Read Dikateny Iombonana Eto Madagasikara Hamôsa 5 Bible Online

Hamôsa 5 - Dikateny Iombonana Eto Madagasikara bible

Hamôsa 5

¹Ry taranak’i Israely, henoinareo izao teniko izao, dia hira fisaonana ventesiko momba anareo:

²Tahaka ny tovovavy maty i Israely, ka potraka tsy mahatsangana intsony; miampatra eo amin’ny taniny izy, fa tsy misy manarina.

³Satria izao no lazain’ny Tompo ANDRIANANAHARY ny amin’ny vahoakan’i Israely: Misy tanàna mamoaka miaramila arivo hiantafika, kanefa zato no sisa hiverina; Misy tanàna mamoaka miaramila zato hiantafika, kanefa folo no sisa hiverina[36].

⁴Izao no lazain’ny TOMPO amin’ny vahoakan’i Israely: «Tadiavo Aho, dia ho velona ianareo.

⁵Fa aza mitady Ahy any Betela, aza miditra ao Gilgala, ary aza mankany Beera-Seba; satria ho lasan-ko babo tokoa i Gilgala, ary i Betela dia ho tonga tsinontsinona[37].»

⁶Tadiavo ny TOMPO, dia ho velona ianareo. Fa raha tsy mitady Azy ianareo, ry taranak’i Jôsefa[38], dia hilatsaka aminareo tahaka ny afo Izy ka handevona an’i Betela, ary tsy hisy olona hahafaty ny afo.

⁷Ianareo no mamadika ny rariny ho zava-mahafaty ary mampitsingidina ny fahamarinana amin’ny tany.

⁸Fa ilay nanao ny kintana Kotokelimiadilaona[39] sy ny kintana Telonohorefy, manova ny haizim-pito ho maraina sy manamaizina ny andro ho alina, miantso ny rano any an-dranomasina sy manapariaka azy eny ambonin’ny tany, dia ny TOMPO no anarany.

⁹Izy no mampipoaka ny fandravana hamelezana ny mahery, ka iharan’ny fandravana tokoa ny tanàna mimanda.

¹⁰Halanareo ny olona mananatra eo amin’ny fitsarana ary maharikoriko anareo ny vavolombelona milaza ny marina.

¹¹Nohosihosenareo ny malahelo ka nangalanareo am-paham-bary ny vokatra avy aminy. Noho izany, dia tsy hitoetra amin’ny trano vato voapaika nataonareo ianareo, ary tsy hisotro ny divay avy amin’ny voaloboka tsara nambolenareo.

¹²Hoy koa ny Tompo hoe: «Fantatro fa marobe ireo helokareo ary mahatsiravina ireo fahotanareo; ianareo no mpandray tsolotra sy mpanenjika ny olo-marina, ka manodinkodina ny zon’ny mahantra eo amin’ny fitsarana,»

¹³Noho izany, dia mangina ny olon-kendry amin’izao fotoana izao satria fotoana ratsy izao.

¹⁴Ny tsara no tadiavo fa aza ny ratsy, mba ho velona ianareo; amin’izay ny TOMPO Andriamanitr’izao rehetra izao dia hiaraka aminareo araka ny lazainareo.

¹⁵Ankahalao ny ratsy, tiavo ny tsara, ary ampitoero ao amin’ny fitsarana indray ny rariny; Angamba ny TOMPO Andriamanitr’izao rehetra izao hamindra fo amin’izay sisa amin’ny taranak’i Jôsefa[40].

¹⁶Koa izao no lazain’ny TOMPO, ilay Andriamanitr’izao rehetra izao sady Tompoko: «Eny an-kalamanjana rehetra dia hisy tomanim-pisaonana; ary eny amin’ny arabe rehetra dia hisy hanao hoe: ‹Indrisy! Indrisy!› Ny mpamboly koa hantsoina hiaraka ory; ary ireo mpiantsa fahoriana hanao hiram-pisaonana.

¹⁷Any amin’ny tanimboaloboka rehetra dia hisy tomanim-pisaonana, satria handalo ao aminareo Aho. Izaho TOMPO no miteny.»

¹⁸Lozan’izay miandrandra ny androm-pamaizan’ny TOMPO! Fa ho inona moa aminareo io androm-pamaizan’ny TOMPO io? Ho andro maizim-panahiana izany fa tsy hamiratan-tsoa,

¹⁹toy ny amin’ny olona mandositra liona kanefa mifanehatra amin’ny orsa; na toy ny amin’ny olona tonga ao an-trano sy mitehina amin’ny rindrina, kanefa kaikerin’ny menarana.

²⁰Moa hamiratan-tsoa ve ny androm-pamaizan’ny TOMPO? Tsia, fa ho andro maizim-panahiana izany, ho andro maizina tsy misy mangirana mihitsy.

²¹«Hàlako, maharikoriko Ahy ny fety fivahiniananareo; ary tsy sitrako ny fivoriam-pivavahanareo.

²²Na dia anateranareo sorona dorana manontolo sy fanatitra hohanina aza Aho, dia tsy hankasitrahiko izany; ary tsy hojereko akory ny zanak’omby matavy aterinareo ho sorom-pihavanana[41].

²³Halaviro Ahy ny finaonaonan’ny hiranareo; tsy tiako hohenoina ny feon-dokanganareo.

²⁴Aoka ny rariny hikoriana toy ny rano ary ny fahamarinana ho tahaka ny renirano tsy mety ritra!

²⁵Ry taranak’i Israely, moa nanolotra sorona sy fanatitra ho Ahy ve ianareo nandritra ny efapolo taona tany an-taniefitra?

²⁶Ary nentinareo ve ny sarin’i Sikota, ilay sampy mpanjakanareo, sy ny sarin’i Kiona[42], ilay kintana andriamanitrareo, izay samy sary nataonareo ho anareo? Tsia!

²⁷Koa halefako ho babo any ambadika lavitr’i Damasy ianareo. Izaho TOMPO no miteny izany; ilay Andriamanitr’izao rehetra izao no anarako.»