Read Dikateny Iombonana Eto Madagasikara Levitîka 11 Bible Online

Levitîka 11 - Dikateny Iombonana Eto Madagasikara bible

Levitîka 11

¹Dia niteny tamin’i Mosesy sy i Aharôna ny TOMPO

²mba hamepetra ny Israelita hoe[42]: «Izao no ho fihinanareo amin’ny biby rehetra eto ambonin’ny tany:

³ny biby rehetra mivaky kitro sady mandinika.

⁴Kanefa ny biby mandinika fotsiny na mivaky kitro fotsiny tsy hohaninareo, fa maloto aminareo ireny, ohatra: ny rameva satria mandinika ihany izy nefa tsy mba mivaky kitro;

⁵ny hiràka[43], satria mandinika ihany izy nefa tsy mba mivaky kitro;

⁶ny bitro, satria mandinika ihany izy nefa tsy mba mivaky kitro;

⁷ny kisoa, satria mivaky kitro ihany izy nefa tsy mba nandinika.

⁸Koa aza haninareo ny henany ary aza kasihinareo akory ny fatiny: maloto aminareo ireny.

⁹«Izao no ho fihinanareo amin’ny biby rehetra ao anaty rano, na farihy na ranomasina na renirano: ny biby rehetra misy vombony sy kirany.

¹⁰Ho fady aminareo kosa izay tsy misy vombony sy kirany amin’ny zavamananaina rehetra mihetsiketsika anaty rano:

¹¹eny, ho fady aminareo ireny, ka aza haninareo ny henany ary fadio ny mikasika ny fatiny.

¹²Izay biby rehetra ao anaty rano, kanefa tsy misy vombony na kirany, dia ho fady aminareo.

¹³«Izao kosa no hofadînareo amin’ny vorona ka tsy hohaninareo: ny voromahery sy ankoay isan-karazany;

¹⁴ny fanindry sy papango isan-karazany;

¹⁵ny goaika isan-karazany;

¹⁶ny aostritsa, ny tararaka, ny vorondriaka, ny hitsikitsika isan-karazany,

¹⁷ny vorondolo, ny manarana, ny vorondolobe,

¹⁸ny gisabe, ny sama, ny arosy,

¹⁹ny vanobe, ny vano isan-karazany, ny takodara ary ny ramanavy.

²⁰«Ny bibikely rehetra manana elatra sady mandia tongotra efatra dia ho fady aminareo.

²¹Amin’ireo bibikely ireo anefa, dia ho azonareo hanina ihany izay manampingotra ambony faladiany hitsipitsipihany eo amin’ny tany;

²²ka ireto avy izany: ny valala fihinana, ny solama, ny hargôla ary ny hagaba samy isan-karazany avy[44].

²³Fa ny biby hafa manana elatra sady mandia tongotra efatra dia ho fady aminareo.

²⁴«Ireto biby hotanisaina manaraka ireto koa dia hahaloto anareo. Na zovy na zovy mikasika ny fatin’ireo, dia haloto mandra-paharivan’ny andro;

²⁵ary na zovy na zovy mitondra ny fatin’ireo, dia haloto koa mandra-paharivan’ny andro sady tsy mainty hanasa fitafiana.

²⁶Ireto avy àry no ho biby maloto aminareo: — ny biby rehetra tsy mba mivaky kitro ary ny biby rehetra tsy mba mandinika: na zovy na zovy mikasika azy, dia haloto. — ny biby rehetra mandia tongotra efatra sady mandeha amin’ny faladiany[45]: na zovy na zovy mikasika ny fatin’ireo, dia haloto mandra-paharivan’ny andro; ary na zovy na zovy mitondra ny fatin’ireo, dia haloto koa mandra-paharivan’ny andro sady tsy maintsy hanasa fitafiana.

²⁷

²⁸

²⁹«Amin’ny biby madinika mifanaretsaka ambonin’ny tany, dia ireto avy no ho maloto aminareo: ny kionkona, ny totozy, ny androngo isan-karazany

³⁰toy ny sitry na antsiantsy na matahotrandro na mosaraina, ary ny tana.

³¹Amin’ny biby madinika rehetra, dia ireo no ho maloto aminareo; ka na zovy na zovy mikasika ny fatin’ireo, dia haloto mandra-paharivan’ny andro.

³²Haloto avokoa, ny zavatra ilatsahan’ny fatiny, na fanaka hazo, na fitafiana, na hoditra, na lasàka, na inona na inona fitaovana ampiasaina; eny, haloto mandra-paharivan’ny andro izany, ary tsy maintsy asoka anaty rano vao hadio.

³³Raha siny tanimanga no sendra ilatsahana fatim-biby madinika, dia haloto avokoa ny zavatra ao anatin’io siny io, ka tsy maintsy hovakînareo ilay siny;

³⁴haloto koa ny zava-pihinana rehetra notapohana rano avy amin’io siny io. Haloto ihany koa ny zava-pisotro rehetra ilatsahan’ny fatin’ireo, na inona na inona fitaovana nisy azy.

³⁵Haloto avokoa ny fitaovana rehetra ilatsahan’ny fatin’ireo, na fanendasana izany na vilany mirakotra; ka tsy maintsy montsaninareo izany, satria haloto izy ka ho maloto aminareo.

³⁶Ny amin’ny loharano na lavaka fantsakana, sendra ilatsahana fatim-biby madinika kosa, dia hadio ihany ny rano fa izay hanala ilay fatim-biby no haloto.

³⁷Raha voa famafy no ilatsahan’ny fatim-biby, dia hadio ihany ny voa famafy;

³⁸fa raha voan-javatra hohanina ka nalona tamin’ny rano kosa no ilatsahany, dia haloto aminareo izany voan-javatra izany.

³⁹«Raha biby fihinan-kena no maty ho azy, izay mikasika ny fatiny dia haloto mandra-paharivan’ny andro;

⁴⁰izay mihinana amin’ny henany kosa dia haloto mandra-paharivan’ny andro sady tsy maintsy manasa fitafiana; ary izay hitondra ilay fatim-biby, dia haloto mandra-paharivan’ny andro ihany koa sady tsy maintsy manasa fitafiana.

⁴¹«Ny bibikely rehetra mifanaretsaka ambonin’ny tany dia ho fady aminareo ka tsy fihinana.

⁴²Aza misy haninareo ireny bibikely ireny, na ny mikisaka amin’ny kibony, na ny mandia tongotra efatra na mihoatra noho ny efatra, satria fady aminareo ireny.

⁴³Aoka tsy hanota fady na handoto tena amin’ireny bibikely rehetra ireny ianareo, fandrao hanjary maloto ianareo.

⁴⁴Fa Izaho no TOMPO Andriamanitrareo. Masina Aho ka mitandrema tena mba ho masina ianareo; ary aoka ny tenanareo tsy holotoinareo amin’izay bibikely mandady amin’ny tany.

⁴⁵Fa Izaho no TOMPO Izay nitondra anareo niakatra avy tany Ejipta mba ho Andriamanitrareo; ka dia ho masina ianareo, satria masina Aho[46].»

⁴⁶Ireo no fepetra momba ny biby sy ny vorona ary ny zavamananaina rehetra mihetsiketsika anaty rano na mifanaretsaka ambonin’ny tany;

⁴⁷ka hanavahanareo ny biby madio sy maloto ary ny biby izay fihinana sy izay tsy fihinana.