Read Dikateny Iombonana Eto Madagasikara Baròka 3 Bible Online

Baròka 3 - Dikateny Iombonana Eto Madagasikara bible

Baròka 3

¹Ry Tompon’izao rehetra izao sady Andriamanitr’i Israely ô, amin’ny fo ory sy fanahy kivy no iantsoanay vonjy aminao.

²Tompo ô, henoy izahay ary amindrao fo fa nanota taminao.

³Mitoetra eo amin’ny sezafiandrianana mandrakizay Ianao, fa izahay kosa mahatsiaro ho very tanteraka.

⁴Ry Tompon’izao rehetra izao sady Andriamanitr’i Israely ô, henoy ny fitalahoanay Israelita vahoakanao. Eny, tahaka ireo maty izahay ary taranak’ireo nanota teo anatrehanao satria tsy nihaino ny fampitandremanao Tompo Andriamanitray, ka niraikitra taminay ny loza.

⁵Aza tsarovanao ny helok’ireo razanay fa tsarovy kosa amin’izao fotoana izao ny herinao sy ny voninahitrao.

⁶Ianao no Tompo Andriamanitray, ka hidera Anao izahay, ry Tompo.

⁷Izany no nampidiranao ny fanajana Anao tao am-ponay, mba hiantsoanay vonjy aminao. Mihira ny fiderana Anao aty an-tsesitany izahay fa efa nampanalavirinay ny fonay ny finiavana hikomy toy ny nataon’ny razanay izay nanota taminao.

⁸Indreto àry izahay ankehitriny, atỳ an-tsesitany izay nampielezanao atỳ, hizaka ny latsa sy ny ozona ary hanonitra ny fikomiana rehetra nataon’ireo razanay izay niendaka taminao Tompo Andriamanitray.

⁹Ry Israely ô, mihainoa ny didy izay mitondra ho amin’ny fiainana; avelao hiditra ao an-tsofinareo ireny mba hahaizanareo mandanjalanja.

¹⁰Ahoana moa ianareo, ry olon’i Israely, no tonga aty an-tanim-pahavalo, antitra any an-tanin’ny hafa,

¹¹voaloto satria mifandray amin’ny maty[23] ary natao ho anisan’ireo tafiditra any amin’ny fonenan’ny maty?

¹²Satria nilaozanareo ny loharanom-pahendrena.

¹³Raha nanaraka ny làlan’Andriamanitra ianareo, dia ho niaina tamim-piadanana mandrakizay.

¹⁴Fantaro àry izay misy ny fahaiza-mandanjalanja, ny hery ary ny fahiratan-tsaina; dia ho fantatrareo miaraka amin’izany koa izay misy ny andro lava ombàm-piainana ary ny hazavàm-pijery ny fiadanana[24].

¹⁵Iza no nahita ny toerana misy ny Fahendrena ary iza no tafiditra tao an’efitrano fanafenany ny haren-tsarobidiny?

¹⁶Aiza ireo filoham-pirenena? Aiza ireo mpamolaka ny bibidia?

¹⁷Aiza ireo mpilalao ny voro-manidina? Aiza ny mpanan-karena tsy hita fetra fa manangona ny volafotsy sy ny volamena izay ametrahan’ny olona ny fitokiany?

¹⁸Aiza ireo mpahay taozavatra izay misahirana miasa ny volafotsy kanefa tsy hita soritra akory ny asany?

¹⁹Levona ireny, ary efa tafidina any amin’ny fonenan’ny maty; ka ny hafa no nitsangana nisolo toerana azy.

²⁰Nahita masoandro ireo tanora herotrerony ary nonina teto ambonin’ny tany, nefa tsy nahafantatra ny lalana mankany amin’ny fahalalana.

²¹Tsy fantany ny sakeli-dalana ahatrarana azy, ka tsy nahazo na inona na inona taminy izy. Ny zanaka nateraka koa nanalavitra ny lalana nalehan’ireo rainy.

²²Tsy mba re nolazaina tao Kanahàna sady tsy mba hita tany Temana ny fahendrena[25].

²³Na dia ireo taranak’i Hagara izay nikaroka ny hairaha teto an-tany aza, na ireo mpivarotra avy any Midiana[26] sy Temàna, na ireo mpitantara angano sy ireo filôzôfa dia samy tsy nisy nahita ny lalana mankany amin’ny fahendrena na nahatadidy ny sakeli-dalany.

²⁴Ry Israely ô, akory ity halehiben’ny tontolo, izay tranon’Andriamanitra, akory ny halalaky ny fonenany!

²⁵Midadasika tsy misy fetra izy, sady avo tsy hay refesina!

²⁶Teo no teraka ireo rapeto, ireo olo-malaza tamin’ny andro fahagola, ranjanana be sady zatra ady[27].

²⁷Tsy ireny anefa no nofidin’Andriamanitra, ary tsy ireny no natorony ny lalam-pahalalana.

²⁸Maty izy noho ny tsy fahaiza-mandanjalanja; eny, maty izy noho ny hadalàny.

²⁹Iza no niakatra tany an-danitra mba hisambotra ny Fahendrena, sy hampidina Azy avy any amin’ny rahona?

³⁰Iza no nita ny ranomasina mba hahita Azy ka hahazo Azy natakalo volamena voafantina?

³¹Tsy misy mahafantatra ny lalana mankany amin’ny Fahendrena na mba maniry hizotra amin’izay sakeli-dalany[28].

³²Fa Andriamanitra Izay mahalala ny zava-drehetra no mahafantatra tsara ny Fahendrena; tamin’ny fahiratan-tsainy no nahitany Azy[29]. Nanorina ny tany ho mafy mandrakizay Izy sady nameno azy biby manan-tongotra efatra.

³³Maniraka ny hazavana Izy, dia mandeha io; ampodiny indray izany dia manaiky Azy amin-kovitra.

³⁴Mamiratra eo amin’ny toerany ny kintana sady falifaly tokoa;

³⁵miantso azy Andriamanitra, dia valiany hoe «Indreto izahay!» Samy mamirapiratra amin-kafaliana ireo mba ho an’Ilay nahary azy[30].

³⁶Io mpahary io no Andriamanitsika, ary tsy misy hafa mitovy aminy.

³⁷Efa hitany avokoa ny lalana mankany amin’ny fahalalana; ary izany lalana izany no natorony ny taranak’i Jakôba mpanompony, dia ny vahoakan’i Israely malalany.

³⁸Hatramin’izay no nisehoan’ny fahendrena teto ambonin’ny tany sy niainany teo anivon’ny olombelona.