Read Dikateny Iombonana Eto Madagasikara Isaià 3 Bible Online

Isaià 3 - Dikateny Iombonana Eto Madagasikara bible

Isaià 3

¹Fa indro ny Tompo ANDRIAMANITR’izao rehetra izao manaisotra amin’i Jerosalema sy amin’i Joda ny andry aman-tohana isan-karazany iankinany: dia ny mofo sy ny rano izay tohan’aina,

²ny miaramila voafantina sy ny miaramila tsotra, ny mpitsara sy ny mpaminany, ny mpimasy mbamin’ny loholona,

³ny manamboninahitra sy ny olo-manan-kaja, ny mpanolotsaina mbamin’ny manampahaizana, ary ireo havanana amin’ny fanaovana vorika.

⁴Ka hoy ny Tompo hoe: «Ankizy no hotendreko ho lehibeny ka hitondra azy araka ny haitraitrany.»

⁵Dia hifanjevo izy samy mpiray firenena; hifampisompatra ny olona ka hifamely, ny tanora hirehareha amin’ny antitra, ary ny olon-tsotra hanohitra ny olo-manan-kaja.

⁶Hisy lehilahy hisambotra ny rahalahiny izay iray tarika aminy ihany ka hiangavy azy hoe: «Ianao no manam-pitafiana[14], koa aoka ho mpifehy anay; raiso ny andraikitrao amin’izao fahavoazana izao.»

⁷Fa hamaly izy amin’izay andro izay hoe: «Tsy afaka hanao na inona na inona ho anareo aho, tsy misy mofo na fitafiana ao an-tranoko, koa aza ataonareo mpifehy vahoaka aho.»

⁸Eny, lavo i Jerosalema ary potraka i Joda; ka na ny tenin’ny olona na ny asany dia samy manohitra ny TOMPO sy mihantsy ny voninahiny eo imaso.

⁹Ny endrika asehony dia efa miampanga azy; manota an-karihary toy ny mponin’i Sôdôma[15] izy fa tsy mba miafinafina intsony. Indrisy! Anomanany loza ho an’ny tenany izany.

¹⁰Sambatra ny olo-marina fa hahita soa izy, ka ny vokatry ny asany no hohaniny.

¹¹Lozan’ny ratsy fanahy kosa fa hiharam-pahavoazana izy, satria araka izay nataony ihany no zavatra hafitsoka aminy!

¹²Ry vahoakako ô, hoy ny Tompo, olona mpanjakazaka anao no mampahory anao ary olona tsy miraharaha anao no manapaka anao; ry vahoakako ô, ireo mpitondra anao no nampivily anao ka làlan-tsiizy no nitondrany anao.

¹³Vonona hifandahatra ny TOMPO, ka mipetraka hitsara ny vahoakany.

¹⁴Hampandaloviny fitsarana ireo loholona sy lehiben’ny vahoakany: «Ianareo no nanimba ny voaloboka[16]; ary izay nalainareo tamin’ny mahantra no namenoanareo ny tranonareo.

¹⁵Ahoana moa no ahazoanareo mampahory ny vahoakako sy manosihosy ny fahamendrehan’ny mahantra? Izany no teny hentitra avy amiko Tompo ANDRIAMANITR’izao rehetra izao.»

¹⁶Hoy koa ny TOMPO hoe: «Miandranandrana erỳ ny andriambavilanitr’i Tsiôna, mianjonanjona aoka izany rehefa mamindra, mianjola fijery sady mitsingintsingim-pandeha, mampikorintsana ny haba amin’ny hato-tongony.»

¹⁷Noho izany, dia hataon’ny TOMPO voaharatra ny tampon-dohan’ireo andriambavilanitra ireo sady hataony mangadihady ny handriny[17].

¹⁸Amin’izany andro izany, dia hoesorin’ny Tompo ny haingo[18] rehetra fampiasan’ny andriambavilanitr’i Tsiôna, izany hoe: ny haban-tongotra sy ny fehiloha ary ny firavaka misarim-bolan-tsinana;

¹⁹ny kavina jejo sy ny rojo ary ny voaly;

²⁰ny satroka diadema sy ny rojo miolanolana, ny fehikibo mirandrana sy ny vakana fanefitra ary ny firavaka mampanambina;

²¹ny peratra sy ny kavin’orona;

²²ny akanjo fitondra mianjaika sy ny akanjo misy saron-doha ary koa ny fehitenda sy ny pôketra;

²³ny fitaratra sy ny akanjo somizo manify ary ny samboady sy ny lamba fisalobonana.

²⁴Ny fofona manitra hosoloana fofo-maimbo, ny fehikibo marevaka hosoloana tady tsotra, ny randrana tsara voatra hosoloana loha sola. ny fitafiana mihaja hosoloana lamba fisaonana. Eny, ny bika soa hosoloana tomboka vy mahamenatra[19].

²⁵Ry Jerosalema ô, ho fatin-tsabatra ny lehilahy ao aminao, ary ho faty an’ady ny miaramilanao.

²⁶Koa hitomany sy hitoloko ny iray tanàna, ho toy ny vehivavy very fananana mitorevaka amin’ny tany.