Read Dikateny Iombonana Eto Madagasikara Jeremià 50 Bible Online

Jeremià 50 - Dikateny Iombonana Eto Madagasikara bible

Jeremià 50

¹Hafatra nataon’ny TOMPO tamin’ny alalan’i Jeremià mpaminany ho an’i Babilôna sy i Babilônia[253].

²Ambarao amin’ny firenena ny vaovao, ampahafantaro amin’ny alalan’ny famantarana, ampahafantaro fa aza afenina ary lazao hoe: Azo i Babilôna, henatra moa izao ho an’ny sampiny ary haketrahana ho an’ireo andriamani-tsiiziny! Henatra moa izao ny an’i Bela, ary haketrahana ho an’i Merôdàky[254].

³Fa misy firenena iray avy any avaratra miakatra hamely an’i Babilôna[255], ka hanova ny taniny ho lao tsy hisy mponina intsony; fa na olona na biby fiompy dia samy lasa nitsoaka avokoa.

⁴Amin’izany andro sy fotoana izany, hoy ny teny hentitry ny TOMPO, dia hiara-tonga ny Israelita sy ny Jodeanina, ka sady mitomany izy no mandeha hitady Ahy TOMPO Andriamaniny.

⁵Hanontany ny lalana mankany Tsiôna ireo, ka himasoany hizorana izany. Ho avy izy ka fanekempihavanana mandrakizay izay tsy hohadinoiny na oviana na oviana no hifamatorany mafy amiko TOMPO.

⁶Andian’ondry very ny vahoakako fa ny mpiandriny no nandiso lalana azy, ka nampirenireny azy teny an-tendrombohitra. Nifindrafindra tendrombohitra sy havoana izy ka nanadino ny vala fandriany[256].

⁷Izay fahavalo rehetra nahita azy dia nandripaka azy avokoa sady nanao hoe: «Tsy misy mahadiso antsika izao, satria ireo no meloka eo anatrehan’ny TOMPO izay fonenam-pamonjena sy fanantenan-drazany.»

⁸Hoy ny Tompo: «Mandosira lavitra an’i Babilôna[257], ilaozy i Babilônia ka manaova hitsin-dalana toy ny osilahy mialoha ny ondry aman’osy.

⁹Fa firenena lehibe manao andiany no hotairiko sy halefako hanafika an’i Babilôna. Ho tonga avy any avaratra ireny ka hilahatra hiady aminy sy hahazo azy. Tsy hivena mihitsy ny zana-tsipîkany fa ho toy ny miaramila zatra ady ka tsy hiverim-potsiny.

¹⁰Horobaina ny tanin’ny Babilônianina ary ho afa-po ireo rehetra mandroba azy, hoy ny teny hentitra avy amiko TOMPO.

¹¹Mahazo mifaly sy miravo ianareo izao, ry mpamotika ny fananako[258]! Mahazo mifalihavanja ianareo toy ny vantotr’ombivavy eny amin’ny ahi-maitso sy afa-mikiaka toy ny soavaly mpihazakazaka.

¹²Nefa mba jereo ange ity tanindrazanareo: tafalatsaka lalina anaty henatra, tototry ny fahafaham-baràka. Indro izy nanjary farany amin’ny firenena, lasa taniefitra sy tany hay ary tanety ngazana.»

¹³Ny fahaviniran’ny TOMPO no nahatonga an’i Babilôna tsy honenana intsony fa hampahonena tanteraka. Ho gaga izay rehetra mandalo azy, ka hivarahontsana noho ny voina rehetra nanjo azy.

¹⁴Ianareo rehetra mpitifitra amin’ny tsipîka, milahara manodidina an’i Babilôna. Amelezo azy ny zana-tsipîkanareo ka aza tsitsîna mihitsy satria meloka eo anatrehan’ny TOMPO izy.

¹⁵Manaova akoran’ady manodidina mba hampikoizana azy. Indro fa nitolo-batana izy! Rava ny tilikambom-piarovany ary nianjera ny mandany. Izany no famalian’ny TOMPO! Koa valionareo i Babilôna; araka ny nataony tamin’ny hafa no mba ataovinareo aminy koa.

