Read Dikateny Iombonana Eto Madagasikara Fitomaniana 3 Bible Online

Fitomaniana 3 - Dikateny Iombonana Eto Madagasikara bible

Fitomaniana 3

¹Lehilahy nahita fahoriana aho tamin’ny kapoky ny fahatezeran’ny Tompo.

²Notarihiny aho[11], ka nampandehaniny tamin’ny maizina fa tsy tamin’ny mazava.

³Izaho irery ihany no velesin’ny tanany mandritra ny andro manontolo.

⁴Nolazoiny ny nofoko sy ny hoditro, ary notapatapahiny ny taolako.

⁵Nampijoro tovon-tany hamelezana ahy Izy, ka zava-mangidy sy fahoriana no nataony manemitra ahy.

⁶Nampitoeriny tao amin’ny haizina aho tahaka ireo efa maty fahiny.

⁷Nofefeny manodidina aho tsy ho afa-nivoaka; nataony mavesatra ny gadrako.

⁸Nikiakiaka niantso vonjy aho; fa nosakanany ny fivavako.

⁹Notampenany rindrim-bato voapaika ny lalako ary naolikoliny ny alehako.

¹⁰Toa orsa manotrika hamely ahy Izy, toa liona mamitsaka ao anaty kirihitra,

¹¹ka nampivily lalana ahy ary namiravira sy namela ahy ho potika.

¹²Nanenjana ny tsipîkany Izy ary nikendry hitifitra ahy.

¹³Ny zana-tsipîkany rehetra no nanagorobahany ny voako.

¹⁴Tonga fihomehezan’ny olona rehetra aho[12], ataony resaka fanarabiana isan’andro.

¹⁵Nobobohan’ny Tompo zava-mampalahelo aho ary nomamoiny zava-mangidy.

¹⁶Notereny hikarepoka vatokely aho ary nohoseny tao anaty lavenona.

¹⁷Noroahiny lavitry ny fiadanana aho ka nanadino izay atao hoe fahasambarana.

¹⁸Ka hoy aho hoe: Potika ny hoaviko, ary tsy misy fanantenàko ny TOMPO intsony.

¹⁹Poizi-mangidy ho ahy ny mahatsiaro ny fahoriako sy firenireneko

²⁰Tsaroako tokoa izany, eny, tsaroako ka trotraka aho tamin’ny nanjo ahy.

²¹Izao anefa no hoeritreretiko am-po sady antony hanantenako:

²²Tsy ritra ny mari-pitiavan’ny TOMPO ary tsy mitsahatra ny famindrampony;

²³vaovao isa-maraina ireny. Fatratra ny toetranao mahatoky, Tompo ô!

²⁴Hoy aho anakampo hoe: ny TOMPO no anjarako; noho izany, dia manantena Azy aho.

²⁵Tsara ny TOMPO amin’izay miandry Azy, dia amin’ny olona mitady Azy.

²⁶Tsara ny manantena mangina ny famonjen’ny TOMPO.

²⁷Tsara ho an’ny lehilahy ny mitondra zioga amin’ny fahatanorany.

²⁸Aoka izy hipetraka mitokana sy hangina, rehefa mizaha toetra azy ny Tompo.

²⁹Aoka hanohoka vava am-bovoka izy, ndrao mba hisy fanantenana.

³⁰Aoka izy hanolotra ny takolany amin’izay mikapoka azy[13], ka ho voky latsa!

³¹Fa tsy hanary mandrakizay ny Tompo.

³²Fa raha mampahory Izy, dia mamindrafo araka ny halehiben’ny fitiavany.

³³Fa tsy sitrany ny mampahory na mampijaly ny olombelona.

³⁴Rehefa hosihosena avokoa ny mpigadra eo amin’ny tany,

³⁵rehefa ny zon’olombelona no hitsakitsahina eo anatrehan’ilay Avo Indrindra,

³⁶rehefa ny rariny no avadika eo amin’ny fitsarana, dia tsy ho hitan’ny Tompo ve izany?

³⁷Iza moa no miteny, dia mampisy zavatra[14]? Moa tsy ny Tompo va no mandidy?

³⁸Moa tsy ny tenin’ilay Avo Indrindra ve no mampisy ny loza sy ny soa?

³⁹Koa inona àry no imenomenonan’ny olona izay mbola velona sy tomady, na dia eo aza ny fahotany?

⁴⁰Dinihontsika sy fantaro ny fitondrantenantsika, ka miverena amin’ny TOMPO isika.

⁴¹Aoka hasandratsika miaraka ny fo aman-tanana[15], rehefa mivavaka amin’Andriamanitra any an-danitra isika.

⁴²Efa nanota sady nikomy izahay; ary Ianao, Tompo ô, tsy namela heloka anay.

⁴³Nisarom-pahatezerana Ianao no nanenjika anay, ka nandringana anay tsy nisy fiantrana.

⁴⁴Nisaron-drahona Ianao mba tsy ho takatry ny vavakay.

⁴⁵Nataonao fakofako sy fanary teo anivon’ny firenen-kafa izahay.

⁴⁶Nanoka-bava hamely anay ny fahavalonay rehetra.

⁴⁷Horohoro sy fanina no mahavoa anay, ary koa fandringanana sy faharatrana.

⁴⁸Rano mandriaka no avoakan’ny masoko noho ny faharatrana nanjo ny fireneko.

⁴⁹Mikoriana ranomaso tsy mety ritra ny masoko satria tsy misy fitsaharanay mihitsy.

⁵⁰Andrasako ny hitsinjovan’ny TOMPO ka hijereny avy any an-danitra.

⁵¹Fijaliana ho ahy ny mahita izay manjo ny zazavavy rehetra ao an-tanànako.

⁵²Ireo fahavaloko tsy amin’antony manenjika ahy toy ny fanenji-boronkely.

⁵³Nanidy ahy velona tao an-davaka izy ary nanjera vato teo amboniko[16].

⁵⁴Nandifotra ny lohako ny rano, ka hoy aho hoe: «Very aho ity!»

⁵⁵Avy tany am-paran’ny lava-drano aho no niantso vonjy taminao, TOMPO ô.

⁵⁶Renao ny feoko manao hoe: «Aza anampenan-tsofina ny fitarainako miantso vonjy aminao.»

⁵⁷Nanatona Ianao tamin’ny andro niantsoako Anao, ka nanao tamiko hoe: «Aza matahotra!»

⁵⁸Tompo ô, niady ho ahy Ianao ka nanavotra ny aiko.

⁵⁹TOMPO ô, hitanao ny fiangarana natao tamiko ka notsarainao ara-drariny aho.

⁶⁰Hitanao avokoa ny valifaty nataony tamiko, dia izay rehetra nokasainy hamelezana ahy.

⁶¹TOMPO ô, efa renao ny latsa nataony, dia izay rehetra nokasainy hamelezana ahy.

⁶²Izay lazain’ny mpanohitra ahy sy eritreretiny dia kendreny hamelezana ahy tontolo andro.

⁶³Jereo izy na mipetraka na mitsangana fa izaho ihany no ambentin-dresany.

⁶⁴TOMPO ô, araka izay nataony tamiko no hamalianao azy koa.

⁶⁵Hataonao donto ny fisainany; ary hiharan’ny ozonao ireo.

⁶⁶Hoenjehinao amim-pahatezerana izy ka haringanao tsy ho etỳ ambonin’ny tany.