Read Dikateny Iombonana Eto Madagasikara Isaià 64 Bible Online

Isaià 64 - Dikateny Iombonana Eto Madagasikara bible

Isaià 64

¹Ho toy ny afo mampirehitra kitay rantsan-kazo na mampangotraka rano anie Ianao; ka ho fantatry ny fahavalonao ny lazanao ary hangovitra eo anatrehanao ny firenen-kafa,

²rehefa nanao zava-mahatahotra izay tsy nampoizinay akory Ianao. Eny, hidina tokoa Ianao, Tompo ô, ka hihorohoro eo anatrehanao ny tendrombohitra.

³Fa hatrizay hatrizay dia tsy mbola henon’ny olona na ren’ny sofiny na hitan’ny masony izay Andriamanitra hafa noho Ianao nahavita izany tamin’izay matoky Azy[301].

⁴Mitsena izay mifaly hanao ny marina Ianao, dia izay mihevitra hanaraka ny lalanao; koa raha tezitra Ianao, dia satria nanota izahay. Nefa ho voavonjy ihany izahay, rehefa ho voakosokao tanteraka ny otanay.

⁵Samy efa tahaka ny olo-maloto izahay rehetra, ary tahaka ny lamba mihosin-dra ny asa soa rehetra mba vitanay. Paohin’ny helokay izahay rehetra toy ny ravin-kazo maina paohin’ny tadio.

⁶Tsy nisy niantso ny anaranao intsony na nahatsiaro hifikitra aminao, satria nandà ny hijery anay Ianao ary namela anay handevozin’ny helokay.

⁷Na dia izany aza anefa, TOMPO ô, Ianao no Rainay; tanimanga izahay, fa Ianao no mpanefy ary asan’ny tananao izahay rehetra.

⁸TOMPO ô, aza vinitra loatra aminay ary aza tsarovana hatrany ny helokay; mba tsinjovy re izahay vahoakanao rehetra.

⁹Tonga aolo ireo tanànanao masina, tonga taniefitra i Tsiôna ary tonga lao i Jerosalema.

¹⁰Ny tempoly masina sady mamirapiratra izay nanaovan’ny razanay hira fiderana Anao dia kilan’ny afo, ary ny zava-drehetra maminay indrindra dia rava avokoa.

¹¹Eo anoloan’ireo fahavoazana rehetra ireo, dia tsy hiraika aminay ve Ianao, TOMPO ô? Mbola hangina ihany ve Ianao ka hampahory anay mafy loatra?