Read Dikateny Iombonana Eto Madagasikara Nomerỳ 11 Bible Online

Nomerỳ 11 - Dikateny Iombonana Eto Madagasikara bible

Nomerỳ 11

¹Indray andro dia nanao fitarainana tamin’ny TOMPO ireo Israelita. Rehefa nahare izany ny TOMPO, dia tezitra mafy ary nandefa ny afony ka nandoro ny vahoaka sy nandevona ny sisin’ny toby.

²Dia nitalaho sy nikiakiaka tamin’i Mosesy ny vahoaka; koa nifona tamin’ny TOMPO i Mosesy, dia maty ny afo.

³Ny anaran’izany toerana izany dia natao hoe Tabiherà na Fandoroana, satria teo ny Israelita no voadoron’ny afon’ny TOMPO.

⁴Nisy vahiny maro samy hafa fiaviana tafaharo tamin’ny Israelita izay liana te hihinan-kena aoka izany; ary ny Israelita koa dia nanomboka nitaraina indray ka nitomany hoe: «Iza no hanome hena hohaninay?

⁵Tsaroanay ny trondro nohanina maimaimpoana tany Ejipta, ny voatango, ny voanketsihetsy, ny tongolobe, ny tongolo isan-karazany.

⁶Izao anefa maina ny tenda; tsy misy na inona na inona mba hitanay afa-tsy ny mana ihany!»

⁷Ny mana dia mitovy amin’ny voan-drafy sady miloko mavofotsy tahaka ny bideliôma[38].

⁸Amin’ny alina no nilatsaka teo amin’ny toby miaraka amin’ando izy[39]. Amin’ny maraina kosa dia miparitaka manangona azy ny olona; totoina amin’ny vatobe fikosehana na amin’ny laona izany, dia ahandroina amin’ny vilany na atao mofo. Mitovy amin’ny an’ny mofomamy misy menaka ny tsirony.

¹⁰Ren’i Mosesy fa samy nitomany isam-pianakaviany teo am-baravaran’ny lainy avy ny vahoaka. Nirehitra aoka izany ny fahatezeran’ny TOMPO. Ary nalahelo mafy i Mosesy

¹¹ka niteny tamin’ny TOMPO hoe: — Nahoana izaho mpanomponao no ampahorianao toy izao? ary nahoana no tsy anehoanao hatsarampo aho fa ampitondrainao enta-mavesatra amin’ny fitondrana ity firenena manontolo ity?

¹²Moa ve izaho no torontoronina an’ireo vahoaka rehetra ireo! Sa izaho ve no niteraka azy no ilazanao hoe: «Trotroy eo an-tratranao toy ny fitrotron’ny mpitaiza zaza izy, mandra-pahatonga azy any amin’ny tany izay nianianako tamin’ny razany fa homena azy».

¹³Aiza no hahitako hena homena ireo vahoaka rehetra ireo izay mitomany amiko hoe: «Omeo hena izahay hohaninay»?

¹⁴Tsy zakako samirery ireo vahoaka rehetra ireo fa mavesatra loatra amiko.

¹⁵Raha toy izany no hanaovanao ahy, dia vonoy mihitsy aho ho faty. Izany ahay no hanehoanao hatsarampo amiko; fa aza avela hahita ny fahoriako intsony aho.

¹⁶Dia hoy ny TOMPO tamin’i Mosesy: — Anangòny fitopolo lahy amin’ny loholon’i Israely aho, dia izay fantatrao fa loholona sy tompon’andraikitra amin’ny vahoaka. Ento miaraka aminao ao amin’ny Tranolay fihaonana izy.

¹⁷Fa hidina eo Aho ka hiteny aminao; ary haka amin’ny fanahy izay nomeko anao Aho ka hametraka izany amin’izy ireo mba hiarahany mitondra aminao ity firenena ity; koa tsy ianao irery intsony no hitondra azy.

¹⁸Ny amin’ny vahoaka kosa dia izao no holazainao azy: «Diovy ny tenanareo ho amin’ny rahampitso, fa hahazo hena hohanina ianareo, satria ny TOMPO efa nandre ny fitarainanareo hoe: ‹Iza no hanome hena hohaninay? Fa sambatra izahay tany Ejipta›. Homen’ny TOMPO hena ianareo, ka hihinana tokoa ianareo.

