Read Dikateny Iombonana Eto Madagasikara Isaià 7 Bible Online

Isaià 7 - Dikateny Iombonana Eto Madagasikara bible

Isaià 7

¹Tamin’ny andro nanjakàn’i Ahaza, zanakalahin’i Jôtama sady zafikelin’i Hozià mpanjakan’i Joda, dia niakatra i Retsîna mpanjakan’i Siria sy i Peka, zanakalahin’i Remalià sady mpanjakan’i Israely, mba hanafika an’i Jerosalema, kinanjo tsy nahafaka azy[29].

²Dia nampandrenesina i Ahaza, taranak’i Davida, sy ny tao an-dapany fa efa mitoby any Efraîma[30] ny Sirianina. Koa taitra ny fon’ny mpanjaka sy ny an’ny vahoakany, tahaka ny hazo any an’ala rehefa tsofin’ny rivotra.

³Dia hoy ny TOMPO tamin’i Isaià: — Mivoaha ny trano ianao mba hitsena an’i Ahaza, dia ianao sy i Seara-Jasoba zanakao lahy, fa efa mby amin’ny lakandrano ambony izy, eo amin’izay lalana mankany amin’ny sahan’ny mpanasa lamba[31].

⁴Ary lazao aminy hoe: «Tandremo! Aza taitaitra foana, aza matahotra. Aoka tsy ho ketraka ny fonao noho ny fahatezeran’i Retsîna avy any Siria sy ny fahatezeran’ny zanakalahin’i Remalià, fa tapa-porohana midonaka ihany ireo.

⁵Ny Sirianina ary i Peka sy ny Efraîmita dia efa niray tetika tokoa hanisy ratsy anao ka nanao hoe:

⁶‹Andeha isika hiakatra hamely an’i Joda mba hampitahotra azy, ka hoterentsika hanaraka antsika izy; dia ilay zanakalahin’i Tabeela[32] no hatsangantsika hanjaka ao aminy.›

⁷Izao kosa no lazain’ny Tompo ANDRIANANAHARY: ‹Tsy ho tanteraka sady tsy hisy izany

⁸I Damasy manko no renivohitr’i Siria, ary ao ihany i Retsîna no filoha; i Samaria no renivohitr’i Efraîma, ary ao ihany i Peka no filoha. I Efraîma, ao anatin’ny 65 taona, dia tsy ho vanon-ko firenena intsony.› Kanefa raha tsy ny TOMPO no itokianareo, dia tsy ho azo itokiana haharitra koa ianareo.»

¹⁰Dia mbola nanafatra an’i Ahaza ny TOMPO ka nanao hoe:

¹¹— Angataho famantarana ny TOMPO Andriamanitrao mba ho antoka ho anao, na any amin’izay fanambanin’ny toeran’ny maty izany na eny an-danitra ambony eny.

¹²Fa novalian’i Ahaza hoe: — Tsia, tsy hangataka na inona na inona aho fa tsy te haka fanahy ny TOMPO.

¹³Dia hoy i Isaià taminy: — Mihainoa ahy ianao sy ny fianakavianao izay samy taranak’i Davida. Moa tsy ampy anareo ve ny manasatra ny olombelona no dia hanasatra an’Andriamanitra koa ianareo?

¹⁴Noho izany àry, dia ny Tompo mihitsy no hanome famantarana ho anareo: jereo fa hitoe-jaza ny vehivavy ka hiteraka zazalahy ary ny anarany hataony hoe Himanoela, izany hoe «Andriamanitra miaraka amintsika[33].»

¹⁵Rononomandry sy tantely no ho sakafony ambara-pahalalàny mandà ny ratsy sy mifidy ny tsara.

¹⁶Fa raha tsy mbola mahalala handà ny ratsy sy hifidy ny tsara akory izany zaza izany, dia hilaozan’ny mponina ny tanin’ireo mpanjaka roa izay mampitahotra anao ireo.

¹⁷Kanefa hataon’ny TOMPO tonga aminao sy ny vahoakanao ary ny taranakao ny toe-javatra izay tsy mbola nisy hatramin’ny andro nisarahan’i Joda tamin’ny fanjakan’i Israely ka hatramin’izao, dia ny hanafihan’ny mpanjakan’i Asiria izany.

¹⁸Amin’izany andro izany ny TOMPO dia hisioka hiantso ny lalitra izay any amin’ny vinany misampana iafaran’ilay onin’i Ejipta; ary hisioka koa Izy hiantso ny renitantely izay any Asiria.

¹⁹Dia indray ho avy ireny ka hipetraka eny an-tevana kisolasola sy eny an-tsefatsefa-bato ary koa eny amin’ny kirihitra rehetra eny sy eny amin’ny toerana rehetra fampisotroam-biby.

²⁰Amin’izany andro izany ny Tompo dia hanofa hareza avy eny am-pitan’i Eofrata: filazana ny mpanjakan’i Asiria izany; ka ho voaharatra avokoa ny lohanareo rehetra sy ny volon-tongotrareo ary koa ny volom-bavanareo[34].

²¹Amin’izany andro izany koa ny isam-batan’olona dia samy hiompy ombivavy iray sy osivavy roa;

²²ka noho ny habetsahan’ny ronono avy aminy dia rononomandry no hohanin’ny olona fa rononomandry sy tantely no ho foto-tsakafo ho an’izay rehetra sisa tavela eto amin’ny tany.

²³Amin’izany andro izany koa ny saha rehetra nisy voaloboka arivo fototra izay mitentina volafotsy arivo dia ho rakotry ny tsilo sy ny songosongo.

²⁴Koa ho tonga hihaza ao ny olona miaraka amin’ny tsipîka sy ny zana-tsipîka. Izany tany manontolo izany tokoa dia ho rakotry ny tsilo sy ny songosongo.

²⁵Ary ny amin’ireo havoana izay novolena tamin’ny lapika dia tsy ho azo aleha intsony noho ny tahotra ny tsilo sy ny songosongo, fa havela ho kijàna fiandrasana omby sy ho tany firaofan’ny ondry aman’osy.