Read Dikateny Iombonana Eto Madagasikara Jeremià 28 Bible Online

Jeremià 28 - Dikateny Iombonana Eto Madagasikara bible

Jeremià 28

¹Tamin’iny taona iny ihany, izany hoe ny taona fahefatra nanjakàn’i Tsedekià mpanjakan’i Joda, andro iray tamin’ny volana fahadimy[142], dia nankao an-tranon’ny TOMPO i Hananià mpaminany, zanakalahin’i Hazora sady avy any Gibehôna. Niteny tamin’i Jeremià teo imason’ny mpisorona sy ny vahoaka rehetra teo izy, ka nanao hoe:

²— Izao no lazain’ny TOMPOn’izao rehetra izao sady Andriamanitr’i Israely: «Hopotehiko ny ziogam-pamoretana angejan’ny mpanjakan’i Babilôna anareo.

³Ka alohan’ny roa taona manomboka androany, dia haveriko eto ireo fanaka rehetra tato an-tranoko, fanaka izay nalain’i Nebokadnetsara mpanjaka ka nentiny tany Babilôna.

⁴Haveriko eto koa i Jekonià, zanakalahin’i Jôiakima sady mpanjakan’i Joda, mbamin’ny Jodeanina rehetra izay nentina ho babo tany Babilôna, hoy ny teny hentitra avy amiko TOMPO. Eny, hopotehiko ny ziogam-pamoretana angejan’ny mpanjakan’i Babilôna anareo».

⁵Fa namaly an’i Hananià mpaminany i Jeremià teo imason’ny mpisorona sy ny vahoaka rehetra izay tao an-tranon’ny TOMPO

⁶ka nanao hoe: — Eny, enga tokoa anie mba ho araka izay nolazainao no hataon’ny TOMPO! Hotanterahiny anie izay nambaranao ka haveriny avy any Babilôna hanketo indray ireo fanaka rehetra tao an-tranon’ny TOMPO miaraka amin’ny babo rehetra!

⁷Kanefa henoy tsara izao teny ataoko renao sy ren’ny vahoaka rehetra eto izao:

⁸Efa nisy tokoa mpaminany hatry ny ela talohanao sy talohako. Ireny mpaminany ireny dia manambara hafatra tamin’ireo tany matanjaka sy fanjakana malaza; nefa ady sy loza ary areti-mandringana no nambarany mazàna.

⁹Fa raha misy mpaminany iray milaza fahasambarana, ny ahalalana fa nirahin’ny TOMPO tokoa izy dia rehefa tanteraka izay nolazainy.

¹⁰Dia nesorin’i Hananià mpaminany ny zioga teo an-tsorok’i Jeremià mpaminany, ka nopotehiny.

¹¹Avy eo dia hoy i Hananià teo imason’ny vahoaka rehetra teo: «Izao no lazain’ny TOMPO: ‹Alohan’ny roa taona androany, dia hopotehiko tahaka izao ny ziogam-pamoretana angejan’i Nebokadnetsara mpanjakan’i Babilôna ny firenena rehetra.› » Dia lasa nandeha tamin’ny diany i Jeremià mpaminany.

¹²Saingy taorian’ny nanapotehan’i Hananià mpaminany ny zioga izay nolanjain’i Jeremià teo an-tsorony, dia nisy baikon’ny TOMPO tamin’i Jeremià nanao hoe:

¹³— Ndeha lazao amin’i Hananià izao hafatry ny TOMPO izao: «Satria nopotehinao ilay zioga hazo teo, dia zioga vy no hasolonao azy.»

¹⁴Sady nampian’i Jeremià hoe: — Izao manko no lazain’ny TOMPOn’izao rehetra izao sady Andriamanitr’i Israely: «Zioga vy no apetrako eny an-tsoroky ny firenena rehetra amin’ity faritany ity, ka hanompo an’i Nebokadnetsara mpanjakan’i Babilôna izy; eny, na dia ny bibidia aza dia hampanekeko azy koa.»

¹⁵Avy eo dia hoy koa i Jeremià tamin’i Hananià mpaminany: — Henoy tsara aho, ry Hananià: Tsy naniraka anao ny TOMPO, fa ianao no nanosika ity vahoaka ity hiantehitra amin’ny lainga.

¹⁶Koa lazain’ny TOMPO fa hoesoriny tsy ho eto ambonin’ny tany ianao; alohan’ny faran’ity taona ity, dia ho faty ianao satria nanosika ity firenena ity hikomy amin’ny TOMPO.

¹⁷Dia maty tamin’ny volana fahafito tamin’iny taona iny tokoa i Hananià mpaminany[143].