Read Dikateny Iombonana Eto Madagasikara Baròka 4 Bible Online

Baròka 4 - Dikateny Iombonana Eto Madagasikara bible

Baròka 4

¹Ny Fahendrena dia ao amin’ilay boky mirakitra ny didin’Andriamanitra: ny Fahendrena dia lalàna izay maharitra mandrakizay. Izay rehetra mifikitra aminy dia hankany amin’ny fiainana; fa izay mandao azy kosa dia hankany amin’ny fahafatesana[31].

²Miverena, ry taranak’i Jakôba! Mifikira amin’ny lalàna, mizora ho amin’ny famirapiratana eo anoloan’ny fahazavàny!

³Aza omena ho an’ny hafa ny voninahitrareo, na ho an’ny firenen-kafa ny tombontsoanareo.

⁴Sambatra isika, ry vahoakan’i Israely noho isika nampahafantarina izay zavatra sitrak’Andriamanitra!

⁵Mahereza, ry vahoakako izay mitana ny anaran’i Israely!

⁶Namidy tamin’ny firenen-kafa ianareo, nefa tsy handringanana anareo izany. Fa ny nanoloran’Andriamanitra anareo ho eo an-tanan’ny fahavalonareo dia noho ianareo nihantsy ny fahatezerany.

⁷Demony[32] no nanoloranareo sorona fa tsy ilay Andriamanitra Mpahary anareo, ka dia nampisafoaka Azy ianareo.

⁸Hadinonareo Andriamanitra mandrakizay izay nanome hanina anareo; ary nampalahelovinareo i Jerosalema izay reny nitaiza anareo.

⁹Fa ny fahatezeran’Andriamanitra dia efa hitan’i Jerosalema nihatra taminareo, ka nampiteny azy hoe: «Mihainoa ahy ianareo tanàna mpifanila amin’i Tsiôna, fahoriana lehibe no nikapohan’Andriamanitra ahy[33];

¹⁰satria hitako ny fahababoana nampiharin’Ilay Andriamanitra Mandrakizay, tamin’ireo zanako lahy sy zanako vavy.

¹¹Faly erỳ aho nitaiza azy ireny! Kanjo tamin-dranomaso amam-pahoriana no namelako azy handeha!

¹²Aoka tsy hisy olona hifaly raha mahita ahy mpitondratena sy nilaozan-janaka maro! Indro aho tonga tsy misy mponina noho ny fahadisoan’ny zanako izay nihataka tamin’ny lalànan’Andriamanitra.

¹³Tsy niraharaha ny baikon’Andriamanitra izy, tsy nizotra ny lalana voasoritry ny didiny, ary tsy nanaraka ny sakeli-dalana izay nanabeazany azy amin’ny fahamarinany.

¹⁴Ianareo tanàna mpifanila amin’i Tsiôna, tongava hijery, tsarovy ny fahababoana nampiharin’ilay Andriamanitra Mandrakizay tamin’ireo zanako lahy sy zanako vavy.

¹⁵Firenena avy lavitra no nalefany hamely azy, dia firenena tsy valahara sady hafahafa fiteny, olona tsy mahalala manaja ny antitra na mamindrafo amin’ny ankizy madinika[34].

¹⁶Satria nifaoka ireo zanakalahy izay tsy foin’ny mpitondratena izy, ary namela azy ho irery voasaraka tamin-janakavavy.»

¹⁷Anaka, inona no azoko atao mba hanampiana anareo?

¹⁸Ilay nahatonga izao loza izao taminareo no hany afaka hamonjy anareo teo an-tanan’ny fahavalonareo.

¹⁹Mandehàna, rankizy, mandehana! Fa izaho tafajanona manirery eto.

²⁰Nesoriko ny akanjo fitondrako amin’ny androm-pifaliana fa nanaovako ny fitafiana fisaonana[35]. Hiantso vonjy amin’ilay Andriamanitra Mandrakizay aho mandritra ny andro sisa hiainako.

²¹Mahereza, anaka, miantsoa an’Andriamanitra; dia hamonjy anareo amin’ny famoretana sy ny vahohon’ny fahavalo Izy!

²²Izaho manko dia ilay Andriamanitra Mandrakizay no iandrasako ny famonjena anareo. Efa nampifaly ahy sahady Ilay Masina: fantatro fa tsy ho ela intsony dia ho tonga hamindrafo aminareo Ilay Mandrakizay mpamonjy anareo.

²³Tamim-pahoriana aman-dranomaso no namelako anareo handeha! Nefa Andriamanitra hamerina anareo ho eo amiko mandrakizay ao anatin’ny haravoana amam-pifaliana[36].

²⁴Ankehitriny ireo tanàna mpifanila amin’i Tsiôna dia mahita fa any am-pahababoana ianareo. Nefa ho hitan’izy ireo tsy ho ela intsony fa Ilay Mandrakizay Andriamanitrareo dia ho tonga hamonjy anareo amim-boninahitra lehibe sy mamirapiratra.

²⁵Anaka, zakao am-paharetana ny vokatry ny fahatezeran’Andriamanitra. Manenjika anareo ny fahavalo; nefa vetivety dia ho hitanareo lavo izy ka hohitsahinareo amin’ny hatony[37].

²⁶Ry zanako mankamamy ahy, nandia làlan-tsarotra ianareo satria nalain’ny fahavalo an-keriny toy ny biby fiompy nangalarina.

²⁷Mahereza, anaka, miantsoa an’Andriamanitra; fa Izy nahatonga anareo ho babo dia tsy afaka hanadino anareo.

²⁸Ianareo ihany no nanan-kevitra hanalavitra an’Andriamanitra. Koa ezaka im-polo heny no ataovy izao mba hiverenana aminy sy hikatsahana Azy;

²⁹satria Izy nahatonga izao loza izao taminareo no ho avy hamonjy anareo, ka hampifaly mandrakizay anareo.

³⁰Mahereza, ry Jerosalema! Andriamanitra Izay nanome anarana anao[38] no ho avy hampionona anao.

³¹Hidiran-doza kosa ireo nanisy ratsy anao ka nifaly tamin’ny fianjerànao

³²Hidiran-doza ireo tanàna izay nanandevo ny zanakao, indrindra fa ilay tanàna[39] izay nandray azy ho babo:

³³araka izay nifaliany tamin’ny fianjerànao sy nihobiany tamin’ny fahavoazanao no hahalelovany koa amin’ny faharavàny;

³⁴hoesoriko aminy ny reharehany ho anisan’ny tanàna be mponina indrindra, ary hiova ho fisaonana ny fianjonanjonany;

³⁵satria Ilay Andriamanitra mandrakizay dia handefa afo hamely azy ka handrava azy maharitra, ary ho fonenan’ny fanahy ratsy izy[40] mandritra ny fotoana ela.

³⁶Ry Jerosalema ô, mba mitodiha any amin’ny fiposahan’ny masoandro ary mitazàna manodidina anao, dia ho hitanao ny hafaliana entin’Andriamanitra aminao.

³⁷Indreny tamy ireo zanakao hitanao nandeha ho babo; tonga avy any rehetra any ireo, hatrany atsinanana ka hatrany andrefana, nangonin’ny feon’ilay Andriamanitra masina, ka ravo tokoa miatrika ny voninahiny[41].