Read Dikateny Iombonana Eto Madagasikara Jônà 1 Bible Online

Jônà 1 - Dikateny Iombonana Eto Madagasikara bible

Jônà 1

¹Indray andro dia nisy baikon’ny TOMPO tamin’i Jônà zanakalahin’i Amitahy[1] nanao hoe:

²— Mitsangàna ka mankanesa any Ninive[2], ilay tanàna lehibe. Torio ny amin’ny hamelezana azy, satria tafakatra eto anatrehako ny faharatsian’ny mponiny.

³Nefa niainga handositra ho any Tarsîsy hanalavitra ny TOMPO i Jônà. Nankany Jafao[3] izy ka nahita sambo vonona ho any Tarsîsy. Naloany ny saran-dalana, dia niondrana niaraka tamin’ny tantsambo rehetra izy ary nihevitra ny hanalavitra ny TOMPO.

⁴Fa nampifofofofo rivo-mahery teny amin’ny ranomasina ny TOMPO; dia nanonja mafy ny ranomasina ka nila ho vakin’ny tafiotra ny sambo.

⁵Natahotra mafy ny matilò ka samy niantso vonjy tamin’ny andriamaniny avy. Dia natsipy tany an-dranomasina ny entana mba hanamaivana ny sambo. Tamin’izay kosa i Jônà efa nidina nandry tao anaty sambo iray ka resin-tory.

⁶Dia nanatona azy ny kapitenin-tsambo ary nanontany azy hoe: — Fa manao inona eto ianao? Toa matory! Mitsangàna, ka mba antsoy koa ny Andriamanitrao, fa angamba hieritreritra antsika Izy ka tsy hamela antsika ho faty.

⁷— ’Ndeha isika hanao antsapaka hahitana izay tompon’andraikitra mahatonga izao loza izao amintsika. Natao ny antsapaka ka nianjera tamin’i Jônà.

⁸Hoy ireo taminy: — Tompon’andraikitra amin’izao loza manjo antsika izao ianao, koa lazao anay izay mahatonga anao eto. Avy taiza ianao? Aiza no tany fiavianao? Olom-pirenena avy aiza ianao?

⁹Hoy ny navalin’i Jônà ireo: — Hebreo aho, ary ny TOMPO Andriamanitry ny lanitra Izay nanao ny ranomasina sy ny tany no ivavahako.

¹⁰Tamin’izay dia raiki-tahotra ireo matilò raha nitantarany fa hay nandositra ny Tompo izy. Ka hoy ireo taminy: — Fa naninona ianao no nanao izany?

¹¹Hataonay ahoana àry ianao mba hampitony ny ranomasina aminay? Vao mainka nihanahery hatrany ny ranomasina.

¹²Hoy i Jônà tamin’ny matilò: — Batao aho ka atsipazo any anaty ranomasina dia hitony aminareo io. Fantatro fa noho ny fahadisoako no mahatonga izao tafio-drivotra mahery izao aminareo.

¹³Nivoy mafy ireo matilò hahatrarana ny moron-dranomasina nefa tsy nahafa-piry, satria vao mainka nitroatra ny ranomasina.

¹⁴Dia nitaraina tamin’ny TOMPO ireo ka nanao hoe: — TOMPO ô, aza avelanao ho faty noho ny amin’ity lehilahy ity izahay. Aza atambesatra aminay ny fahafatesan’ny anankiray izay tsy nanan-tsiny. Fa Ianao ry TOMPO no manao araka izay sitrakao.

¹⁵Dia nobatain’ireo i Jônà ka natsipiny tany anaty ranomasina, ary nijanona ny fisafoaky ny tafio-drivotra.

¹⁶Natahotra ny TOMPO noho izany ireo matilò ka nanolotra sorona sady nivoady taminy.