Read Dikateny Iombonana Eto Madagasikara Hamôsa 1 Bible Online

Hamôsa 1 - Dikateny Iombonana Eto Madagasikara bible

Hamôsa 1

¹Tenin’i Hamôsa izay anankiray tamin’ireo mpiompy tao Tekôa. Roa taona talohan’ny horohorontany, dia fahitana no nahafantarany an’ireo teny manakiana ny fanjakan’i Israely ireo, fony mpanjaka tao Joda i Hozià ary mpanjaka tao Israely i Jerôbohama zanakalahin’i Jôasy[1].

²Hoy i Hamôsa hoe: Avy ao Tsiôna ny TOMPO no manerona ary avy ao Jerosalema Izy no manandra-peo. Dia malahelo ny saha fiandrasana biby fiompy ary maina ny tampon’i Karmela[2].

³Izao no lazain’ny TOMPO: «Fahotana mifanesy no vitan’ny mponin’i Damasy, fa indrindra ity anankiray ity: Novakivakîny tamin’ny hersa vy ny mponin’i Gilehada[3]. Noho izany, dia tsy hahemotro ny sazy momba azy:

⁴«Handefasako afo ny lapan’i Hazaela mpanjaka, ka ho levon’izany koa ny trano-fiarovan’i Bena-Hadada[4] mpanjaka.

⁵Hopotehiko ny hidim-bavahadin’i Damasy; haringako ny mponina ao an-dohasahan-keloka sy ilay mpitana tehim-panjakana ao an-dapam-pilibana; ary ny vahoakan’i Siria ho lasan-ko babo any Kira[5]. Izaho Tompo no miteny.»

⁶Izao no lazain’ny TOMPO: «Fahotana mifanesy no vitan’ny mponin’i Gazà[6], fa indrindra ity anankiray ity: nentiny ho babo avokoa ny iray tanàna manontolo mba hatolony ho an’ny Edômita. Noho izany, dia tsy hahemotro ny sazy momba azy:

⁷Handefasako afo ny tanànan’i Gazà ka ho levon’izany ireo lapany.

⁸Dia haringako ny mponina ao Asdôda sy ilay mpitana tehim-panjakana ao Askelôna; ary hahodiko hamely an’i Hekrôna ny tanako[7] ka ho faty izay sisa amin’ny Filistinina. Izaho Tompo ANDRIANANAHARY no miteny.»

⁹Izao no lazain’ny TOMPO: «Fahotana mifanesy no vitan’ny mponin’i Tiro, fa indrindra ity anankiray ity: Natolony ho babo ho an’ny Edômita avokoa ny iray tanàna manontolo, fa tsy notsarovany ny fanekem-pirahalahiana nataony tamin’i Israely[8]. Noho izany, dia tsy hahemotro ny sazy momba azy.

¹⁰Handefasako afo ny tanànan’i Tiro ka ho levon’izany ireo lapany[9].»

¹¹Izao no lazain’ny TOMPO: «Fahotana mifanesy no vitan’ny mponin’i Edôma[10], fa indrindra ity anankiray ity: Nenjehiny hotrobarana sabatra ny Israelita rahalahiny sady tsy nananany antra akory; tsy nisy fetra ny fahatezerany namiravira, ary nitahiry lolom-po mandrakariva izy. Noho izany, dia tsy hahemotro ny sazy momba azy:

¹²Handefasako afo ny tanànan’i Temàna ka ho levon’izany koa ireo lapa ao Bôtserà[11].»

¹³Izao no lazain’ny TOMPO: «Fahotana mifanesy no vitan’ny Hamônita[12], fa indrindra ity anankiray ity: Notatahany ny kibon’ireo bevohòka tao Gilehada mba hanitarana faritany. Noho izany, dia tsy hahemotro ny sazy momba azy:

¹⁴Handefasako afo ny tanànan’i Rabà ka ho levon’izany ireo lapany; sady hisy akoran’ady amin’ny andro iadiana ka hahery vaika toy ny tafio-drivotra ny fifamelezana.

¹⁵Ho lasan-ko babo ilay mpanjakany sy ireo manamboninahitra miaraka aminy[13]. Izaho Tompo no miteny.»