Read Dikateny Iombonana Eto Madagasikara Ezekiela 10 Bible Online

Ezekiela 10 - Dikateny Iombonana Eto Madagasikara bible

Ezekiela 10

¹Ary nijery aho ka indro teo amin’ny habakabaka izay tambonin’ny lohan’ny kerobima fa nisy tahaka ny vato safira, ka mitovitovy amin’ny sezafiandrianana ny endriny; ary niseho teo ambonin’ireo kerobima ny Tompo[40].

²Ary hoy ny Tompo tamin’ilay lehilahy miakanjo rongony: «Midira ao anatin’ny tadio anelanelan’ny kodiarana eo ambany kerobima. Fenoy vainafo avy eo anelanelan’ny kerobima ny tananao, ka afafazo amin’ny tanàna izany[41].» Dia hitako nandeha naka ny vainafo ralehilahy.

³Fa raha mbola nankao izy, dia nijanona teo amin’ny ilany ankavanan’ny tempoly ireo kerobima, ary feno raho-matevina ny kianja anatiny.

⁴Niakatra avy eo ambonin’ny kerobima hankeny amin’ny tokonam-baravaran’ny tempoly ny voninahitry ny TOMPO. Koa nanjary feno raho-matevina ny tempoly; ary ny kianja kosa dia namirapiratry ny voninahitry ny TOMPO.

⁵Ary heno hatrany amin’ny kianja ivelany ny fikopakopaky ny elatry ny kerobima, tahaka ny feon’Andriamanitra Tsitoha raha miteny[42].

⁶Nijoro teo anilan’ny kodiarana iray ilay lehilahy miakanjo rongony, rehefa avy naka afo teo anelanelan’ny kodiarana teo afovoan’ny kerobima araka ny baikon’Andriamanitra.

⁷Nanatsotra ny tanany ho eo amin’ny afo izay teo anilany ny kerobima iray ka naka vainafo tao ary namenoany ny tanan-droan’ilay lehilahy. Noraisin-dralehilahy kosa izany, dia nivoaka ny tempoly izy.

⁸Ary nisy toa tanan’olona roa niseho teo ambany elatry ny kerobima.

⁹Hitako koa fa nisy kodiarana efatra, ka kodiarana iray avy no teo anilan’ny kerobima. Ireo kodiarana ireo dia nanjelanjelatra tahaka ny vatosoa krizôlita.

¹⁰Mitovy bika izy efatra ary toa samy voarafitra hifampidipiditra.

¹¹Afaka mandroso ho amin’ny lafiny efatra izy nefa tsy mila avily. Mizotra ho amin’izay itodihan’ny kerobima izy ary mandroso tsy mila avily.

¹²Ny tenan’ny kerobima manontolo, indrindra ny lamosiny sy ny tanany ary ny elany, dia rakotra maso manjelanjelatra tahaka ireo kodiarana efatra.

¹³Ary ireo kodiarana efatra dia reko nomena anarana hoe «tadio».

¹⁴Samy nanana endrika efatra ny kerobima tsirairay: ny voalohany dia endrika kerobima, ny faharoa dia endrika olona, ny fahatelo dia endrika liona, ary ny fahefatra dia endrika voromahery.

¹⁵Niakatra ho eny amin’ny habakabaka ireo kerobima, izay tsy hafa fa ireo zava-miaina izay hitako teo amoron’ny ony Kebara ihany[43].

¹⁶Rehefa mandroso izy, dia mandroso miaraka aminy koa ireo kodiarana; rehefa mikopaka elatra hiakatra hiala amin’ny tany izy, dia tsy misaraka aminy koa ireo kodiarana.

¹⁷Raha mijanona ireo, dia mijanona koa ny kodiarana; raha manidina miakatra ho eny amin’ny habakabaka ireo, dia mba miakatra koa ireo, satria ny fanahin’ny zava-miaina no manetsika ireo kodiarana.

¹⁸Niainga avy teo an-tokonam-baravaran’ny tempoly ny voninahitry ny TOMPO, ka nipetraka teo ambony kerobima.

¹⁹Dia nikopaka elatra handeha ireo kerobima ka tsinjoko niakatra niala avy amin’ny tany, ary niara-niainga taminy koa ireo kodiarana. Nijanona teo anilan’ny vavahady atsinanana amin’ny tranon’ny TOMPO izy ka namirapiratra teo amboniny ny voninahitr’Andriamanitr’i Israely.

²⁰Teo amoron’ny ony Kebara no efa nahitako ireo zava-miaina ireo nijoro teo ambanin’Andriamanitr’i Israely, ka fantatro ankehitriny fa kerobima ireo.

²¹Samy nanana endrika efatra sy elatra efatra ary karazana tanan’olona teo ambany elany avy ny tsirairay.

²²Nitovy tanteraka tamin’ny endrik’ireo zava-miaina teo amoron’ny ony Kebara ny endriny. Samy nandroso mahitsy tamin’izay tandrify azy avy ny kerobima.