Read Dikateny Iombonana Eto Madagasikara Ezekiela 1 Bible Online

Ezekiela 1 - Dikateny Iombonana Eto Madagasikara bible

Ezekiela 1

¹Tamin’ny fahatelopolon-taonako, fony andro fahadimin’ny volana fahefatra, izaho Ezekiela zanakalahin’i Bozỳ mpisorona dia tao anivon’ireo Jiosy babo teo amoron’ny ony Kebara[1]; nisokatra ny lanitra ary nahita fahitana avy tamin’Andriamanitra aho. Taona fahadimy taorian’ny naha lasan-ko babo an’i Jôiakina[2] mpanjaka tamin’izay. Koa teo amoron’io ony Kebara tany amin’ny tanin’ny Babilônianina io, no nisy tenin’ny TOMPO tamiko, sady nihazona ahy tamin’ny heriny IZY.

⁴Koa izao no hitako: tafio-drivotra tonga avy any avaratra, nitondra rahona matevina sady namoaka tselatra. Voahodidina hazavana ilay rahona, ary ny afovoany izay mivaivay dia nanjelanjelatra toy ny vy mangirana.

⁵Hita miavaka tao amin’io ivon-drahona io ny endrika zava-miaina efatra izay toa olombelona no fijery azy.

⁶Samy nanana tarehy efatra sy elatra efatra avy izy.

⁷Mahitsy ny tongony; ary ny faladiany dia toy ny kitron’ombilahikely, ka mamirapiratra toy ny halimo voadio.

⁸Teo ambanin’ny elatra efatra dia samy nisy tanan’olona iray avy; ary ireny tanana ireny dia nitodika ho amin’ny lafiny efatra nanaraka ny tarehy sy ny elany avy.

⁹Nifanendry ny tendron’ny elany; ary samy nandroso ho amin’izay hitsiny avy izy, fa tsy niherika rehefa nandeha.

¹⁰Samy nanana ireto tarehy ireto avy izy: tarehin’olona no teo anoloana, tarehina liona no teo ankavanana, tarehin’ombilahy no teo ankavia ary tarehina voromahery no teo ivoho.

¹¹Ny roa amin’ireo elany[3] dia nitsotra miakatra ka nifanendry ny tendrony, fa ny roa kosa nanarona ny tenany.

¹²Samy nizotra tamin’izay hitsiny avy ireo zava-miaina ireo, ary nandeha tamin’izay nitondran’ny Fanahy azy[4] fa tsy niherika.

¹³Teo anelanelan’ireo zava-miaina dia tazana ho nisy toy ny vainafo; ary nihetsiketsika toy ny fanilo no fijery azy. Namirapiratra ny afo, ary nisy tselatra nivoaka avy tao aminy.

¹⁴Ireo zava-miaina ireo koa dia nifanaretsaka tetsy sy teroa sady nitsoriaka toy ny varatra.

¹⁵Raha nandinika ny zava-miaina efatra aho, dia nahita fa teo anilan’ny tsirairay avy[5] dia nisy kodiarana iray nitehika tamin’ny tany.

¹⁶Nanana endrika manjelanjelatra toy ny vatosoa ireo kodiarana. Nitovy bika izy efatra ary toa samy voarafitra ho kodiarana mifampidipiditra.

¹⁷Afaka mandroso ho amin’ny lafiny efatra izy nefa tsy mila mihodina.

¹⁸Mahatahotra ny refin’ny savaivony ary rakotra taratra mamirapiratra ny manodidina azy manontolo.

¹⁹Rehefa nandroso ireo zava-miaina, dia mba nandroso avy hatrany teo anilany koa ireto kodiarana; rehefa niakatra niala tamin’ny tany izy, dia mba niakatra koa ireto.

²⁰Nandeha tamin’izay nitondran’ny Fanahy azy izy ka nandroso niaraka taminy koa ireto kodiarana, satria ny fanoitran’ny zava-miaina no nanetsika ireo kodiarana ireo.

²¹Koa isaky ny nandroso izy na nijanona na niakatra niala tamin’ny tany, dia niara-nanao fihetsika toy izany koa ireto kodiarana satria ny fanoitran’ireo zava-miaina no nanetsika azy.

²²Teo ambony lohan’ireo zava-miaina dia nisy toa andohalambo namirapiratra toy ny kristaly manjelanjelatra.

²³Teo ambanin’izany andohalambo izany no samy namelatra ny elany roa nifanitsy sy nifanendry ny zava-miaina tsirairay, fa ny elany roa sisa kosa nanaronany ny tenany.

²⁴Ary nandre ny fikopakopaky ny elany aho rehefa nanidina ireto zava-miaina, fa toy ny firohondrohon’ny ranomasina izany, sy tahaka ny feon’Andriamanitra Tsitoha[6] na ny fireondreonan’ny tafika marobe. Rehefa nijanona kosa izy, dia nafihiny ny elany.

²⁵Avy tao ambonin’ny andohalambo izay teo ambony lohany dia naharenesako feo ihany koa.

²⁶Tazako tao fa nisy toa sezafiandrianana miendrika vato safira; ary teo ambonin’izany toa sezafiandrianana izany, terỳ an-tampon’ny andohalambo dia nisy hoatra endrik’olombelona.

²⁷Hitako fa namirapiratra tahaka ny vy mangirana izany endrika izany, sady toa voahodidina afo. Ary teo ambony sy teo ambanin’izay hoatra ny tehezany, dia tazako nisy toy ny afo nandrakotra hazavana azy.

²⁸Ny fahazavana manodidina azy dia tahaka ny an’ny avana izay mamirapiratra amin’ny andro manerika. Taratry ny voninahitry ny TOMPO izany. Nony nahita izany aho, dia nikarapoka nihohoka hatreo amin’ny tany, ary nandre feo niteny tamiko[7].