Read Dikateny Iombonana Eto Madagasikara Fitomaniana 5 Bible Online

Fitomaniana 5 - Dikateny Iombonana Eto Madagasikara bible

Fitomaniana 5

¹TOMPO ô, tsarovy izay nanjo anay, diniho sy jereo ny fandatsana anay.

²Lasan’ny hafa ny tanindrazanay, lasan’ny vahiny ny tranonay.

³Efa tsy eo intsony ny rainay ka tonga kamboty izahay, ary mpitondratena ny reninay.

⁴Na dia ny lavaka fantsakanay aza dia tsy maintsy andoavanay vola vao azonay isotroana rano; ary vidînay koa ny kitainay vao azonay ampidirina.

⁵Avy eo an-damosina ny mpanenjika anay ka trotraka izahay fa tsy manam-pitsaharana.

⁶Nanolo-tanana tamin’i Ejipta sy i Asiria izahay mba ho voky hanina.

⁷Nanota ny razanay kanefa tsy eo intsony izy; fa izahay no mivesatra ny helony.

⁸Mpanompo no manapaka anay nefa tsy misy manafaka anay amin’ny fahefàny.

⁹Manao vy very ny ainay izahay hahazoan-kanina noho ireo dahalo mirongo fiadiana any an-taniefitra.

¹⁰Mahamay toy ny lafaoro ny hoditray satria ampijalijalian’ny mosary izahay.

¹¹Misy manolana ireo vehivavy ao Tsiôna mbamin’ireo virijiny any an-tanànan’i Joda.

¹²Nahantona tamin’ny tanany ireo mpitondra; ary tsy mba nohajaina ny zokiolona.

¹³Ny zatovo mitondra ny vato fikosoham-bary; ary ny ankizy mivembena mivesatra ny hazo.

¹⁴Ny loholona nitsaha-nanao antenimiera; ary ny zatovo nitsaha-nitendry valiha.

¹⁵Nitsahatra ny hafalian’ny fonay; niova ho fisaonana ny dihin-karavoanay.

¹⁶Nianjera ny satroboninahitra teny an-dohanay; idiran-doza izahay satria efa nanota!

¹⁷Matoa rera-po izahay matoa jembin-dranomaso ny masonay,

¹⁸dia noho ny tendrombohitr’i Tsiôna efa lao ka nanjary fonenan’ny amboadia.

¹⁹Ianao kosa, TOMPO ô, dia mipetraka mandrakizay eo amin’ny sezafiandriananao; ary ny fanjakanao no maharitra amin’ny taonjato mifandimby.

²⁰Koa ahoana no anadinoanao anay hatrany sy andaozanao anay mandritra ny andro-piainanay?

²¹TOMPO ô, ampivereno aminao izahay mba hiverenanay aminao tokoa; havaozy ny fiainanay ho toy ny fahiny.

²²Sa holavinao tanteraka ve izahay na hiharan’ny hatezeranao mihoa-pampana?