Read Dikateny Iombonana Eto Madagasikara Ezekiela 25 Bible Online

Ezekiela 25 - Dikateny Iombonana Eto Madagasikara bible

Ezekiela 25

¹Ary nisy tenin’ny TOMPO tamiko nanao hoe:

²«Ry ilay taranak’olombelona, mitodiha amin’ny Hamônita ary mijoroa ho mpaminany ny amin’ny hamelezana azy[135].

³Asaovy mihaino izy fa izao no teny lazain’ny Tompo ANDRIANANAHARY aminy: ‹Nihomehy ianareo fony nozimbazimbaina ny toerako masina ary nosimbana ny tanin’i Israely sady nentina ho babo ny olon’i Joda.

⁴Noho izany, havelako halain’ireo mpifindrafindra monina avy any atsinanana ny taninareo[136]: Hanorina toby eo amin’ny taninareo izy ka hamelatra ny lainy eo. Ireny no hihinana ny voankazo sy hisotro ny ronono izay anareo.

⁵Hatao tonga fiandrasana rameva i Rabà renivohitrareo, ary hanjary valan’ondry ny tany hamônita manontolo. Amin’izay dia hoekenareo fa Izaho no TOMPO.›

⁶«Eny, izao no lazain’ny Tompo ANDRIANANAHARY: ‹Nitehaka sy nitsinjaka ary nifaly tokoa ianareo tamin’ny loza nanjo an’i Israely. Izany no nanaovanareo tsinontsinona ny vahoakako.

⁷Koa haneho ny heriko hamelezana anareo Aho, ary hanolotra anareo amin’ny firenen-kafa izay handroba anareo tanteraka. Hofoanako tsy ho firenena intsony ianareo, tsy hanan-tany intsony fa haringako tanteraka. Amin’izay dia hoekenareo fa Izaho no TOMPO›. »

⁸Izao no lazain’ny Tompo ANDRIANANAHARY: «Nilaza ny Môabita[137] fa efa tonga tahaka ny firenena hafa rehetra izao i Joda.

⁹Koa hasaiko tafihina ireo tanàn-dehibe miaro ny fidirana any Môaba, hifanesy ho rava ireo tanàna tsara indrindra toa an’i Bety-Jesimôta sy i Bahala-Mehôna ary i Kiriataima[138].

¹⁰Ireo mpifindrafindra monina avy any atsinanana dia havelako haka an’i Môaba ankoatra izay nakany ny tanin’ireo Hamônita, ka tsy hahatsiarovana intsony ireo Hamônita any amin’ny firenen-kafa[139].

¹¹Hotanterahiko ny famaizana ny Môabita; amin’izay dia hoekeny fa Izaho no TOMPO.»

¹²Izao no lazain’ny Tompo ANDRIANANAHARY: «Nanao valifaty mahatsiravina tamin’ny vahoakan’i Joda ny Edômita, ary izany no mahameloka azy[140].

¹³Koa Izaho Tompo ANDRIANANAHARY dia manambara fa haneho ny heriko hamelezana an’i Edôma. Haringako ny olona sy ny biby fiompy amin’io tany io; ary hataoko lao izy, manomboka eo an-tanànan’i Temàna ka hatrany Dedàna[141], ka ho faty an’ady ny mponina ao aminy.

¹⁴Hankiniko amin’i Israely vahoakako ny famaizako an’ireo Edômita. Koa araka izay takin’ny fahatezerako amam-pahavinirako no hatao aminy mba hahatsapany ny ngidim-pamaizako. Teny hentitra avy amiko Tompo ANDRIANANAHARY izany.»

¹⁵Izao no lazain’ny Tompo ANDRIANANAHARY: «Valifaty no nafitsoky ny Filistinina, dia valifaty mahatsiravina vokatry ny fanaovana tsinontsinona ireo ankahalainy hatry ny ela[142] ka nahatonga azy handringana ireny.

¹⁶Koa Izaho Tompo ANDRIANANAHARY dia manambara aminy fa haneho ny heriko hamelezana azy. Haringako ny Keretita[143] ary horavako ny olon-kafa sisa izay namany mipetraka amin’iny moron-dranomasina iny.

¹⁷Famaizana mangotraka no famaliana mahatsiravina hamelezako azy; ka rehefa hampihariko aminy tokoa izany, dia hoekeny fa Izaho no TOMPO.»