¹⁹Tsy andro iray na roa na koa andro dimy na folo na roapolo aza no hihinananareo izany,

²⁰fa iray volana maninjitra manda-pahafeno hatreny am-bavoronareo ka hampaharikoriko anareo. Ho sazinareo izany noho ny nandavanareo ny TOMPO Izay eo aminareo sy ny nitomanianareo teo anatrehany hoe: ‹Nahoana re no niala tany Ejipta izahay?› »

²¹Dia hoy i Mosesy hoe: — Ireo vahoaka manodidina ahy ireo dia ahitana miaramila mpandeha an-tongotra misy andiany eninjato[40], ka hoy Ianao hoe: «Homeko hena izy ka hihinana izany iray volana maninjitra!»

²²Fa na dia ny ondry aman’osy ary ny ombiny rehetra aza no hovonoina ho azy ireo, dia tsy ho ampy azy izany. Na ny trondro rehetra any an-dranomasina aza no haratoina ho azy ireo, dia mbola tsy ho ampy azy koa.

²³Fa hoy ny TOMPO tamin’i Mosesy: — Ary ny heriko, moa mba misy fetrany va? Ho hitanao izao ankehitriny izao na ho tanteraka aminao ny teniko na tsia.

²⁴Nisinda kely i Mosesy ka nilaza ny tenin’ny TOMPO tamin’ny vahoaka. Nangoniny avy eo ireo fitopolo lahy tamin’ny loholom-bahoaka, dia napetrany nanodidina ny Tranolay fihaonana.

²⁵Ary nidina teo amin’ny rahona ny TOMPO[41] ka niresaka tamin’i Mosesy. Nangalany ny fanahy tamin’i Mosesy ka nanomezany ho an’ny loholona fitopolo lahy. Ary raha vao nipetraka tamin’izy ireo ny fanahy, dia nanomboka naminany izy ireo, nefa tsy notohizany izany.

²⁶Fa nisy olona anankiroa nijanona tao an-toby, i Eldada no anaran’ny iray ary i Medada kosa ny iray; anisan’ny loholona fitopolo lahy izy ireo, nefa tsy mba lasa nankany amin’ny Tranolay. Nahazo ny fanahy koa izy ireo ary dia naminany tao an-toby.

²⁷Nihazakazaka nampandre an’i Mosesy ny tovolahy iray ka nanao hoe: — Maminany ao an-toby i Eldada sy i Medada.

²⁸Dia loa-bolana i Josoa, zanakalahin’i Nona sady mpanompon’i Mosesy hatramin’ny fahatanorany, ka nanao hoe: — Ry Mosesy tompoko, mba rarao re izy roa lahy.

²⁹Fa hoy i Mosesy taminy: — Moa mialona azy noho ny amiko ve ianao? Enga anie homen’ny TOMPO ny Fanahiny avokoa ny vahoakany rehetra ka ho tonga mpaminany!

³⁰Dia niverina nankao an-toby indray i Mosesy sy ireto loholona.

³¹Fa ny TOMPO nampitsoka rivotra mifofofofo avy any an-dranomasina izay nitondra papelika ka nampihahaka ireny teo amin’ny toby. Feno azy avokoa ny manodidina ny toby tokony ho lalana indray andro ary tokony ho iray metatra miala amin’ny tany ny hateviny.

³²Dia nitsangana tontolo andro sy tontolo alina ary koa ny ampitso tontolo ny vahoaka mba hanangona papelika; ary izay nahangona kely indrindra no nanana aman-taonina. Dia nahahiny ho maina manodidina ny toby ireny.

³³Fa raha mbola tsy voatsako tao am-bavany akory ny hena, dia nirehi-pahatezerana tamin’ny vahoaka ny TOMPO, ka namely azy tamin’ny areti-mandringana.

³⁴Dia natao hoe Kibrôty-Taavà na hoe Fasan’ny Fahalian-kanina ny anaran’izany toerana izany, satria teo no nandevenana ireo olona lian-kena.

³⁵Dia niala tao Kibrôty-Taavà ny Israelita ka nankany Hatserôta ary nitoby tao.