Read Dikateny Iombonana Eto Madagasikara Levitîka 10 Bible Online

Levitîka 10 - Dikateny Iombonana Eto Madagasikara bible

Levitîka 10

¹Tamin’izay kosa dia samy naka ny fanembohany avy ry i Nadaba sy i Abihò, zanakalahin’i Aharôna, ka nanisy vain’afo teo anatiny sy nametraka vovo-javamanitra teo ambonin’ny vain’afo ary nanolotra izany teo anatrehan’ny TOMPO: zavatra tsy mifanaraka amin’izay nandidian’ny TOMPO azy izany.

²Koa nisy afo nivoaka avy teo anatrehan’ny TOMPO ka nandoro an’i Nadaba sy i Abihò; hany ka maty teo amin’ny Toeramasina teo izy roa lahy.

³Dia hoy i Mosesy tamin’i Aharôna: — Efa voalazan’ny TOMPO izany, fony Izy nanao hoe: «Izay hanakaiky Ahy dia tiako hanaja ny fahamasinako, ary hanome voninahitra Ahy eo anatrehan’ny vahoaka rehetra.» Dia nanao hiram-pisaonana i Aharôna[36].

⁴Nampanalain’i Mosesy kosa ry i Misaela sy i Elitsafàna, samy zanakalahin’i Hoziela izay rahalahin-drain’i Aharôna, ka nilazany hoe: Manatona ianareo ka ento ny fatin’ny havanareo hiala eo amin’ny Toeramasina, ho any ivelan’ny toby.

⁵Dia nanatona izy roa lahy ka nitondra ny faty mbola miakanjo ny fanamiany, ho any ivelan’ny toby araka izay voalazan’i Mosesy.

⁶Ary hoy kosa i Mosesy tamin’i Aharôna sy tamin-dry i Elehazara sy i Itamara zanany roa lahy hafa: — Aza avela hirakaraka ny volon-dohanareo ary aza triarina ny fanamianareo, fandrao dia ho faty eo koa ianareo sady hiharan’ny fahatezeran’ny TOMPO ireto Israelita rehetra tafangona. Fa ny mpiray firenena aminareo, izany hoe ny taranak’i Israely rehetra, no aoka hitomany, noho izy roa lahy nofaizin’ny TOMPO tamin’ny afo mandoro.

⁷Ianareo kosa aza miala eo anoloan’ny varavaran’ny Tranolay fihaonana, fandrao maty ianareo; satria voatokana ho an’ny TOMPO ianareo noho ny menaka nanosorana anareo. Dia nanao araka ny tenin’i Mosesy izy telo mianaka.

⁸Ary niteny tamin’i Aharôna ny TOMPO ka nanao hoe:

⁹— Aza misotro divay na zava-pisotro hafa mahamamo ianao sy ny zanakao, rehefa hiditra ao an-Tranolay fihaonana, mba tsy ho faty ianareo; lalàna raikitra ho anareo sy ny taranakareo izany.

¹⁰Aza misotro zava-pisotro mahamamo ianareo, rehefa hanavaka ny zavatra masina sy tsy masina ary ny zavatra madio sy tsy madio,

¹¹na koa rehefa hampianatra ny Israelita ny lalàna rehetra izay nampitaiko ho azy ireo tamin’ny alalan’i Mosesy.

¹²Dia hoy i Mosesy tamin’i Aharôna ary tamin’i Elehazara sy i Itamara zananilahy sisa velona: — Alao ny fanatitra lafarinina ambiny, rehefa nesorina ny ampahany nolevonina tamin’ny afo mba ho an’ny TOMPO; dia ataovy mofo tsy misy leviora ka hano eo anilan’ny alitara, satria zava-masina dia masina izany sakafo izany.

¹³Eo amin’ny faritra voatokana ho an’izany ihany no hihinananareo azy, fa anjaranao sy ny zanakao izany ambiny avy amin’ny fanatitra ho an’ny TOMPO izany araka ny baiko nomeny ahy[37].

¹⁴Ireo didin-kena avy amin’ny sorom-pihavanana ataon’ny Israelita, izany hoe ny tratrany izay nahevaheva no fomba fanolorana azy sy ny feny izay navahana manokana, dia eo amina toerana madio no hihinananareo azy; ianao sy ny taranakao lahy ary ny taranakao vavy koa aza no hihinana azy fa nomena ho anjaranao sy ny taranakao ireo didin-kena ireo.

¹⁵Ny feny izay navahana manokana sy ny tratrany izay nahevaheva no fomba fanolorana azy dia entin’ny Israelita miaraka amin’ny tavin-kena izay hodorana amin’ny afo. Hahevaheva eo anatrehan’ny TOMPO ireo didin-kena ireo; avy eo dia ho anao sy ny zanakao. Anjara raikitra ho anareo hatrany hatrany ireo, araka ny baikon’ny TOMPO[38].

¹⁶Ary namotopototra momba ilay osilahy natao sorona ho fanalana ny otan’ny vahoaka i Mosesy[39]. Ka nampahalalaina azy fa efa kilan’ny afo izany. Dia tezitra tamin’i Elehazara sy i Itamara, zanakalahin’i Aharôna sisa velona, i Mosesy ka nanontany azy hoe:

¹⁷— Zava-masina dia masina ny hena avy amina sorona fanalana ny ota, ka nahoana no tsy nohaninareo teo amin’ny faritra voatokana hihinanana azy? Efa nomen’ny TOMPO anareo izany mba hahazoanareo manafaka ny fahotana vitan’ny Fiangonan’ny Israelita tsivakivolo sy manao ny fombam-pivavahana famelan-keloka ho azy eo anatrehan’ny Tompo[40].

¹⁸Ny ran’ilay biby natao sorona dia tsy nampidirina tao anatin’ny Toeramasina, ka tokony ho teo amin’ny faritra voatokana ho an’izany no nihinananareo ny henany, araka izay nandidiako anareo.

¹⁹Dia i Aharôna kosa no namaly an’i Mosesy hoe: — Amin’izao andro nanateran’ny Israelita ny sorona fanalana ny otany sy ny sorona dorana manontolo teo anatrehan’ny TOMPO izao, dia fantatrao ny fahoriana nidona tamiko. Koa azoko natao ve, amin’ny andro toy izao, ny nihinana ny henan’ilay sorona fanalana ny ota? Tsy ho nankasitrahin’ny TOMPO velively izany[41]!

²⁰Rehefa ren’i Mosesy izany valin-tenin’i Aharôna izany, dia nankasitrahiny.