Read Dikateny Iombonana Eto Madagasikara Hôsea 6 Bible Online

Hôsea 6 - Dikateny Iombonana Eto Madagasikara bible

Hôsea 6

¹Hoy ianareo roa tonta hoe: «Ndeha hiverina amin’ny TOMPO isika; fa Izy no nahatonga ny ratrantsika, nefa Izy ihany no hahasitrana antsika. Izy no nikapoka antsika nefa Izy no hitsabo ny ferintsika.

²Rehefa afaka roa andro, dia hovelominy indray isika; amin’ny andro fahatelo dia hatsangany indray isika ho velona eo anatrehany.

³Amin’izay aoka hiaiky ny TOMPO isika; eny, aoka hiezaka hiaiky Azy isika! Azo antoka toy ny mazava atsinanana ny firotsahany hanao izany. Fa toy ny oram-baratra no hiaviany amintsika, dia toy ny oran-dohataona manamando tany.»

⁴Ny TOMPO kosa mamaly anareo hoe: «Inona no hataoko aminao, ry Efraîma? Inona no hataoko aminao, ry Joda? Fa ny fitiavanareo Ahy dia toy ny zavona maraina na tahaka ny ranon’ando izay levona vetivety!

⁵Koa ny hafatr’ireo mpaminany no ikapohako anareo; ny vavako no milaza fa entiko hovonoina ianareo. Ary ny didim-pitsarako ny aminareo dia hipoitra tahaka ny hazavan’ny andro.

⁶Fitiavana no sitrako fa tsy sorona[24]; ary ny fiekena Ahy ho Andriamanitra dia tiako noho ny sorona dorana manontolo.»

⁷Tao Adama[25] kosa ianareo no nandika ny fanekempihavanana tao ianareo no namadika Ahy.

⁸I Gilehada[26] dia tanànan’ny mpanao ratsy, izay mamela dian-dra amin’ny falehany.

⁹Tahaka ny jiolahy manotrika no ataon’ny andia-mpisorona ka amonoany olona ho faty eny an-dalana mankany Sekema[27]; zava-mahatsiravina afitsony!

¹⁰Zava-maharikoriko no hitako tao amin’ny fanjakan’i Israely. Ny fivarotan-tenan’i Efraîma[28] no ao ka mahaloto an’i Israely.

¹¹Ny aminao koa, ry Joda, dia efa voatendry ny fijinjana anao[29]. Rehefa Izaho TOMPO kosa hanarina indray ny vahoakako