Read Dikateny Iombonana Eto Madagasikara Jeremià 37 Bible Online

Jeremià 37 - Dikateny Iombonana Eto Madagasikara bible

Jeremià 37

¹Ary i Nebokadnetsara mpanjakan’i Babilôna nampanjaka an’i Tsedekià, zanakalahin’i Josià tao Joda mba hisolo an’i Kônià[191], zanakalahin’i Jôiakima.

²Kanefa, na i Tsedekià na ireo tandapany na ireo vahoakan’i Joda, dia samy tsy nihaino ny fampitandremana izay nampitain’ny TOMPO tamin’ny alalan’i Jeremià mpaminany.

³I Tsedekià mpanjaka kosa dia naniraka an’i Jokaly, zanakalahin’i Selemià ary koa i Tsefanià mpisorona, zanakalahin’i Mahaseià ho any amin’i Jeremià mpaminany ihany hanao aminy hoe: — Miangavy anao aho mba hivavaka ho anay amin’ny TOMPO Andriamanitsika.

⁴Tamin’izay fotoana izay dia tsy mbola voatana an-tranomaizina i Jeremià, ka afaka nivezivezy malalaka.

⁵Ny tafiky ny Farao dia efa niainga avy tany Ejipta rahateo; koa raha nandre izany ny Babilônianina, izay teo am-panaovana fahirano an’i Jerosalema, dia nihataka kely niala an’i Jerosalema.

⁶Ary nisy tenin’ny TOMPO ho an’i Jeremià mpaminany manao hoe:

⁷«Izao no lazain’ny TOMPO Andriamanitr’i Israely: ‹Ny mpanjakan’i Joda izay naniraka anareo hanontany Ahy dia ilazao hoe: Ny tafiky ny Farao, izay efa niainga mba hamonjy anareo, dia niverina ilalana ka nody any Ejipta.

⁸Ho avy indray kosa ny Babilônianina hanafika ity tanàna ity ka hahazo azy sady handoro azy amin’ny afo.

⁹Ary izao koa no lazaiko aminareo: Aza mamita-tena foana ka hihevitra fa lasa tanteraka ny Babilônianina, satria tsy nandeha velively ireo!

¹⁰Ary na dia ho resinareo aza ny tafika babilônianina manontolo izay miady aminareo, ka tsy misy tavela afa-tsy olona maratra, dia mbola hitsangana tsirairay avy ao an-dainy ireny ka ho avy handoro ity tanàna ity amin’ny afo.› »

¹¹Fa raha mbola nihataka an’i Jerosalema ny tafika babilônianina mba hidify ny tafiky ny Farao,

¹²dia nivoaka ny tanàna i Jeremià hankany amin’ny faritanin’i Benjamîna mba handray anjara amin’ny fizaràn-tany[192] ataon’ny fianakaviany.

¹³Kanjo raha vao nandalo teo am-bavahadin’i Benjamîna[193] izy, dia nifanehatra tamin’ny lehiben’ny mpiambina atao hoe Jirià, zanakalahin’i Selemià sady zafikelin’i Hananià. Ary nosamborin’i Jirià i Jeremià mpaminany ka nataony hoe: — Miandany amin’ny Babilônianina ianao.

¹⁴Fa novalian’i Jeremià hoe: — Lainga izany, tsy miandany amin’ny Babilônianina aho. Nefa tsy nino izany i Jirià fa nisambotra an’i Jeremià ary nitondra azy ho any amin’ny lehibeny.

¹⁵Tezitra tamin’i Jeremià kosa ireto ka nikapoka azy sady nanagadra azy tao an-tranon’i Jônatàna mpitantsora-panjakana.

¹⁶Ary naiditra tao amin’ilay efitra miendrika an-dohalambo i Jeremià. Efa ela nitoerana tao amin’io tranomaizina io Jeremià

¹⁷no nanirahan’i Tsedekià olona haka azy mba hanontaniany mangina tao an-dapany hoe: — Moa misy hafatry ny TOMPO tokoa va ho ahy? Ka novalian’i Jeremià hoe: — Eny, dia inty: «Hatolotra eo an-tanan’ny mpanjakan’i Babilôna ianao.»

¹⁸Ary hoy koa i Jeremià tamin’i Tsedekià mpanjaka: — Inona no heloka nataoko taminao na tamin’ny manamboninahitrao na tamin’ny mponina eto amin’ity tanàna ity no dia nataonareo an-tranomaizina aho?

¹⁹Ary nankaiza ireo mpaminany izay naminany teo aminareo fa tsy ho tonga hanafika anareo na ity tanàna ity ny mpanjakan’i Babilôna?

²⁰Dia nampian’i Jeremià hoe: — Ankehitriny, ry andriamanjaka, miangavy anao aho mba hihaino ny fangatahana ataoko eo anatrehanao: Aza averina any an-tranon’i Jônatàna mpitantsora-panjakana intsony aho, fandrao maty ao.

²¹Dia nanome baiko i Tsedekià mpanjaka mba hapetraka eo an-kianjan’ny trano fiambenana i Jeremià sady homena mofo boribory iray isan’andro avy ao amin’ny lalankelin’ny Mpanao mofo mandra-pahalanin’ny mofo rehetra ao an-tanàna. Toy izany no nijanonan’i Jeremià tao an-kianjan’ny trano fiambenana.