Read Dikateny Iombonana Eto Madagasikara Levitîka 26 Bible Online

Levitîka 26 - Dikateny Iombonana Eto Madagasikara bible

Levitîka 26

¹«Aza manao andriamani-tsiizy, aza manangana sarin-tsampy voasokitra na manao tsangambaton-tsampy, aza manorina vato voaravaka hiankohofana eo amin’ny taninareo[147]; fa Izaho no TOMPO Andriamanitrareo.

²«Tandremo ny sabata nodidiako hitsaharana ary hajao ny Toeramasina onenako. Izaho no TOMPO.

³«Raha manaraka ny lalànako ianareo ka imasoanareo hotanterahina ny didiko,

⁴dia homeko ny ranonorana sahaza anareo amin’ny fotoanandrony mba hahavokaran’ny tany ary hamoazan’ny hazo eny an-tsaha.

⁵Ho tratry ny fiotazam-boaloboka ny fivelezam-bary eo aminareo, ary ho tratry ny famafazana ny fiotazam-boaloboka; dia hihinana ianareo ka ho voky, ary handry feizay eo amin’ny taninareo[148].

⁶Hasiako fiadanana eo amin’ny tany, ka handry tsy hisy hanaitra ianareo; fa hofongorako ny biby masiaka eo amin’ny tany, ary tsy mba handalovan’ady intsony izy.

⁷Hataonareo mandositra ny fahavalonareo ka ho lavon-tsabatra eo anoloanareo;

⁸hampandositra zato ny dimy aminareo ary hampandositra iray alina ny zato aminareo ka ho lavon-tsabatra eo anoloanareo ireny.

⁹Hijery anareo am-pitiavana Aho ka hahamaro ny taranakareo sy hampitombo anareo ary hitazona ny fanekempihavanako aminareo.

¹⁰Ho be ny vokatra miakatra ka haharitra hihinananareo ny vokatra tranainy ary hisy sisa hatao varo-boba fotsiny aza mba hasiana ny vao.

¹¹Hiorim-ponenana eo afovoanareo Aho ary tsy ho tofoka aminareo.

¹²Handeha miaraka aminareo Aho, ka Izaho ho Andriamanitrareo ary ianareo ho vahoakako[149].

¹³Izaho no TOMPO Andriamanitrareo, Ilay namoaka anareo hiala tany Ejipta mba tsy hanandevozany anareo intsony; notapahiko ny zioga izay teo aminareo mba hitrakanareo fandeha.

¹⁴«Fa raha tàhiny tsy henoinareo kosa Aho, ka tsy tanterahinareo ireo didy rehetra ireo,

¹⁵raha hamavoinareo ny lalànako na halanareo ny fitsipiko, ka tsy tanterahinareo ny didiko rehetra fa ivadihanareo ny fanekempihavanako taminareo,

¹⁶dia izao no hataoko anareo: loza mampivarahontsana no halefako hamelezana anareo, dia areti-mahasaozanina sy tazo mahery izay mahalali-maso sy mandreraka aina anareo; ary hafafinareo foana ny voa famafinareo, fa ny fahavalonareo no hihinana azy.

¹⁷Dia hohandriniko ianareo ka ho resy eo anoloan’ny fahavalonareo; ireo mpankahala anareo no hanapaka anareo; ary handositra ianareo, na dia tsy misy mpanenjika aza.

¹⁸«Raha amin’izany no tsy henoinareo ihany Aho, dia mbola hofaiziko impito henin’izany ianareo noho ny fahotanareo.

¹⁹Horavako ny hery ireharehanareo, ka ny lanitra tandrifinareo hataoko mafy toy ny vy ary ny tany volenareo hataoko mafy toy ny varahina.

²⁰Ho lany foana ny herinareo, fa tsy hahavokatra ny tany volenareo ary tsy hamoa ny hazo.

²¹«Raha mbola toherinareo ihany Aho ka tsy henoinareo, dia hokapohiko impito henin’izany koa ianareo araka ny fahotanareo.

²²Halefako hamely anareo ny bibidia, ka hamono ny zanakareo sy handringana ny biby fiompinareo; ary hahavitsy isa anareo ireny ka ho tonga taniefitra ny lalambenareo.

²³«Raha amin’izany no tsy raisinareo ny anatro fa mbola toherinareo ihany Aho,

²⁴dia Izaho mihitsy kosa no hamely anareo ka hokapohiko impito henin’izany ianareo noho ny fahotanareo.

²⁵Ady no harongatro hamelezana anareo, ho sazin’ny nivadihanareo ny fanekempihavanako. Ary rehefa tafangona hialoka ao anaty tanànanareo ianareo, dia handefasako areti-mandringana eo aminareo[150] ary ho voatolotra eo an-tanan’ny fahavalo ianareo.

