Read Dikateny Iombonana Eto Madagasikara Levitîka 19 Bible Online

Levitîka 19 - Dikateny Iombonana Eto Madagasikara bible

Levitîka 19

¹Dia niteny tamin’i Mosesy ny TOMPO

²mba hamepetra ny Fiangonana israelita tsivakivolo hoe: «Aoka ho masina ianareo satria masina Aho, ilay TOMPO Andriamanitrareo[81].

³«Samia manaja ny ray aman-dreninareo, ary tandremo ny sabata nodidiako hitsaharana[82]. Izaho no TOMPO Andriamanitrareo.

⁴«Aza mivily hanaraka ireo andriamani-tsiizy ary aza manao andriamanitra anidina ho anareo[83]. Izaho no TOMPO Andriamanitrareo.

⁵«Rehefa manolotra sorom-pihavanana amiko TOMPO ianareo, dia ataovy araka izay hahazoanareo sitraka amiko izany.

⁶Ny andro hamonoana ny sorona sy ny ampitson’iny no hihinananareo azy; fa izay sisa tratry ny andro fahatelo kosa dia hodorana.

⁷Raha mbola hanina amin’ny andro fahatelo izany, dia tsy hahazoana sitraka amiko satria hena tsy manan-kasina intsony.

⁸Izay mihinana azy amin’izany, dia itambesaran-keloka satria manamavo ny zavatra voatokana ho Ahy TOMPO; ka dia hofongorana tsy ho anisan’ny vahoaka israelita izany olona izany.

⁹«Rehefa mijinja ny vokatry ny tanimbarinareo ianareo, dia aza jinjana ny eny an-tsisiny; ary aza tsimponina ny salohim-bary natao hotsimponin’ny hafa amin’ny vokatrareo.

¹⁰Aza otazana koa ny sampaho tavela amin’ny voalobokareo, ary aza tsimponina ny voany latsaka amin’ny tany; fa avelao izany ho an’ny mahantra sy ny vahiny. Izaho no TOMPO Andriamanitrareo[84].

¹¹«Aza mangalatra, aza mandainga, ary aza mifamitaka ianareo[85].

¹²Aza mianiana amin’ny anarako mba hamitahana satria manala baràka ny anarako izany[86]. Izaho no TOMPO Andriamanitrareo.

¹³«Aza mamoritra ny namanareo hahazoana ny fananany, aza manendaka azy; ary aza tananao miloaka alina ny karaman’ny mpikaramanareo[87].

¹⁴Aza miteny ratsy ny marenina, ary aza manisy sakana hampianjera eo alohan’ny jamba[88]; izany no hanehoanareo fanajana Ahy Andriamanitrareo. Izaho no TOMPO.

¹⁵«Aza manao izay tsy marina amin’ny fitsarana: ny mahantra, aza ananana tombom-pitia; ny lehibe, aza ananana hena-maso; fa ara-drariny no aoka hitsaranareo ny mpiray firenena aminareo[89].

¹⁶Aza manely fanendrikendrehana olona eo amin’ny mpiray firenena aminareo. Aza mitsangan-ko vavolombelona mandainga mba hanamelohana ny namanareo ho faty. Izaho no TOMPO.

¹⁷«Aza mankahala ao am-ponareo ny mpiray firenena aminareo fa anaro tsara izy[90] mba tsy hahazoanareo heloka noho ny aminy.

¹⁸Aza mamaly ratsy na manao lolom-po amin’ny mpiray firenena aminao fa tiavo ny namanao tahaka ny itiavanao ny tenanao[91]. Izaho no TOMPO.

¹⁹«Tandremonareo koa ireto didiko ireto: «Aza avela hiray amin’ny hafa karazana noho izy ny biby fiompinao; aza fafazana voan-javatra roa karazana mifangaroharo ny tanimbolinao; ary aza mitondra fitafiana voatenona tamina kofehy roa karazana mifamahofaho[92].

²⁰«Raha misy lehilahy miray amina vehivavy mpanompo izay voafofon’olon-kafa ho vadiny, nefa mbola tsy voaavotra na voavotsotra ho olona afaka, dia handoa onitra izany lehilahy izany[93]; saingy tsy hohelohina ho faty izy roroa satria tsy olona afaka ravehivavy.

²¹Hisy koa sorom-panorenana amiko TOMPO hoentin-dralehilahy ho eo anoloan’ny varavaran’ny Tranolay fihaonana, dia ny ondrilahy anankiray fanao sorom-panonerana.

²²Io ondrilahy io no hanaovan’ny mpisorona ny fombam-pivavahana famelan-keloka ho azy eo anatrehako TOMPO noho ny fahotana nataony; dia havela izany fahotany izany.

²³«Rehefa tafiditra any amin’ilay tany ianareo ka mamboly hazo fihinam-boa isan-karazany, dia hataonareo ho maloto ny voany mandritra ny telo taona voalohany ka tsy hohanina.

²⁴Amin’ny taona fahefatra, dia hatokana ho Ahy avokoa ny voany mba ho fiderana Ahy TOMPO.

²⁵Fa amin’ny taona fahadimy vao hihinana ny voany ianareo. Raha izany no ataonareo, dia hitombo ny fahavokaran’ny hazo ho anareo. Izaho no TOMPO Andriamanitrareo.

²⁶«Aza eo amin’ny tany andrarahana ny ram-biby no ihinananareo ny henany; aza manao sikidy na fanandroana[94].

²⁷Aza hetezana atao vorivory ny sisim-bolon-dohanareo, ary aza haratana ny volon-tavanareo.

²⁸Aza ratraratraina ny tenanareo ho fisaonana ny maty[95], ary aza asiana tombokavatsa ny hoditrareo. Izaho no TOMPO.

²⁹«Aza manala baràka ny zanakavavinareo amin’ny fampijangajangana azy[96]; fandrao ny mponina eo amin’ny tany no hivarilavo amin’ny fijangajangana ka ho feno haratsiam-pitondrantena.

³⁰Tandremo ny sabata nodidiako hitsaharana ary hajao ny Toeramasina onenako[97]. Izaho no TOMPO.

³¹«Aza mivily hanaraka izay mpamoha angatra sy izay olona tsindrian-javatra[98]. Aza maka hevitra aminy fandrao voalotony ianareo. Izaho no TOMPO Andriamanitrareo.

³²«Mitsangàna ianao raha manoloana ny olona efa antitra ho fanomezam-boninahitra azy; izany no hanehoanao fanajana Ahy Andriamanitrao. Izaho no TOMPO.

³³«Rehefa misy vahiny hiorim-ponenana eo amin’ny taninareo, dia aza mampahory azy.

³⁴Ataovy tahaka ny anankiray aminareo tompontany ihany no fitondra ny vahiny valovotaka eo aminareo; fa efa mba vahiny tany Ejipta ianareo[99]. Izaho no TOMPO Andriamanitrareo.

³⁵«Aza manao izay tsy marina eo amin’ny lamina voarindra momba ny refy sy lanja ary fatra.

³⁶Mizàna marina sy vatomizana marina ary famarana marina no tano[100]. Izaho no TOMPO Andriamanitrareo, Izay namoaka anareo hiala tany Ejipta.

³⁷«Imasoy hotanterahinareo ny lalànako amam-pitsipiko rehetra. Izaho no TOMPO.»