¹⁶Foany ao Babilôna ireo mpamafiny sy ireo mpijinjany amin’ny fararano; manoloana ny ady mahatsiravina, dia aoka samy hody any amin’ny fireneny avy izy ary samy handositra any amin’ny taniny avy!

¹⁷I Israely dia toy ny ondry very izay nenjehin’ny liona. Ny mpanjakan’i Asiria no voalohany nihinana taminy; avy eo dia tonga i Nebokadnetsara mpanjakan’i Babilôna nanapatapaka ny taolany[259].

¹⁸Noho izany, dia izao no lazain’ny TOMPOn’izao rehetra izao sady Andriamanitr’i Israely: «Hirotsaka an-tsehatra hamely ny mpanjakan’i Babilôna sy ny taniny Aho, tahaka izay nirotsahako an-tsehatra namely ny mpanjakan’i Asiria fahiny.

¹⁹Fa i Israely kosa haveriko amin’ny kijana fiandrasana azy, ka hirao-bilona any Karmela sy any Basàna; ary eo an-tendrombohitr’i Efraîma sy ao Gilehada no hahafa-po sy hahavoky azy.

²⁰Izaho TOMPO dia manao teny hentitra hoe: Amin’izany andro izany, na dia hotadiavina aza ny fahadisoan’i Israely sy ny helok’i Joda, dia hanjavona tsy ho hita intsony; satria havelako heloka ireo sisa notsimbiniko ho velona.

²¹Tafiho ny tanin’i Merataîma! Tafiho izy sy ny mponina ao Pekôda[260]. Vonoy ho faty ireo ka aringano hatramin’ny olona farany, hoy ny teny hentitra avy amiko TOMPO. Tanteraho izay rehetra voadidiko!

²²Tabataban’ady no tao amin’io tany io, ary fandringanana goavana!

²³Andray! Potika sy torotoro i Babilôna, ilay tantanam-pamontsanana ny tany tontolo. Andray! Tonga taniefitra mahonena izy eo anivon’ny firenena maro.

²⁴Namelarako fandrika ianao, ry Babilôna, ka voan’izany, nefa tsy fantatrao akory. Tratra sy voasambotra ianao, satria Izaho TOMPO no niadianao.»

²⁵Novohan’ny TOMPO ny trano fitehirizany, ka nalainy tao ireo fiadiana izay anehoany ny fahavinirany. Ao amin’ny tanin’i Babilôna dia izany no asan’ny Tompo, ilay ANDRIAMANITR’izao rehetra izao.

²⁶Hatrany am-paran’ny tany, avia avokoa ianareo rehetra hamely azy. Sokafy ny fitehirizam-bokany ka avangongoy ho antonta iray ny remby; fa aringano tanteraka ny tanàna: aoka tsy hisy tavela intsony!

²⁷Vonoy ho faty ny miaramilany rehetra; aoka hidina any an-toeram-pamonoana ireo! Idiran-doza ireo fa tonga ny androny dia ny fotoana hamalian’ny Tompo azy.

²⁸Injany ireo mpandositra afa-nitsoaka avy any Babilônia mitondra ny vaovao ao Tsiôna: namaly faty an’i Babilôna ny TOMPO Andriamanitsika, namaly faty azy noho ny tempoliny masina Izy.

²⁹Antsoy ny mpandefa zana-tsipîka, dia ireo rehetra mpanenjana tsipîka, ka vorio hamely an’i Babilôna. Aoka ireo hitoby manodidina azy ka tsy hamela ny mponiny ho afa-miala. Aoka hovaliana araka ny ratsy nataony izy ka izay rehetra nataony tamin’ny hafa no mba ampiharo aminy[261] kosa! Satria izy niavonavona tamin’ny TOMPO, dia tamin’ilay Masin’i Israely.

³⁰«Noho izany dia ho faty eny an-kianja eny ireo zatovony, ary ho ringana ireo miaramilany rehetra amin’izany andro izany, hoy ny teny hentitry ny TOMPO.

