Read Dikateny Iombonana Eto Madagasikara Isaià 52 Bible Online

Isaià 52 - Dikateny Iombonana Eto Madagasikara bible

Isaià 52

¹Mifohaza ianao, ry Tsiôna ô, mifohaza ka tafio indray ny herinao; tafio indray ny fitafianao tsara tarehy, ry Jerosalema tanàna masina! Satria tsy hiditra ao aminao intsony ny tsy mifora sy ny olona maloto ara-pivavahana[252].

²Ahintsano ny vovoka nandrakotra anao, ka mitsangàna; dia aoka ho amin’ny sezafiandriananao indray no hipetrahanao, ry Jerosalema ô! Ny fatorana mangeja ny tendanao dia aoka hovahanao, ry Tsiôna babo!

³Fa izao no lazain’ny TOMPO amin’ny vahoakany: «Maimaim-poana no nanolorana anareo handevozina, ka tsy handaniana vola ny hanavotana anareo.»

⁴Izao koa no lazain’ny Tompo ANDRIANANAHARY: «Tamin’ny voalohany dia nidina tany Ejipta ny vahoakako mba hivahiny; avy teo dia ny Asirianina no nampahory azy tsy amin’antony.

⁵Ary amin’izao toe-javatra ankehitriny eto izao, inona no tombony azoko?» Ka hoy ny teny hentitry ny TOMPO hoe: «Natao babo maimaimpoana ny vahoakako. Mirehaka manakora ny mpanjakazaka mampahory azy; ary hamavoina isan’andro ny anarako[253].

⁶Noho izany, dia ho avy ny andro hahalalan’ny vahoakako ny anarako; ka amin’izay no hahafantarany fa Izaho mihitsy no Ilay miteny hoe: Inty Aho.»

⁷Endrey tsara tokoa erỳ an-tendrombohitra ny famindran’ilay mpitondra hafatra[254], izay manambara fiadanana sy mampita hafatra mahasambatra ary manambara famonjena ka manao amin’i Tsiôna hoe: «Mpanjaka ny Andriamanitrao.»

⁸Injany ny feon’ireo napetrakao ho mpitily! Manandra-peo izy ka miara-mihorakoraka-pifaliana, satria mahita maso ny fiverenan’ny TOMPO ao Tsiôna.

⁹Manaova horakora-pifaliana ka redòny ny hiram-pihobiana, ry toerana rava ao Jerosalema, satria efa nampahery ny vahoakany ny TOMPO sady efa nanavotra an’i Jerosalema!

¹⁰Nahariharin’ny TOMPO teo imason’ny firenen-kafa rehetra ny hery maneho ny fahamasinany ka hahita ny famonjen’Andriamanitsika ny vazan-tany rehetra.

¹¹Mialà ianareo mpitondra ny fanaky ny TOMPO, mialà, mivoaha avy ao Babilôna. Aza mikasika izay maloto[255], fa aoka hadio ianareo no mivoaka tao!

¹²Satria tsy hikoropaka ianareo raha miainga hivoaka ny tanàna, ary tsy hihorohoro raha miala teto; fa ny TOMPO no hialoha lalana anareo ary ny Andriamanitr’i Israely no ho vodilalanareo.

¹³Indro fa hahomby ny Mpanompoko; hisandratra ho avo izy ka hapetraka eo amin’ny toeram-boninahitra ambony indrindra.

¹⁴Maro be ny olona no tsiravina raha nijery azy satria niova loatra ny endriny ka tsy toy ny endrik’olona akory; ary ny tarehiny tsy toy ny tarehin’olombelona intsony.

¹⁵Firenen-kafa maro kosa no ho talanjona ny aminy; ka hitampim-bava eo anatrehany aza ireo mpanjaka, satria izay tsy mbola notantaraina taminy no hitany ary izay tsy mbola reny akory no saintsaininy[256].