Read Dikateny Iombonana Eto Madagasikara Hôsea 12 Bible Online

Hôsea 12 - Dikateny Iombonana Eto Madagasikara bible

Hôsea 12

¹Hodidinin’ny olon’i Efraîma lainga Aho ary mamely fitaka manodidina Ahy ny firenen’i Israely. I Joda kosa mbola miaraka amin’Andriamanitra sady mbola matoky an’Ilay Masina Indrindra.

²Mamatsy diloilo an’i Ejipta i Efraîma; ka rivotra no ivokisany amin’izany. Manao fifanekena amin’i Asiria izy dia manenji-drivotra avy atsinanana. Tontolo andro no ampitomboiny ny lainga sy ny herisetra.

³Manana ady amin’i Joda ny TOMPO. ka hanafay ny firenen’i Jakôba noho ny fitondrantenany ary hamaly azy araka ny ratsy nataony.

⁴Fony i Jakôba mbola tany an-kibon-dreniny no efa nisongona ny rahalahiny; ary rehefa lehilahy lehibe izy, dia nitolona tamin’Andriamanitra[54].

⁵Anjely no nitolomany ka nandresy azy. Nitomany i Jakôba sady nifona taminy. Tao Betela no nahitany an’Andriamanitra ka nitenenan’Andriamanitra taminy[55].

⁶Teo ny TOMPO Andriamanitr’izao rehetra izao, ny TOMPO araka ny anarana ahatsiarovana Azy,

⁷no niteny tamin’i Jakôba hoe: «Miverena amiko Andriamanitrao ianao! Tandrovy ny fitiavana sy ny rariny; ary Izaho Andriamanitrao no itokio hatrany.»

⁸Mizana mandainga tahaka ny an’ny Kanahanita[56] no hazoninao, ry Efraîma; ka tia manambaka ianao

⁹sady miteny hoe: «Efa nangoron-karena aho ka nahazo fananana be. Ary tsy misy hahitana heloka mandiso ahy amin’izay asa rehetra nisasarako.»

¹⁰Fa Izaho no TOMPO Andriamanitrao, hatry ny fony ianao tany Ejipta; ary hampitoetra anao an-day indray Aho, tahaka ny tamin’ny andro izay nihaonako taminao[57].

¹¹Niteny tamin’ireo mpaminany Aho fahizay ka nampitombo ny fahitana; ary tamin’ny alalan’ny mpaminany koa no nanaovako fanoharana.

¹²Raha olona mpanao ratsy tokoa ny mponin’i Gilehada ka lasa tsinontsinona, tao Gilgala[58] kosa omby mifanesy no natolotra hatao sorona, ka ny alitarany dia tonga korontam-bato eny am-bavasahan’ny tanimboly.

¹³Tany Mezôpôtamia ambony no nandosiran’i Jakôba; fa mba hahazoany vady[59], dia nanompo olona i Israely. Eny, lasa mpiandry ondry izy mba hahazoam-bady.

¹⁴Fa mpaminany kosa no nentin’ny TOMPO nampiakatra an’i Israely niala tany Ejipta, ary mpaminany no nataony mpiandry azy.

¹⁵Nampalahelo mafy an’Andriamanitra i Efraîma ka dia hailiky ny Tompony hianjady aminy ny vokatry ny ra nalatsany, ary hatsingeriny hanody azy ny fanevatevana nataony.