Read Dikateny Iombonana Eto Madagasikara Hôsea 14 Bible Online

Hôsea 14 - Dikateny Iombonana Eto Madagasikara bible

Hôsea 14

¹Hozakain’ny mponin’i Samaria[66] ny vokatry ny heloka nataony fa nikomy tamin’Andriamaniny izy. Ho faty an’ady ireo, ho voatorotoro ny zaza; ary hotatahina kibo ny vehivavy bevohòka.

²Ry Israelita ô, mba miverena amin’ny TOMPO Andriamanitrareo, fa ny helokareo no nahalavo anareo.

³Miverena amin’ny TOMPO ka milazà aminy hoe: «Avelao avokoa ny helokay; ary ho solon’ny vantotr’ombilahy fanolotray dia raiso tsara ireto teninay ireto:

⁴Tsy i Asiria no hahavonjy anay, tsy hitaingin-tsoavaly izahay; ary tsy amin’ny sampy asan-tananay intsony no hitenenanay hoe: ‹Ry Andriamanitray ô!›; fa Ianao no mamindrafo amin’ny kamboty.»

⁵Izaho TOMPO dia hanasitrana an’ilay Israely amin’ny fiodinany. Ho tia azy amim-po malalaka Aho; fa efa nialan’ny fahatezerako izy.

⁶Ho tahaka ny ando mahasoa azy Aho; dia hamony tahaka ny lisy izy ary hamàka tahaka ny hazon’i Libàno.

⁷Hisandrahaka rantsana izy, ka ho tsara tarehy toy ny hazo ôliva ary hamerovero toy ny alan’i Libàno.

⁸Ho avy indray i Israely, ka hitoetra eo ambany fiarovako. Hamboly vary indray izy, ka hiroborobo tahaka ny voaloboka sy halaza tahaka ny divay avy any Libàno.

⁹Hataon’i Efraîma inona intsony izay sampy? Izaho TOMPO no mamaly vavaka azy sady mitandrina azy. Izaho no toy ny kipreso, hazo maitso mandavan-taona[67]. Izaho no hahazoany vokatra.

¹⁰Iza no hendry hahafantatra izany tenin’i Hôsea izany[68], na lalin-tsaina hahalala ny heviny? Fa mahitsy ny sori-dalan’ny TOMPO; ka hizoran’ny olo-marina izany, saingy hahasolafaka ny mpikomy.