Read Dikateny Iombonana Eto Madagasikara Ezekiela 2 Bible Online

Ezekiela 2 - Dikateny Iombonana Eto Madagasikara bible

Ezekiela 2

¹Ary hoy ilay feo tamiko: «Ry ilay taranak’olombelona[8], mitsangàna ianao fa hiteny aminao Aho.»

²Fa raha mbola niteny izany ilay feo, dia niditra tao amiko ny Fanahin’Andriamanitra ka nampitsangana ahy; dia nihaino Ilay niteny tamiko aho,

³ary nilazany hoe: «Ry ilay taranak’olombelona, maniraka anao Aho ho any amin’ireo Israelita, dia ireo andia-mpikomy izay efa nikomy tamiko; fa tahaka ireo razany ihany izy, ka tsy nitsahatra namadika Ahy.

⁴Ireo olona mafy loha sy be kirina ireo no anirahako anao, ka hitenenanao hoe: Izao no lazain’ny Tompo ANDRIANANAHARY.

⁵Koa na hihaino anao izy na tsy hihaino, satria vahoaka maditra, dia ho fantany fa misy mpaminany eo anivony.

⁶«Ary ianao, ry ilay taranak’olombelona, aza matahotra ny tenany na ny teniny. Hanohitra anao ireo, ka ho toy ny eo anivon’ny tsilo sy ny maingoka ianao; kanefa aza matahotra noho ny tenin’io vahoaka maditra io na mivadi-po noho ny fihetsiny.

⁷Fa avereno aminy ihany izay hambarako anao na hihaino izy na tsy hihaino noho ny di-dohany.

⁸«Ary ianao, ry ilay taranak’olombelona, aza miseho ho maditra tahaka ireo, fa henoy izay lazaiko aminao. Sokafy ny vavanao ka hano izay homeko anao.»

⁹Dia indro hitako nisy tanana iray nitsotra nanatona ahy sady nitana boky iray miendrika horonan-taratasy[9].

¹⁰Noborahany teo anatrehako izany, ka voasoratra ny lafiny roa[10]. Fitarainana sy toloko ary toreo no voasoratra tao.