Read Dikateny Iombonana Eto Madagasikara Isaià 34 Bible Online

Isaià 34 - Dikateny Iombonana Eto Madagasikara bible

Isaià 34

¹Manatòna handre, ry firenen-kafa, ary mihainoa, ry vahoaka isan-tokony. Aoka handre ny tany sy izay rehetra mameno azy; aoka handre izao tontolo izao sy ny vokatra rehetra avy aminy!

²Tezitra amin’ny firenen-kafa rehetra ny TOMPO sady misafoaka amin’ny tafiny manontolo; nasainy naringana ireny ka natolony hovonoina.

³Izay voavono dia hariam-potsiny ka hamofona maimbo ny fatiny; ary handriaka ra ny tendrombohitra.

⁴Ny andian-tafiky ny kintana dia ho potika hiraraka avokoa; hihorona toy ny horonan-taratasy ny habakabaka; ary toy ny fihintsan’ny ravim-boaloboka maina na toy ny fihintsan’ny ravin’aviavy malazo no hihintsanan’ny planeta aman-kintana[173].

⁵Eny ana habakabaka ilay sabatry ny TOMPO no mandihindihy toa mamo, ka indro miantonta hamely an’i Edôma[174], dia ilay firenena voatendry haringana mba ho famaizan’ny TOMPO azy.

⁶Feno ra ilay sabatry ny TOMPO sady mihosina menaka, dia ran’ny zanak’ondry sy osilahy ary koa menaka avy amin’ny fonom-boany; satria misy sorona ataon’ny TOMPO ao Bôtserà ary fandringanana goavana ao amin’ny tany Edôma[175].

⁷Voaripaka miaraka amin’ireo koa ny ombimanga mbamin’ny vantotr’omby sy ny ombilahy ka vonton-dra ny tanin’ny Edômita ary mihosi-menaka ny vovo-taniny.

⁸Eny, andron’ny valifaty izany ho an’ny TOMPO sady taona famaliana ho an’Ilay mpiaro an’i Tsiôna.

⁹Hanjary toy ny dity ny ranon-driakan’i Edôma, hiova ho solifara ny vovo-taniny. Hanjary sahan-dity mirehitra io tany io;

¹⁰ka tsy ho faty na andro na alina izany, ary hiakatra tsy an-kijanona ny setroka[176]; hijanona ho tany hay hatrany hatrany i Edôma ary tsy hisy handalo eo intsony mandrakizay.

¹¹Ho kianjan’ny tararaka sy ny sokina izy ary honenan’ny vorondolo sy ny goaika. Hohenjanin’ny Tompo eo aminy ny famolaina fandravana sy ny pilao fandrodanana.

¹²Tsy hisy andriana intsony hifidy mpanjaka sady ho foana avokoa ny filohany rehetra.

¹³Haniry tsilo ny lapan’ny mpanjaka; ary songosongo sy voaroy no hanenika ny trano fiarovany. Ho fonenan’ny amboadia sy sehatry ny vorombe ireo,

¹⁴ho fihaonan’ny bibidia sy ny kary; any no hifampitaona ireo osidia, any no hiato sy hiala sasatra ny lilîta mpandehandeha amin’ny alina[177].

¹⁵Any koa no hanao lavaka ny bibilava ka hametraka ny atodiny sy hikotrika azy ary hanara-maso ny fahafoizany. Any koa no hivondronan’ny papango samy araka ny andiany avy.

¹⁶Raha mitady ao amin’ny bokin’ny TOMPO[178] ianareo, dia ho afaka hamaky izao teny izao: Tsy misy tsy ao ireo biby ireo na iray aza, ary tsy misy sahirana mitady ny andiany satria ny baikon’ny Tompo no nandidy izany ary ny Fanahiny no nanangona azy.

¹⁷Antsapaka no nanendreny ny anjaran’ny tsirairay, noraisiny ny famolaina hizaràna ny tany ho azy; ireo no ho tompony hatrany hatrany ka honina ao hatramin’ny taranaka mifandimby.