ariela»-n’ny alitara ianao amiko.

³Hanao fahirano anao tahaka ny nataon’i Davida Aho ary hanisy miaramila hanemitra anao sy hanangana tovon-tany hamelezana anao.

⁴Haetry ianao ka hiteny avy ao an-kibon’ny tany ao. Hibitsibitsika ny feonao mamakivaky ny vovoka; mova tsy feon’ny matoatoa miala avy amin’ny tany sy misamoina avy ao amin’ny vovoka ny teninao.

⁵Toy ny vovoka mitora-jofo ny habetsaky ny fahavalonao, toy ny akofa misavoana ny olon-dozabe mamely anao.» Fa ho tampoka dia tampoka kosa

⁶no hiavian’ny famaliana hamonjena anao avy amin’ny TOMPOn’izao rehetra izao, Izay hombàn’ny kotro-baratra sy ny horohoron-tany ary firohondrohona mafy, hombàn’ny tadio sy ny tafio-drivotra ary ny lelafo mandevona.

⁷Toy ny nofy na fahitana mihelina amin’ny alina no hanjavonan’ireo firenena marobe mamely anao, ry Ariela, dia ireo rehetra miady aminao ka manangana tovon-tany hampahoriana anao[158].

⁸Ho tahaka ny olona mosarena manonofy mihinana, kanjo nony taitra dia noana ihany ny kibony; ho tahaka ny olona mangetaheta manonofy misotro, kanjo nony taitra dia trotraka fa mbola maina ihany ny tendany; ho tahaka izany ireo firenena marobe izay miady amin’ny tendrombohitra Tsiôna.

⁹Migagà ka mitalanjòna ianareo. aoka ho jamba ka tsy hahita, ho mamo nefa tsy amin-divay, hivembena nefa tsy amin-toaka!

¹⁰Fa ny TOMPO efa nampidina fanahy mampatory tao aminareo ary notampenany ny masonareo[159], — hilazana ireo mpaminany izany — , sady nosaronany ny lohanareo, — hilazana ny mpahita izany.

¹¹Ny fanambaràna izany rehetra izany ho anareo dia miafina toy ny tenin’ny raki-tsoratra voaisy tombokase. Dia omena izay mahay mamaky teny izany ka iangaviana azy hoe: «Azafady, mba vakio kely ity». Fa hamaly izy hoe: «Tsy azoko atao izany, satria voaisy tombokase io raki-tsoratra io.»

¹²Dia omena izay tsy mahay mamaky teny indray izany ka iangaviana azy hoe: «Azafady, mba vakio kely ity»; fa hamaly izy hoe: «Tsy mahay mamaky teny aho.»

¹³Ary hoy ny Tompo hoe: «Ity firenena ity manatona Ahy am-bava fotsiny sy manome voninahitra Ahy an-tendromolotra ihany fa ny fony kosa manalavitra Ahy; ka fomban’olombelona nianarana ihany ny fanajana asehony Ahy[160].

¹⁴Noho izany, indro Aho mbola hanao zava-mahagaga ho an’ity firenena ity, dia zava-mahagaga sy mahazendana; fa ho foana ny fahendren’ny olon-kendriny ary ho takona ny fahaizan’ny manampahaizany[161].»

¹⁵Lozan’izay manao zavatra an-tsokosoko ka manafina ny paikany amin’ny TOMPO sy mamorona teti-dratsy ao amin’ny maizina. «Iza no mahita antsika, hoy izy, ary iza no mahalala izay ataontsika?»

¹⁶Oadray ity hadalànareo e! Ny mpanefy ve hoheverinareo hitovy amin’ny tanimanga? Ny taozavatra ve hanao amin’ny mpanao azy hoe: «Tsy ianao no nanao ahy»? na ny fanaka bakoly hilaza amin’ny mpanefy azy hoe: «Tsy misy zavatra hainao akory[162]»?

¹⁷Moa tsy afaka fotoana kely monja dia hovana ho saha mahavokatra ny alan’i Libano, ary hovana ho ala ny saha mahavokatra?

¹⁸Amin’izany andro izany ny marenina dia handre izay voalaza ao amin’ny boky ary hiala ao amin’ny haizim-pito ny mason’ny jamba ka hahita.

¹⁹Ny malahelo hiravoravo amin’ny TOMPO hatrany, ary ny mahantra ho dibo-kafaliana noho ny amin’Ilay Masin’i Israely.

²⁰Satria tapitra hatreo ny mpanjakazaka ary ho levona ireo mpaniratsira, haringana ireo rehetra mitady hanimba ny hafa,

²¹ka miampanga lainga azy amin’ny teny sy mamandrika ny mpitsara mba hamarina ny tsy manan-tsiny any an-davaka.

²²Noho izany àry, ny TOMPO Andriamanitr’i Jakôba sy ny taranany sady mpanavotra an’i Abrahama dia nilaza izao teny izao: «Tsy ho menatra intsony ny taranak’i Jakôba, ary tsy hivaloarika intsony ny tarehiny.»

²³Satria raha mahita izay hataoko eo anivony ny tenany sy ireo taranany, dia hanome hasina ny anarako, hanome hasina Ahy satria Izaho no ilay Masin’i Jakôba ary hangovitra eo anatrehako satria Izaho no Andriamanitr’i Israely.

²⁴Mbola hanan-tsaina indray ireo nivilivily fanahy ary hanaiky hampianarina indray ireo tsy nitsaha-nanakiana.