Read Dikateny Iombonana Eto Madagasikara Ezekiela 22 Bible Online

Ezekiela 22 - Dikateny Iombonana Eto Madagasikara bible

Ezekiela 22

¹Ary nisy tenin’ny TOMPO tamiko nanao hoe:

²«Ianao, ry ilay taranak’olombelona, miomàna sy mivonòna hitsara ity tanànan’i Jerosalema lian-dra ity! Ampahafantaro azy ny zavatra rehetra maharikoriko nataony.

³Ambarao aminy fa izao no lazain’ny Tompo ANDRIANANAHARY: ‹Tanàna anjakàn’ny famonoana olona ianao ka hahatonga ny fotoana handravana anao; ary ny mponinao koa dia manamboatra sampy maharikoriko sady mandoto ny faritrao.

⁴Meloka ianao noho ireo vonoan’olona rehetra ireo ary nandoto tena tamin’izany fanamboaran-tsampy izany! Ny tenanao ihany no nampanakaiky ny fotoana handravana anao; ka tafapaka amin’ny fiafaran’ny andronao ianao. Noho izany dia atolotro ho fihomehezan’ny firenen-kafa ianao ka ho fanarabian’ny tany rehetra.

⁵Vasoka ny lazanao, toerana be korontana ianao, ka na ny tany lavitra na ny akaiky dia samy manaraby anao.

⁶«Ao aminao dia samy manampatra fahefana ny mpitondra ary mamono olona[111].

⁷Ao aminao dia tsy hajaina ny ray sy reny, tsentsefina ny vahiny, ampahorina ny kamboty sy ny mpitondratena[112],

⁸atao tsinontsinona ny toerana voatokana ho Ahy ary zimbazimbaina ny andro sabatako.

⁹Ao aminao dia misy mpanaratsy mba handrisika amin’ny famonoana olona; ary ny mponinao dia misy mihinana sakafom-panompoan-tsampy eny an-tendrombohitra. Ao aminao dia fanaovam-pijangajangana[113]:

¹⁰misy mandry amin’ny vadin-drainy, misy manolana vehivavy voan’ny fadimbolana[114],

¹¹misy manao zava-maharikoriko amin’ny vadin’ny namany, misy nanery ny vinantovaviny hijangajanga ary misy manolana ny anabaviny, dia ny zanakavavin-drainy.

¹²Ao aminao misy manaiky hotambazam-bola mba hamono olona, misy mampindram-bola hakana zanany tafahoatra sy mangoron-karena tamin’ny fandrobana ny namany, ka manadino Ahy mihitsy. Teny hentitra avy amiko Tompo ANDRIANANAHARY izany.

¹³«Koa indro Aho hamely mafy anareo, ry mponin’i Jerosalema, noho ireo harena nangoninareo tsy an-drariny sy ireo vonoan’olona nataonareo.

¹⁴Moa hanan-kery sy fahasahiana hahatohitra ve ianareo, amin’ny andro hamelezako anareo? Fa Izaho TOMPO dia milaza sady manatanteraka izany.

¹⁵Haeliko sy haparitako any amin’ireo firenena any an-tany samy hafa ianareo ka hatako mifarana hatreo ny asa maloto fanaonareo.

¹⁶Ny nataonareo no hanimbazimbana Ahy eo imason’ny firenen-kafa; kanefa amin’izay dia hoekenareo fa Izaho no TOMPO.

¹⁷Dia nisy indray tenin’ny TOMPO tamiko nanao hoe:

¹⁸«Ry ilay taranak’olombelona, amiko ny Israelita dia toy ny tain-drendrika metaly: Izy rehetra, na volafotsy na varahina na vifotsy na vy na firaka, dia samy tonga tain-drendrika tao anaty lafaoro[115].

¹⁹Koa Izaho Tompo ANDRIANANAHARY dia milaza hoe: «Efa tonga tain-drendrika ianareo rehetra ka hatobiko eo afovoan’i Jerosalema.

²⁰Fa avangongo ao anaty lafaoro ny volafotsy sy varahina sy vy ary firaka na vifotsy, dia tsofina mafy ny afo ao ambany handrendrehana azy. Koa noho ny fahatezerako amam-pahavinirako dia toy izany no hanangonako anareo; ka havangongoko ao anaty lafaoro ianareo mba harendrika.

²¹Ao Jerosalema no hanangonako anareo handorako anareo amin’ny afom-pahatezerako izay handrendrika anareo tahaka ny metaly.

²²Ho tahaka ny volafotsy miempo ao anaty lafaoro no handrendrehana anareo ao Jerosalema. Amin’izay dia hoekenareo fa Izaho TOMPO no mampitosaka ny fahavinirako aminareo.»

²³Dia mbola nisy tenin’ny TOMPO tamiko nanao hoe:

²⁴«Ry ilay taranak’olombelona, ambarao amin’i Jerosalema fa sahala amin’ny tany tsy nilatsahan’ny ranonorana izy[116], ka ho tahaka ny tany tsy misy rano mihitsy amin’ny androm-pahatezerako.

²⁵Tahaka ny liona mierona mamiravira haza ireo mpitondra azy[117] ka mandripaka olona sy maka ny vola amam-pananan’ny hafa ka mahatonga vehivavy maro ho mpitondratena.

²⁶Mandika ny lalànako ireo mpisorony sady manimbazimba ny toeramasiko. Mampifangaro ny zava-masina sy ny tsy masina izy, tsy mampianatra ny olona hanavaka ny madio sy ny maloto, ary minia tsy mahalala ny andro sabatako. Izany no animbazimbany Ahy.

²⁷Lian-dra tahaka ny amboadia mamiravira haza ireo mpitondra ny vahoaka, ka mamono olona ho faty mba hangoronan-karena tsy an-drariny.

²⁸Ary ny mpaminaniny kosa manarona izany rehetra izany amin’ny lalotra fotaka[118]. Fahitana manodoka ary fanambaràna mamitaka no lazainy. Mihambo ho mampita hafatra avy amiko Tompo ANDRIANANAHARY izy nefa Izaho TOMPO tsy niteny taminy akory.

²⁹Manao herisetra ny olona eo amin’ny tany ka mangalatra sady mampahory ny mahantra sy ny fadiranovana, mitsentsitra tsy an-drariny ny vahiny[119].

³⁰Nokarohiko izay vonona hanangana ny manda na izay vonona hijanona eo amin’ny bangan’ny manda mba hifona eo anatrehako ho an’ny tany sy hisakana Ahy tsy handrava azy; nefa tsy nahita Aho.

³¹Koa natosako teo aminy ny fahavinirako ary naripako tamin’ny afom-pahatezerako izy sady nampizakaiko ny vokatry ny fitondrantenany. Teny hentitra avy amiko Tompo ANDRIANANAHARY izany.»