Read Dikateny Iombonana Eto Madagasikara Jôela 1 Bible Online

Jôela 1 - Dikateny Iombonana Eto Madagasikara bible

Jôela 1

¹Izao no tenin’ny TOMPO tamin’i Jôela zanakalahin’i Petoela.

²Mba henoy izao, ry loholona; ary atongilano ny sofinareo, ry mponina rehetra eto Joda[1]. Efa nisy toy izao ve tamin’ny andronareo na tamin’ny andron’ny razanareo?

³Tantarao amin’ny zanakareo izao, dia hotantarainy amin’ireo zanany; ary ireto kosa hitantara izany amin’ny taranaka mandimby azy.

⁴Izay tsy lanim-panday, hanim-balala; izay tsy lanim-balala, hanim-boangory; ary izay tsy lanim-boangory, hanin-kijeja[2].

⁵Mifohaza ka mitomania, ry mamolava; midradradradrà ianareo rehetra, ry mpisotro divay: fa tsy hisy ny voaloboka, ka ho diso divay ny vavanareo.

⁶Fa misy andiam-bibikely miakatra mamely ny tanintsika; Tsy hita isa sady mahery ireo, ary mpandravarava sy mpandevona toy ny nifin’ny lion-dahy na toy ny vazan’ny liom-bavy.

⁷Nosimbany ny voaloboko ary nopotehiny ny aviaviko. Nokikisany sy nohodirany ireny mandra-pahafotsy ny rantsany.

⁸Midradradradrà ianareo, toy ny vehivavy tanora misaona noho ny amin’ny vady izay vao nampakatra azy.

⁹Tsy misy entina intsony ao an-tranon’ny TOMPO na ny fanatitra vokatry ny tany na ny fanatitra araraka. Noho izany, misaona ny mpisorona dia ireo mpanao fanompoam-pivavahana amin’ny TOMPO.

¹⁰Simba ny saha, misaona ny tany fambolena; satria levona ny vary, maina ny voaloboka ary malazo ny ôliva.

¹¹Malahelova ianareo mpiasa tany, midradradradrà ianareo mpamboly voaloboka; ny amin’ny vary sy ny ôrza, dia levona ny vokatry ny saha.

¹²Maina ny voaloboka, malazo ny aviavimbazaha; toraka izany koa ny ampongabendanitra sy ny palmie ary ny paoma, dia ny hazo rehetra any an-tsaha. Nihalefy ny fifaliana teo anivon’ny olombelona.

¹³Mitafia lamba fisaonana ary mitomania sy midradradradrà, ianareo mpisorona mpanao fanompoam-pivavahana eo amin’ny alitara. Avia ianareo hialina amin’alahelo, ry mpanao fanompoam-pivavahana amin’Andriamanitro: fa tsy misy entina intsony ao an-tranon’Andriamanitrareo na ny fanatitra vokatry ny tany na ny fanatitra araraka.

¹⁴Manokàna andro fifadian-kanina, miantsoa fivoriana masina; angony ny loholona sy ny mponina rehetra eto amin’ny tany ho ao an-tranon’ny TOMPO Andriamanitrareo, ka miantsoa vonjy amin’ny TOMPO.

¹⁵Indrisy efa antomotra ny andro, dia ny androm-pahatezeran’ny TOMPO[3] izay ho tahaka ny fandringanana avy amin’ilay Andriamanitra Tsitoha.

¹⁶Teo imasontsika teo no nanafoanana ny hanintsika; ary lavitry ny tranon’Andriamanitsika ny fifaliana amam-piravoravoantsika?

¹⁷Maina tao ambanin’ny bainga ny voa; foana ny sompitra, mirodana ny trano fitehirizana fa tsy misy intsony ny vary.

¹⁸Indrisy fa mitoreo ny biby! Mihoalahoala ny andian’omby, satria tsy misy ahitra ho azy. Eny, mihareraka hatramin’ny andian’ondry aza.

¹⁹TOMPO ô, mitaraina aminao aho fa levon’ny afo ny kijana any an-taniefitra; ary misy lelafo mandoro ny hazo rehetra any an-tsaha.

²⁰Na dia ny bibidia aza mitodika miandrandra Anao, satria ritra ny renirano ary levon’ny afo ny kijana any an-taniefitra.