Read Dikateny Iombonana Eto Madagasikara Ezekiela 15 Bible Online

Ezekiela 15 - Dikateny Iombonana Eto Madagasikara bible

Ezekiela 15

¹Ary nisy tenin’ny TOMPO tamiko nanao hoe:

²«Ry ilay taranak’olombelona, moa sarobidy kokoa noho ny vatan-kazo avy amin’ny hazo any an’ala ve ny tahom-boaloboka[58]?

³Moa mety hanaovana fanaka ve izy na hanamboarana fanantonan-javatra?

⁴Tsia, fa ny hatsipy ao anaty afo ho kitay no sahaza ny tahom-boaloboka. Rehefa main’ny afo ny tendrony roa ary efa mirehitra ny eo an-tenatenany[59], moa mbola azo ampiasaina hanaovan-javatra ihany ve izy?

⁵Fony mbola tsy nanombinana aza izy, tsy azo nanaovan-javatra; mainka rehefa may sy lanin’ny afo izy, dia tsy azo anaovana na inona na inona intsony.

⁶«Koa izao no lazain’ny Tompo ANDRIANANAHARY: ‹Ny tahom-boaloboka no atsipy ao anaty afo ho kitay, fa tsy ny vatan-kazo avy amin’ny hazo hafa. Toy izany no hanafaizako ny mponin’i Jerosalema,

⁷fa hirotsaka an-tsehatra Aho hamely azy. Mihevitra ho afaka tamin’ny afo izy kanjo ho levon’ny afo[60] ihany. Amin’izay dia hiaiky ianareo fa Izaho no TOMPO, rehefa hirotsaka an-tsehatra hamely azy Aho.

⁸Hataoko lao ny taniny, satria nivadika tamiko ireo. Teny hentitra avy amiko Tompo ANDRIANANAHARY izany›. »