Read Dikateny Iombonana Eto Madagasikara Hiran'ireo Zatovo Telo Lahy 1 Bible Online

Hiran'ireo Zatovo Telo Lahy 1 - Dikateny Iombonana Eto Madagasikara bible

Hiran'ireo Zatovo Telo Lahy 1

¹[24] Ary izy telo lahy, i Hananià sy i Hazarià ary i Misaela[1], dia nandehandeha tao anaty lelafo nanao hira fiderana sy fisaorana ny Tompo Andriamanitra.

²[25] Raha mbola nitsangana tao afovoan’ny afo i Hazarià, dia nanao izao vavaka izao:

³[26] «Ry Tompo Andriamanitry ny razanay ô, hisaorana sy hoderaina anie Ianao, ary homem-boninahitra mandrakizay anie ny anaranao!

⁴[27] Satria marina Ianao amin’izay rehetra nataonao[2]. Marina avokoa ny asanao, mahitsy ny lalanao ary ara-drariny ny fitsarànao.

⁵[28] Eny, didim-pitsarana tsy miangatra ny anao tamin’izay rehetra nanafaizanao anay, dia ny tenanay sy i Jerosalema, ilay tanàna masin’ny razanay; satria araka ny marina sy ny hitsiny no nanaovanao izany rehetra izany, dia noho ny amin’ny helokay ihany.

⁶[29] Fa nahavita heloka izahay sy nanao ratsy ka nihataka taminao, ary diso tamin’ny zavatra rehetra.

⁷[30] Tsy nankatò ny didinao izahay, ka tsy nitandrina na nahatanteraka izany araka ny nandidianao anay[3] mba hahitanay soa avy aminy.

⁸[31] Izay rehetra nanafaizanao anay sy izay rehetra nataonao taminay dia araka ny fitsaranao ara-drariny.

⁹[32] Natolotrao izahay ho eo an-tanan’ny fahavalo izay olon-dratsy mahatsiravina sady mpikomy aminao. ary ho eo ambany fahefàn’ny mpanjaka iray faran’izay tsy marina indrindra eto an-tany[4].

¹⁰[33] Ary ankehitriny mikombom-bava izahay mpanomponao sy mpivavaka aminao fa sady menatra no afa-baràka.

¹¹[34] Koa noho ny amin’ny lazanao, dia aza mahafoy anay tanteraka ary aza foananao ny fanekempihavananao.

¹²[35] Aza esorina aminay ny fitiavanao noho ny amin’i Abrahama sakaizanao sy i Itsehàka mpanomponao ary i Israely voatokana ho Anao[5].

¹³[36] Samy nampanantenainao ireo fa homenao taranaka maro tahaka ny kintana eny amin’ny lanitra na toy ny fasika eny amoron-dranomasina[6].

¹⁴[37] Kanefa, Tompo ô, noho ny helokay dia tonga firenena bitika indrindra amin’ny firenen-drehetra izahay ary vahoaka voaetry ankehitriny eto ambonin’ny tany tontolo.

¹⁵[38] Amin’izao fotoana izao dia tsy anananay na filoha na mpaminany na mpitarika; tsy afa-manao sorona dorona manontolo izahay na sorona hafa amam-panatitra na fandoroana vovo-javamanitra, na toerana fanaterana ny voaloham-bokatra mba handraisanay famelàn-keloka aminao.

¹⁶[39] Kanefa raiso izahay, Tompo ô, amin’izao avonavonay efa torotoro sy fanahinay feno fietrena izao,

¹⁷[40] raiso tahaka ny ondrilahy sy ombilahy izay fanaonay sorona dorana manontolo; ho toy ny zanak’ondry matavy an’arivony anie ny sorona atolotray Anao ankehitriny; ary hanaraka Anao hatrany anie izahay, satria tsy ho menatra izay matoky Anao.

