Read Dikateny Iombonana Eto Madagasikara Hamôsa 3 Bible Online

Hamôsa 3 - Dikateny Iombonana Eto Madagasikara bible

Hamôsa 3

¹Ry taranak’i Israely, dia ianareo ankohonana rehetra izay nampiakarin’ny TOMPO avy tany Ejipta, henoy izao teny nambarany momba anareo izao:

²«Amin’ny fianakaviana rehetra eto ambonin’ny tany, dia ianareo ihany no nofidiko sy nokarakaraiko; noho izany, dia hampamoahako anareo ny fahadisoana rehetra nataonareo.»

³Hiara-dalana ve ny olon-droa, raha tsy efa nifanaiky?

⁴Hanerona ao anaty ala ve ny liona, raha tsy mahita remby? Hanerongerona ao an-davany ve ny liona tanora, raha tsy misy zavatra azony?

⁵Voan’ny fandrika amin’ny tany ve ny vorona, raha tsy nisy sakafo nisarika azy? Mikatona ve ny fandrika-harato raha tsy mahazo zavatra?

⁶Tsofina ao an-tanàna ve ny trompetra, ka tsy hisahotaka ny vahoaka? Misy loza ve ao an-tanàna, raha tsy ny TOMPO no nanao azy?

⁷Satria tsy manao zavatra ny Tompo ANDRIANANAHARY, raha tsy efa mampahafantatra ny fikasany amin’ireo mpaminany mpanompony.

⁸Ny liona no nierona, ka iza no tsy hatahotra? Ny Tompo ANDRIANANAHARY no niteny, ka iza no tsy hampita ny hafatra ampitondrainy?

⁹Ataovy re eny an-tafon-tranon’ireo lapa ao Asdôda sy eny an-tafon-tranon’ireo lapa any Ejipta, ka lazao hoe: «Mivoria eny an-tendrombohitr’i Samaria[25] ianareo, ka jereo ny korontana marobe eo anivony sy ny famoretana mihatra ao anatiny.»

¹⁰Fa izao no teny hentitry ny TOMPO: «Tsy nahalala hanao asa marina ry zareo; zavatra vokatry ny herisetra sy ny fandrobana no angoniny ho ao an-dapany.»

¹¹Noho izany, ry Samaria, izao no lazain’ny Tompo ANDRIANANAHARY: «Hohodidinin’ny fahavalo ny taninao, harodany hiala aminao ny mànda-fiarovanao, ary horobainy ireo lapanao.»

¹²Izao no lazain’ny TOMPO: «Rehefa misy ondry azon’ny liona, dia tongotra roa na sombin-tsofina[26] no tsoahan’ny mpiandry ondry avy eo am-bavan’ny liona; toy izany ny amin’ireo Israelita izay mipetraka ao Samaria, eo an-joron’ny saofà na eo ambony fandriana malemilemy: Vitsivitsy ihany no hovonjena.»

¹³Henoinareo ka ambarao amin’ny taranak’i Jakôba: ny teny hentitry ny Tompo ANDRIANANAHARY, dia ilay Andriamanitr’izao rehetra izao:

¹⁴«Amin’ny andro hamaliako ny Israely noho ny helony, dia horavako ireo alitara ao Betela; hopotehiko ny tandroky ny alitara[27] isanisany, ka hianjerazera amin’ny tany.

¹⁵Hazerako ny trano ririnina sy trano fahavaratra[28], ary ho simba ny trano miravaka ivoara sady ho fongana ny trano miezinezina. Teny hentitry avy amiko TOMPO izany.»