Read Dikateny Iombonana Eto Madagasikara Levitîka 7 Bible Online

Levitîka 7 - Dikateny Iombonana Eto Madagasikara bible

Levitîka 7

¹«Izao no lalàna momba ny sorom-panonerana: «Zava-masina dia masina izany,

²ka eo amin’ny toerana famonoana ny sorona dorana manontolo no hamonoana ny sorom-panonerana; ary ny ra dia hatopiny manodidina amin’ny lafin’ny alitara.

³Hatolotra avokoa ny tavin-kena rehetra: dia ny hofany[21], ny safodrorohany sy ny jaboran-tsinainy,

⁴ny voany roa mbamin’ny jabora izay miraikitra amin’ny voany sy amin’ny takibany, ary koa ny ila-atiny izay hatao indray manala amin’ny voany.

⁵Hodoran’ny mpisorona hanetona eo ambonin’ny alitara ireo, ho sorona levonina amin’ny afo ho an’ny TOMPO: sorom-panonerana izany.

⁶Ny lehilahy rehetra anisan’ny mpisorona no mahazo mihinana ny hena; eo amina faritra voatokana no hihinanany azy, satria zava-masina dia masina izany.

⁷Sahala amin’ny sorona fanalana ny ota ihany ny sorom-panonerana, ka lalàna iray no ho amin’izy roa: ho an’ilay mpisorona manao ny fombam-pivavahana famelan-keloka ny henan-tsorona.

⁸«Raha misy sorona dorana manontolo aterin’olona, dia hahazo ny hoditr’izany ilay mpisorona manolotra azy.

⁹Ny fanatitra masaka rehetra, nendasina tamin’ny lafaoro na tamin’ny lapoaly na tamin’ny takela-by, dia an’ilay mpisorona manolotra azy.

¹⁰Ny fanatitra tsy masaka rehetra kosa, na miharo menaka na maina, dia zaraina[22] mitovy amin’ny taranak’i Aharôna rehetra.

¹¹«Izao no lalàna momba ny sorom-pihavanana izay haterina amin’ny TOMPO:

¹²«Raha misy olona manatitra sorom-pihavanana mba ho fisaorana an’Andriamanitra[23], dia ireto zavatra ireto no hateriny ho fanampiny: mofo vaventy tsy misy leviora sady miharo menaka, mofo fisaka tsy misy leviora sady voahoso-menaka; ary mofo atao amin’ny koba lafarinina miharo menaka.

¹³Ankoatra ireo mofo tsy misy leviora ireo, dia hanatitra mofo misy leviora koa izy ho fanampin’ilay sorom-pihavanana atao ho fisaorana an’Andriamanitra.

¹⁴Samy hangalana anankiray avy ireo fanatitra isan-karazany ireo hasandratra ho an’ny TOMPO; fa ny mofo sisa kosa dia ho an’ilay mpisorona mamafy ny ran’ny sorom-pihavanana.

¹⁵Ny henan’ny sorom-pihavanana atao ho fisaorana an’Andriamanitra dia hohanina amin’ny andro anaterana azy, fa tsy hisy havela ho tra-maraina.

¹⁶«Raha misy olona manatitra sorom-pihavanana fanalam-boady na an-tsitrapo, dia amin’ny andro anaterana azy no ihinanana ampahan’ny hena; izay ambiny kosa azo hanina ampitson’iny,

¹⁷fa ny sisa tavela dia hodorana amin’ny andro fahatelo.

¹⁸Raha tàhiny hihinanana amin’ny andro fahatelo izany henan’ny sorom-pihavanana izany, dia tsy hahazo sitraka amin’Andriamanitra ny mpanatitra azy; hoheverina ho tsinontsinona izany sorom-pihavanana izany, satria ny henany efa nanjary tsy azo ampiasaina amin’ny fombam-pivavahana intsony. Izay olona mihinana amin’izany dia itambesaran-keloka.