¹⁸[41] Ankehitriny no amehezanay tena hanaraka Anao amin’ny fonay manontolo, ka sady hanaja Anao izahay no hitady ny fanatrehanao.

¹⁹[42] Koa aza avela ho afa-baràka izahay, fa ento araka ny fiantranao sy araka ny indrafonao tsy hita lany.

²⁰[43] Vonjeo araka ny asanao mahagaga izahay, ka ny anaranao, Tompo ô, no omeo voninahitra.

²¹[44] Enga anie ho menatra sy ho afa-baràka izay rehetra manisy ratsy anay mpanomponao[7]; enga anie tsy hisy fahefana anananay intsony ary ho voamontsamontsana ny heriny.

²²[45] Aoka ho fantany fa Ianao no hany Tompo Andriamanitra sady omem-boninahitra amin’ny tany tontolo!»

²³[46] Fa ireo mpanompon’ny mpanjaka izay nanipy azy telo lahy tao amin’ny fatana fandrendrehana, dia tsy nitsahatra nisorona ny afo tamin’ny tara sy ditin-kazo ary hoto aman-kitay;

²⁴[47] koa nijoalajoala tany amin’ny 24 metatra[8] sy sasany ambonin’ny fatana ny lelafo.

²⁵[48] Nidedadeda aoka izany nanodidina ny fatana ny afo ka nandoro hatramin’ireo Babilônianina nanakaiky izany.

²⁶[49] Fa nidina tao amin’ny fatana niaraka tamin’i Hazarià sy ireo namany ny anjelin’ny Tompo ka nanosika ny lelafo ho any ivelan’ny fatana.

²⁷[50] Dia nisy toa rivotra malefaka nitsoka teo afovoan’ny fatana, ka tsy nahakasika na nandratra azy ireo kely akory ny afo.

²⁸[51] Koa toy ny vava iray ihany izy telo lahy tao anaty fatana no indray nidera sy nankalaza ary nisaotra an’Andriamanitra ka nanao hoe:

²⁹[52] «Hisaorana anie Ianao, ry Tompo Andriamanitry ny razanay, fa mendrika dera sy laza mandrakizay. Hisaorana anie ny anaranao izay masina sy be voninahitra fa mendrika dera sy laza mandrakizay.

³⁰[53] Hisaorana anie Ianao an-tempolinao masina sy be voninahitra, fa mendrika dera sy voninahitra mandrakizay.

³¹[54] Hisaorana anie Ianao Izay mipetraka eo ambonin’ny kerobima[9] sy mijery ny fanambanin’ny hantsana, fa mendrika dera sy laza mandrakizay.

³²[55] Hisaorana anie Ianao eo amin’ny sezafiandriananao, fa mendrika dera sy laza mandrakizay.

³³[56] Hisaorana anie Ianao eo ambonin’ny andohalambon’ny lanitra, fa mendrika dera sy voninahitra mandrakizay.

³⁴[57] Misaora ny Tompo ianareo rehetra asany[10]; derao Izy ary ankalazao mandrakizay.

³⁵[58] Misaora ny Tompo, ianareo lanitra; derao Izy ary ankalazao mandrakizay.

³⁶[59] Misaora ny Tompo, ianareo anjeliny; derao Izy ary ankalazao mandrakizay.

³⁷[60] Misaora ny Tompo ianareo rano mivangongo any ambonin’ny lanitra[11]; derao Izy ary ankalazao mandrakizay.

³⁸[61] Misaora ny Tompo, ianareo rehetra herin’ny lanitra; derao Izy ary ankalazao mandrakizay.

³⁹[62] Misaora ny Tompo, ianareo masoandro sy volana; derao Izy ary ankalazao mandrakizay.

⁴⁰[63] Misaora ny Tompo, ianareo kintan’ny lanitra[12]; derao Izy ary ankalazao mandrakizay.

⁴¹[64] Misaora ny Tompo, ianareo orana aman’ando rehetra; derao Izy ary ankalazao mandrakizay.