²⁶Hotapahiko ny vary tohan’ainareo, ka lafaoro anankiray fanendasa-mofo ihany no hanendasan’ny vehivavy folo ny mofonareo; ary an-danjany kely dia kely no hizaràny azy, ka hihinana ianareo fa tsy ho voky.

²⁷«Raha amin’izany no tsy henoinareo indray Aho fa mbola toherinareo ihany,

²⁸dia hamely anareo amin’ny fahatezerako Aho; ka Izaho mihitsy no hitondra famaizana impito henin’izany noho ny fahotanareo.

²⁹Ho mosarena ianareo ka hihinana ny nofon-janakalahy aman-janakavavinareo.

³⁰Haharikoriko Ahy ianareo, ka horavako ny toerana anajànareo sampy, hazerako ny tsangambato anompoanareo ny masoandro, ary ny fatinareo hampifanongoaviko eo ambonin’ny sampy rava.

³¹Horavako ny tanànanareo, ka hataoko tonga lao ny trano fivavahanareo, ary tsy hankasitrahiko velively ny hanitry ny soronareo.

³²Hataoko tonga lao ny taninareo ka ho talanjon’izany ireo fahavalonareo, dia ireo fahavalo hiorim-ponenana ao.

³³Ianareo kosa, ady no hapoakako hamelezana anareo ka haeliko any amin’ny firenen-kafa ianareo; dia ho lao ny taninareo ary ho rava ny tanànanareo.

³⁴«Amin’izany ny taninareo hahazo fitsaharana mandritra ny taona rehetra hahafoana azy rehefa any amin’ny tanin’ny fahavalonareo any ianareo; amin’izay tokoa ny taninareo no hiala sasatra ka hahazo fitsaharana[151].

³⁵Eny, mandritra ny taona rehetra hahafoana azy, dia hiala sasatra izy mba ho solon’izay fitsaharana tsy azony, fony ianareo mbola nonina teo aminy.

³⁶«Izay sisa velona aminareo, any amin’ny tanin’ny fahavalony any, dia hampidirako fahareraham-po ka na ny fipikan’ny ravinkazo anankiray paohin-drivotra aza dia hampandositra azy; handositra ireo toy ny mandositra fahavalo mitan-tsabatra, ary ho lavo ireo na dia tsy misy mpanenjika aza.

³⁷Ho lavo mifanindry ireo toy ny rehefa mandositra fahavalo mitan-tsabatra, na dia tsy misy mpanenjika aza, koa tsy hahatoha ny fahavalony akory.

³⁸Ho lany ringana any amin’ny firenen-kafa ireo, ka ho lanin’ny tanin’ny fahavalony ihany.

³⁹Noho ny heloka vitany sy ny heloka vitan’ny razany, ireo sisa velona aminareo dia ho levona any amin’ny tanin’ny fahavalony any.

⁴⁰«Kanefa ireo sisa velona aminareo kosa hiaiky ny heloka vitany sy ny heloka vitan’ny razany, dia ny fahadisoana nataony tamiko; eny, hiaiky ireo fa noho ny fanoherany Ahy

⁴¹no nanoherako azy sy nandefasako azy ho any amin’ny tanin’ny fahavalony. Noho ny fony tsy voatokana ho Ahy, dia hietry tena ireo ka hanefa ny sazin’ny heloka nataony.

⁴²Amin’izay no hahatsiarovako ny fanekempihavanako tamin-dry i Jakôba sy i Itsehàka ary i Abrahama razambeny sady hahatsiarovako ny fampanantenana momba ilay taniny[152].

⁴³Ilay tany, izay nilaozan’ireo Israelita, dia hahazo fitsaharana mandritra ny fotoana hahafoana azy; fa hanefa ny sazin’ny heloka vitany kosa ireo Israelita, satria nandà ny fitsipiko ary nankahala ny lalànako.

⁴⁴Kanefa, na amin’izany fotoana itoerany any amin’ny tanin’ny fahavalony any izany aza, dia tsy holaviko tanteraka izy ary tsy ho halako hataoko lany ringana na ho halako hanapahako ny fanekempihavanako taminy, satria Izaho no TOMPO Andriamaniny.

⁴⁵Eny, hotsarovako hanasoavana azy ny fanekempihavanana nataoko tamin’ny razany, izay navoakako hiala tany Ejipta teo imason’ny firenen-kafa mba hahatonga Ahy ho Andriamaniny. Izaho no TOMPO.»

⁴⁶Ireo no lalàna sy fitsipika ary fampianarana izay ifampitondran’ny TOMPO amin’ny Israelita, ka nomen’ny TOMPO azy tamin’ny alalan’i Mosesy tany an-tendrombohitra Sinay.