¹⁹Raha nikasika zava-maloto ara-pivavahana koa izany henan’ny sorom-pihavanana izany, dia tsy tokony hohanina fa hodorana. «Ny amin’ny henan’ny sorom-pihavanana dia izay olona madio rehetra no mahazo mihinana azy;

²⁰fa ny olona misy fahalotoana ara-pivavahana[24], kanefa mihinana hena ambin’ilay sorom-pihavanana voatokana ho an’ny TOMPO, dia hofongorana tsy ho anisan’ny vahoaka israelita.

²¹Ary izay nahakasika fahalotoana ara-pivavahana, na olona maloto na biby maloto na zavatra hafa maloto, kanefa mihinana amin’izany hena izany, dia hofongorana tsy ho anisan’ny vahoaka israelita.»

²²Dia niteny tamin’i Mosesy ny TOMPO

²³mba hamepetra ny Israelita hoe: «Aza misy hanina ny tavin-kenan’ireo biby fanao sorona, na ny an’ny omby, na ny an’ny ondry, na ny an’ny osy.

²⁴Ny tavin-kenan’ny biby maty ho azy na voaviraviram-bibidia kosa dia azo anaovan-javatra hafa ihany, saingy tsy azonareo hanina velively.

²⁵Fa izay rehetra mihinana ny tavin-kenam-biby, natao hatolotra ho sorona levonina amin’ny afo ho an’ny TOMPO, dia hofongorana tsy ho anisan’ny vahoaka israelita.

²⁶Aza mihinana ram-borona na ram-biby ianareo, na aiza na aiza hitoeranareo.

²⁷Izay rehetra mihinana ra dia hofongorana koa tsy ho anisan’ny vahoaka israelita[25].»

²⁸Dia niteny tamin’i Mosesy indray ny TOMPO

²⁹mba hamepetra ny Israelita hoe: «Izay manatitra sorom-pihavanana amin’ny TOMPO dia hitondra ny ampahany voatokana ho an’ny TOMPO avy amin’izany sorom-pihavanana izany.

³⁰Ny tanany ihany no hitondra ny zavatra holevonina amin’ny afo ho an’ny TOMPO, dia ny tavin-kenan’ilay biby mbamin’ny tratrany; ka io tratrany io dia hahevaheva eo anatrehan’ny TOMPO no fomba fanolotra azy.

³¹Hodoran’ny mpisorona hanetona eo ambonin’ny alitara ny tavin-kena; fa ny tratrany kosa dia ho an’i Aharôna sy ireo taranany.

³²Halainareo avy amin’ilay biby sorom-pihavanana kosa ny feny ankavanana, ka homenareo ny mpisorona:

³³io feny ankavanana io dia ho anjaran’izay iray amin’ny taranak’i Aharôna hanolotra ny ra aman-tavin-kenan’ny sorom-pihavanana,

³⁴satria alain’ny TOMPO avy amin’ny sorom-pihavanan’ny Israelita ny tratrany nahevaheva sy ny feny navahana, ka nomeny an’i Aharôna sy ireo taranany, mba ho anjara raikitra ho azy hatrany hatrany avy amin’ny Israelita.»

³⁵Ireny zavatra navahana avy amin’ny sorona nolevonina tamin’ny afo mba ho an’ny TOMPO ireny no anjaran’i Aharôna sy ireo taranany amin’ny maha mpisorona azy, manomboka amin’ny andro nametrahana azy hanao ny fanompoana maha mpisorona eo anatrehan’ny TOMPO.

³⁶Nodidian’ny TOMPO mihitsy izany mba homen’ny Israelita azy ireo, manomboka amin’ny andro nanokanana azy ho mpisorona.

³⁷Izany sy izany no lalàna momba ny sorona dorana manontolo, ny fanatitra vokatry ny tany, ny sorona fanalana ny ota, ny sorom-panonerana, ny sorona fanokanana, ary ny sorom-pihavanana.

³⁸Nandidian’ny TOMPO an’i Mosesy teo an-tendrombohitra Sinay tany an-taniefitra ireny, dia tamin’ny andro nandidian’ny TOMPO hanateran’ny Israelita sorona aminy.