Read Dikateny Iombonana Eto Madagasikara Hamôsa 2 Bible Online

Hamôsa 2 - Dikateny Iombonana Eto Madagasikara bible

Hamôsa 2

¹Izao no lazain’ny TOMPO: «Fahotana mifanesy no vitan’ny mponin’i Môaba, fa indrindra ity anankiray ity: Nodorany ho sokay ny taolan’ilay mpanjakan’i Edôma[14]. Noho izany, dia tsy hahemotro ny sazy momba azy:

²Handefasako afo ny tanin’i Môaba ka ho levon’izany koa ireo lapa ao Kiriôta[15]; ho faty ao anatin’ny kotaba ny Môabita, ho faty ao anatin’ny akoran’ady sy ny feon-trompetra.

³Haringako ilay mpitsara ao aminy ary hovonoiko miaraka aminy koa ireo manamboninahiny rehetra[16]. Izaho Tompo no miteny.»

⁴Izao no lazain’ny TOMPO: «Fahotana mifanesy no vitan’ny mponin’i Joda, fa indrindra ireto: Nanao tsinontsinona ny fampianarako izy ary tsy nitandrina ny didiko sady nanaiky ho voafitaky ny andriamanitra sampy izay efa notompoin’ireo razany. Noho izany, dia tsy hahemotro ny sazy momba azy:

⁵Handefasako afo ny tanin’i Joda ka ho levon’izany koa ireo lapa ao Jerosalema[17].»

⁶Izao no lazain’ny TOMPO: «Fahotana mifanesy no vitan’ny mponin’i Israely, fa indrindra ireto: Namidiny ho andevo[18] ny olon-tsotra raiki-trosa mba hamerenana ny volany; ary namidiny ho andevo ny mahantra satria tsy nahaloa na ny vidin-kapa iray lomisy aza.

⁷Hitsahiny eo ambony vovo-tany ny lohan’ny osa, ary aviliviliny ny fitarainan’ny mpandefitra eo amin’ny fitsarana. Olona mianaka, dia mifandimby mandry amin’ny zatovovavy iray ihany mba hanevatevana ny anarako masina[19].

⁸Lamba nomen’ny mahantra ho antoka no itsilailaizany eny akaikin’ny alitara rehetra eny[20]; ary divay azo avy amin’ny sazy no sotroiny ao an-tempolin’ireo andriamaniny.

⁹Izaho anefa no nandringana ny Amôrita[21] teo anatrehany, dia olona ranjanana tahaka ny hazo sedera ary matanjaka tahaka ny hazo ôaka; eny, nopotehiko avokoa na ny fotony na ny voany.

¹⁰Izaho koa no nampiakatra anareo avy tany Ejipta sady nitari-dàlana anareo efapolo taona tany an-taniefitra mandra-pahazoanareo ny tanin’ny Amôrita.

¹¹Taoriana dia nisy natsangako ho mpaminany ny zanakalahinareo, ary nisy nantsoiko ho Nazirita[22] ny zatovonareo; ka mba tsy izany tokoa ve, ry taranak’i Israely? Teny hentitra avy amiko TOMPO izany.

¹²Kanjo nampisotroinareo divay ireo Nazirita; ary ny mpaminany noraranareo tsy hampita ny hafatr’Andriamanitra.

¹³Noho izany, dia tsy hahemotro ny sazy momba anareo. Indro hataoko mikonainaika[23] eo amin’izay misy anareo avy ianareo tahaka ny ikonainaihan’ny sarety vesaram-bary.

¹⁴Ka ny haingam-pandeha tsy hahita fierena, ny matanjaka tsy afaka hampiasa ny heriny, ary ny miaramila voafantina tsy hahavonjy ny tenany.

¹⁵Tsy hahajoro ny mpandefa zana-tsipîka, tsy ho afa-mitsoaka ireo faingan-tongotra, ary tsy hahavonjy ny ainy ny mpitaingin-tsoavaly.

¹⁶Amin’izany andro izany, na ny mahery fo indrindra amin’ireo miaramila voafantina aza dia hanary fiadiana ka handositra[24]. Teny hentitra avy amiko TOMPO izany.»