Read Dikateny Iombonana Eto Madagasikara Levitîka 21 Bible Online

Levitîka 21 - Dikateny Iombonana Eto Madagasikara bible

Levitîka 21

¹Dia niteny tamin’i Mosesy ny TOMPO mba hamepetra ny mpisorona, zanakalahin’i Aharôna hoe: «Aoka ny mpisorona tsy handoto tena amin’ny fikasihana ny fatin’olona anisan’ny fianakaviany,

²afa-tsy hoe havany akaiky dia akaiky, tahaka ny reniny sy ny rainy ary ireo zanany sy ny rahalahiny.

³Ny amin’ny anabaviny, izay mpitovo ka mbola havany akaiky tokoa satria tsy mba nanambady, dia mahazo mandoto tena ny mpisorona amin’ny fikasihana ny fatiny.

⁴Noho izy loham-pianakaviany, dia aoka ny mpisorona tsy handoto tena amin’ny fikasihana faty hafa[114], satria manala baràka azy izany.

⁵«Rehefa misaona izy mpisorona, dia tsy hanasola ny tampon-dohany na hanàratra ny volon-tavany na handradratra ny tenany[115].

⁶Voatokana hanompo Ahy izy, ka tsy hanala baràka ny anarako, satria izy no mpanolotra ny sorona levonina amin’ny afo, dia ny sakafo aroso ho Ahy TOMPO Andriamaniny; noho izany, tokony hitandro ny maha olona voatokana azy ny mpisorona.

⁷«Aoka ny mpisorona tsy hanambady vehivavy mpijangajanga na novetaina na efa nariam-badiny, noho izy voatokana hanompo Ahy.

⁸Ianareo Israelita kosa dia aoka hihevitra ny mpisorona ho olona voatokana, satria ny sakafo aroso ho Ahy Andriamanitrareo no atolony. Eny, aminareo ny mpisorona dia ho olona voatokana; satria Izaho TOMPO, Izay nanokana anareo Israelita ho vahoakako, dia masina.

⁹«Raha ny zanakavavin’ny mpisorona no manala baràka tena amin’ny fijangajangana, dia manala baràka ny rainy koa izy, ka hodorana.

¹⁰«Ny mpisorombe no filohan’ireo mpisorona rahalahiny. Nandrarahana ny menaka fanosorana teo an-dohany izy ka manan-jo hitafy ny fanamiana masina. Noho izany, rehefa misaona izy, dia aoka tsy hirakaraka volo na handriatra ny fitafiany[116],

¹¹na hiditra am-paty akory; tsy tokony handoto tena izy na dia amin’ny fahafatesan’ny ray aman-dreniny aza.

¹²Noho izany, rehefa misaona izy, dia aoka tsy hiala ny faritra masina, fandao hanazimba ny Toeramasina onenako; satria ny menaka nahosotro azy no efa nanokanako azy hanompo Ahy. Izaho no TOMPO.

¹³«Aoka ho vehivavy virijiny no halain’ny mpisorombe ho vady.

¹⁴Ny vehivavy maty vady, na nariam-bady, na novetaina, na mpijangajanga, dia tsy azony alaina ho vady; fa vehivavy virijiny, anisan’ny fianakavia-mpisorona, no halain’ny mpisorombe.

¹⁵Amin’izay, dia tsy ho afa-baràka ny ankohonany eo anivon’ny fianakaviamben’ny mpisorona, Satria Izaho no TOMPO Izay efa nanokana ny mpisorombe hanompo Ahy.»

¹⁶Dia niteny tamin’i Mosesy ny TOMPO

¹⁷mba hamepetra an’i Aharôna hoe: «Hatrany hatrany, izay taranakao misy kilema dia aoka tsy hanatona ny alitara hanolotra ny sakafo aroso ho Ahy Andriamaniny.

¹⁸Izay mpisorona misy kilema dia tsy mahazo manatona ny alitara hanao izany, na ny jamba, na ny mandringa, na ny manan-tarehy sampona,

¹⁹na ny tapa-tongotra, na ny tapa-tanana,

²⁰na ny vokoka na ny saozanina, na ny voan’aretin-koditra, na ny torotoro vihindahy.

²¹Izay mpisorona rehetra misy kilema, amin’ny taranakao, dia tsy mahazo manatona ny alitara mba hanolotra ho AHY ny sorona levonina amin’ny afo; noho izy misy kilema no tsy ahazoany manatona ny alitara hanolotra ny sakafo aroso ho Ahy Andriamaniny.

²²Azony ihinanana ihany anefa ny zavatra atao sorona amiko, na ny zavatra masina dia masina na ny zavatra masina.

²³Kanefa noho izy misy kilema, dia tsy mahazo mankeo amin’ny efitra lamba izy na manatona ny alitara; tsy tokony handoto ny Toeramasina onenako izy[117], satria Izaho TOMPO efa nanokana ny mpisorona hanompo Ahy.»

²⁴Dia nampitain’i Mosesy tamin’i Aharôna sy ny zanany ary tamin’ny Israelita rehetra koa izany.