Read Dikateny Iombonana Eto Madagasikara Ezekiela 18 Bible Online

Ezekiela 18 - Dikateny Iombonana Eto Madagasikara bible

Ezekiela 18

¹Nisy tenin’ny TOMPO tamiko nanao hoe:

²«Ahoana moa no amerimberenanareo izao ohabolana izao ao amin’ny tanin’i Israely hoe: ‹Ny ray aman-dreny no nihinana voaloboka marikivy, ka ny zanany ve no hadilo nify?›

³Velona Izaho Tompo ANDRIANANAHARY, ka manao teny hentitra sy mianiana fa tsy hotononinareo any Israely intsony izany.

⁴Fa samy Ahy avokoa ny ain’ny tsirairay avy, na ny an’ny ray aman-dreny na ny an’ny zanany; koa izay olona manota ihany no ho faty[80].

⁵«Aoka hatao hoe misy lehilahy marina iray ka manao izay marina sy mahitsy.

⁶Tsy mihinana amin’ny sakafom-panompoan-tsampy eny an-tendrombohitra izy na manompo ireo sampin’ny Israelita, tsy mandoto ny vadin’ny namany na matory amin’ny vehivavy voan’ny fadimbolana[81].

⁷Tsy mitsentsitra na mangalatra izy fa mamerina ny antoka amin’ny mpitrosa, ary manome hanina ho an’ny noana sy fitafiana ho an’ireo tsy manana.

⁸Tsy mampindram-bola mba hahazoana zana-bola sy tombony izy[82], tsy miray tsikombakomba amin’ny tsy marina fa manao fitsarana tsy miangatra.

⁹Manaraka ny lalànako sy mitandrina ny fitsipiko izy mba hanao izay mahitsy. Olo-marina io lehilahy io ka ho velona tokoa. Teny hentitra avy amiko Tompo ANDRIANANAHARY izany.

¹⁰«Raha ohatra io lehilahy io manan-janaka lahy mandroba sy mamono olona ho faty na manao zavatra mitovy karazana amin’izany.

¹¹Tsy nanao ireo zavatra ireo akory ny rainy, fa ity zanany no mihinana amin’ny sakafom-panompoan-tsampy eny an-tendrombohitra, mandoto ny vadin’ny namany,

¹²mitsentsitra ny mahantra sy ny fadiranovana, mangalatra amin’ny olona, tsy mamerina ny antoka izay nomen’ireo mpitrosa azy, manompo sampy sady manao zavatra maharikoriko,

¹³mampindram-bola mba hahazoana zana-bola sy tombony. Moa tokony ho velona ve io zanany lahy io? Tsia! Nanao ireo zava-dratsy rehetra maharikoriko ireo izy, ka ho faty tokoa ary ho tompon’andraikitry ny fahafatesany.

¹⁴«Raha misy kosa lehilahy iray manan-janaka lahy. Izany zanany lahy izany, rehefa nahita ny fahotana rehetra nataon-drainy, dia tsy manahaka azy.

¹⁵Tsy mihinana amin’ny sakafom-panompoan-tsampy eny an-tendrombohitra izy na manompo ireo sampin’ny Israelita ary tsy mandoto ny vadin’ny namany.

¹⁶Tsy mitsentsitra na mangalatra izy sady tsy mitaky antoka amin’ny mpitrosa ary manome hanina ho an’ny noana sy fitafiana ho an’ny tsy manana,

¹⁷tsy miray tsikombakomba amin’ny tsy marina[83] na mampindram-bola mba hahazoana zana-bola sy tombony. Manatanteraka ny fitsipiko sy manaraka ny lalànako, ka tsy ho faty noho ny fahadisoan-drainy fa ho velona tokoa.

¹⁸Ny rainy izay nampahory sy nangalatra[84] ary nampijaly ny vahoaka nanodidina azy ihany no ho faty noho ny fahadisoana nataony.

¹⁹«Nefa ianareo manontany hoe: Nahoana ny zanaka no tsy mba mizaka ny fahadisoan-drainy? Satria manao izay marina sy mahitsy izy ary mitandrina sy manatanteraka ny lalànako rehetra, ka dia ho velona tokoa.

²⁰Ny olona nanota ihany no ho faty. Ny zanaka tsy hizaka ny fahadisoan’ny ray aman-dreniny, ary ny ray aman-dreny tsy hizaka ny fahadisoan’ny zanany. Ny olo-marina dia hovaliana soa noho ny fahamarinany ary ny olon-dratsy kosa hofaizina noho ny faharatsiany[85].»

²¹«Raha misy olon-dratsy miala amin’ny fahotana rehetra nataony, ka mitandrina ny lalànako rehetra ary manao izay marina sy mahitsy, dia tsy ho faty izany olona izany fa ho velona tokoa.

²²Hohadinoina ny heloka rehetra vitany ka ho velona izy noho ny marina ataony.

²³Moa sitrako ve ny hahita ny olon-dratsy ho faty? Izaho Tompo ANDRIANANAHARY dia manao teny hentitra fa ny hiovany fitondrantena mba hahavelomany no sitrako.

²⁴Kanefa raha misy olo-marina miala amin’ny fahamarinany ka manao heloka araka ny zavatra rehetra maharikoriko izay fanaon’ny olon-dratsy, dia heverinareo ho velona ve izy? Tsia. Hohadinoina ireo asa tsara rehetra nataony, ka ho faty izy noho ny hadisoana amam-pahotana vitany.

²⁵Hoy ianareo hoe: ‹Tsy marina ny fitòndran’ny Tompo!› Henoy tsara Aho, ry Israelita: Ny fitòndrako ve no tsy marina? Tsy ny fitondranareo ve no tsy marina?

²⁶Raha misy olo-marina miala amin’ny fahamarinany, ka manao heloka ary maty amin’izany, dia maty noho ny heloka nataony ihany izy.

²⁷Raha misy kosa olon-dratsy miala amin’ny faharatsiana nataony, ka manao izay marina sy mahitsy, dia mamonjy ny ainy izy.

²⁸Ho velona tokoa izy fa tsy ho faty satria nahatsapa ny asa ratsiny ka niala tamin’izany.

²⁹Kanefa hoy ianareo Israelita hoe: ‹Tsy marina ny fitòndran’ny Tompo.› Tsy ny fitòndrako no tsy marina fa ny anareo!

³⁰Noho izany, Izaho Tompo ANDRIANANAHARY dia hitsara anareo Israelita tsirairay avy araka ny fitondrantenany; teny hentitra avy amiko izany. Koa ovay ny toe-dratsy, ialao ny hadisoana rehetra fanaonareo, dia tsy hisy intsony zavatra hitarika anareo amin’ny heloka.

³¹Esory ho afaka aminareo ny asa ratsy rehetra fanaonareo; ka mihavaoza fo amam-panahy ianareo. Ahoana no te ho faty ianareo, ry Israelita?

³²Fa tsy sitrako ny hahafaty ny olona. Teny hentitra avy amiko Tompo ANDRIANANAHARY izany. Ovay ny toe-dratsy, dia ho velona ianareo.›