⁴²[65] Misaora ny Tompo, ianareo rivotra rehetra; derao Izy ary ankalazao mandrakizay.

⁴³[66] Misaora ny Tompo, ianareo afo sy hafanana; derao Izy ary ankalazao mandrakizay.

⁴⁴[67] Misaora ny Tompo, ianareo hatsiaka sy hafanà-migaingaina; derao Izy ary ankalazao mandrakizay.

⁴⁵[68] Misaora ny Tompo, ianareo ando amam-patrakala; derao Izy ary ankalazao mandrakizay.

⁴⁶[69] Misaora[13] ny Tompo, ianareo andro sy alina; derao Izy ary ankalazao mandrakizay.

⁴⁷[70] Misaora ny Tompo, ianareo hazavana sy haizina; derao Izy ary ankalazao mandrakizay.

⁴⁸[71] Misaora ny Tompo, ianareo fanala sy hatsiaka; derao Izy ary ankalazao mandrakizay.

⁴⁹[72] Misaora ny Tompo, ianareo ranomandry sy oram-panala; derao Izy ary ankalazao mandrakizay.

⁵⁰[73] Misaora ny Tompo, ianareo tselatra sy rahona; derao Izy ary ankalazao mandrakizay.

⁵¹[74] Aoka ny tany hisaotra ny Tompo; aoka izy hidera sy hankalaza Azy mandrakizay.

⁵²[75] Misaora ny Tompo, ianareo tendrombohitra sy havoana; derao Izy ary ankalazao mandrakizay.

⁵³[76] Misaora ny Tompo, ianareo rehetra zava-maniry amin’ny tany; derao Izy ary ankalazao mandrakizay.

⁵⁴[77] Misaora[14] ny Tompo, ianareo ranomasina sy ony; derao Izy ary ankalazao mandrakizay.

⁵⁵[78] Misaora ny Tompo, ianareo loharano; derao Izy ary ankalazao mandrakizay.

⁵⁶[79] Misaora ny Tompo, ianareo hazandrano; na vaventy na madinika; derao Izy ary ankalazao mandrakizay.

⁵⁷[80] Misaora ny Tompo, ianareo voro-manidina; derao Izy ary ankalazao mandrakizay.

⁵⁸[81] Misaora ny Tompo, ianareo biby dia sy fiompy[15]; derao Izy ary ankalazao mandrakizay.

⁵⁹[82] Misaora ny Tompo, ianareo zanak’olombelona; derao Izy ary ankalazao mandrakizay.

⁶⁰[83] Misaora ny Tompo, ianareo Israelita; derao Izy ary ankalazao mandrakizay.

⁶¹[84] Misaora ny Tompo, ianareo mpisorony; derao Izy ary ankalazao mandrakizay.

⁶²[85] Misaora ny Tompo, ianareo mpanompony; derao Izy ary ankalazao mandrakizay.

⁶³[86] Misaora ny Tompo, ianareo fanahy aman-tsain’olo-marina; derao Izy ary ankalazao mandrakizay.

⁶⁴[87] Misaora ny Tompo, ianareo masina sy mietry ao am-po; derao Izy ary ankalazao mandrakizay.

⁶⁵[88] Misaora ny Tompo, isika; ry i Hananià sy i Hazarià ary i Misaela; derao Izy ary ankalazao mandrakizay, fa nafahany tamin’ny toeran’ny maty isika sy novonjeny tamin’ny vahohon’ny fahafatesana ary nesoriny teo anivon’ny fatana mivaivay sy notsoahany teo afovoan’ny afo.

⁶⁶[89] Misaora ny Tompo fa tsara Izy ary maharitra mandrakizay ny fitiavany[16].

⁶⁷[90] Misaora ny Tompo Andriamanitry ny andriamanitra, ianareo rehetra mpivavaka aminy; derao Izy ary ankalazao fa maharitra mandrakizay ny fitiavany.»