Read Dikateny Iombonana Eto Madagasikara Jônà 2 Bible Online

Jônà 2 - Dikateny Iombonana Eto Madagasikara bible

Jônà 2

¹Nandefa trondro lehibe hitelina an’i Jônà ny TOMPO. Koa nitoetra telo andro sy telo alina[4] tao an-kibon’ilay trondro i Jônà.

²Tao izy no nanandratra izao vavaka izao tamin’ny TOMPO Andriamaniny

³ka nanao hoe: Tao an-katerena aho, TOMPO ô, no velon-taraina taminao, ka namaly ahy Ianao; tao anatin’ny toeran’ny maty no niantsoako vonjy taminao, ka nihaino ahy Ianao.

⁴Natsipinao tao amin’ny lalina aho, dia tao an-kibon’ny ranomasina. Nanafotra ahy ny riaka; natosakao tamiko avokoa ny alon-dranonao aman’onjanao.

⁵Dia hoy aho anakampo hoe: «Indro aho voaroaka tsy ho eo imasonao, Tompo ô, kanefa mbola manatrika ny tempolinao masina ihany.»

⁶Efa mby hatendako ny rano; nanafotra ahy ny ranomasina, ary ny ahidrano nisaringotra amin’ny lohako.

⁷Tany amin’ny fanambanin’ny tendrombohitra no nahatafalatsaka ahy, ka nihidy tamiko mandrakizay ny vavahadin’ny sehatry ny maty. Nefa Ianao, ry TOMPO Andriamanitro ô, nampiakatra ahy velona avy tao an-davaka.

⁸Raha iny efa ho faty iny aho, dia nahatsiaro Anao, TOMPO ô, ary ny vavaka nataoko taminao dia tonga tao an-tempolinao masina.

⁹Fa izay mivavaka amin’ny andriamani-tsiizy dia aoka hiala amin’ireny sampy ifikirany ireny.

¹⁰Fa izaho kosa amin-kira fiderana no hanolorako sorona aminao, ary hanefako ny voady izay nataoko. Anao, TOMPO ô, ny famonjena!

¹¹Ary notenenin’ny TOMPO ilay trondro mba hamoaka an’i Jônà, dia naloany ho eny amin’ny tany maina izy.