³¹Indro Aho hifanandrina aminao ry Babilôna mpiavonavona, Izaho Tompo ANDRIAMANITR’izao rehetra izao no manao izany teny hentitra izany. Fa tonga ny andronao izao, dia ny fotoana hamaliako anao.

³²Mivembena ary mianjera ilay mpiavonavona, fa tsy misy manarina azy. Andrehetako afo amin’ireo tanànany ka handevona izay rehetra manodidina azy izany.»

³³Izao no lazain’ny TOMPOn’izao rehetra izao: «Samy nampahorìna ny Israelita sy ny Jodeanina; ary izay rehetra namabo azy dia mitana azy an-keriny, fa tsy manaiky handefa azy.

³⁴Nefa Izaho mpanavotra azy dia mahery: TOMPOn’izao rehetra izao no anarako. Horaisiko an-tanana tokoa ny adiny mba hampiadana ny taniny sy hampikorontana kosa ny mponin’i Babilôna.»

³⁵Hoy ny teny hentitry ny TOMPO: «Hisy ady hamely ny Babilônianina, mbamin’ny mponina ao an-drenivohitra sy ny mpitondrany ary ny olon-kendriny!

³⁶Hisy ady hamely ny mpimasiny[262], ka ho very saina ireo! Hisy ady hamely ny maherifony, ka ho ketraka izy!

³⁷Hisy ady hamely ny soavaliny sy ny kalesiny mbamin’ny olona rehetra samy hafa firenena ao aminy, ka halemy toy ny vehivavy izy! Hisy ady hamely ny haren-tsarobidiny, ka ho voaroba ireo!

³⁸Hisy ady hamely ny reniranony, ka ho ritra ireo! Satria tany be sarivongan-tsampy io, dia sary mahatsiravina sady mahatonga izay manompo azy hirediredy.

³⁹Noho izany dia ny kary sy ny amboadia no honina ao Babilôna; ary ny vorombe koa no hipetraka ao. Fa tsy honenana intsony izy mandrakizay ary tsy hitoerana hatramin’ny taranaka mifandimby.

⁴⁰Tahaka ny nandravako an’i Sôdôma sy i Gômôra, mbamin’ireo tanàna teny akaikiny, no hataoko amin’i Babilôna[263], hoy ny teny hentitra avy amiko TOMPO, ka tsy hisy olona honina na hivahiny any intsony.

⁴¹Indro misy vahoaka tonga avy any avaratra[264] dia firenen-dehibe iray; ary mpanjaka mahery no miainga avy any am-paran’ny tany.

⁴²Mampirangaranga tsipîka sy lefona ireo miaramilany lozabe sady tsy mamindra fo. Mirohondrohona toy ny ranomasina ny feony. Mitaingin-tsoavaly izy, ary milahatra toy ny andian-tafika hiady mba hamely anao, ry Babilôna!

⁴³Ren’ny mpanjakan’i Babilôna izany vaovao izany, ka miraviravy tanana izy sady tratry ny fanaintainana toy ny vehivavy raha miteraka.

⁴⁴Hoy ny Tompo: «Indro Aho ho toy ny liona[265] miakatra avy ao an-kirihitralan’i Jôrdàna sy mirifatra mankany amin’ny fonenany ka ao anatin’ny indray mipi-maso no hampandosirako ny Babilônianina. Ary hapetrako ao Babilôna ilay nofidiko ho lehibeny. Koa iza no azo ampitahaina amiko? Iza no sahy hifandahatra amiko? Ary iza no mpitondra hahatohitra Ahy?»

⁴⁵Noho izany, henoy àry ny tetika novolavolain’ny TOMPO hamelezana an’i Babilôna sy ny paika nomaniny hamelezana ny mponin’i Babilônia. Ho toy ny fitondra biby fiompy mihitsy no hitondrana azy any an-kafa hatramin’ny olona farany indrindra! Ny fonenany mihitsy aza no manilika azy.

⁴⁶Mihorohoro ny tany mandre ny vaovao hoe: «Azo i Babilôna» Ary horakoraka no manako any amin’ireo firenena.