Read Dikateny Iombonana Eto Madagasikara Nomerỳ 13 Bible Online

Nomerỳ 13 - Dikateny Iombonana Eto Madagasikara bible

Nomerỳ 13

¹Niteny tamin’i Mosesy ny TOMPO ka nanao hoe:

²— Mandefasa lehilahy hisafo ny tany Kanahàna izay omeko ny Israelita. Lehilahy iray isam-pokony avy no halefanareo, ka izy rehetra dia hotsongaina amin’ireo mpiandraikitra azy.

³Dia nalefan’i Mosesy avy eo an-taniefitr’i Paràna araka ny baikon’ny TOMPO ireo. Samy lohandohan’ny Israelita avokoa izy rehetra.

⁴Toy izao avy ny anarany: I Samoa zanakalahin’i Zakora, avy amin’ny fokon’i Reobena;

⁵I Safata zanakalahin’i Hôrỳ, avy amin’ny fokon’i Simehôna;

⁶I Kaleba zanakalahin’i Jefonè, avy amin’ny fokon’i Joda;

⁷I Jigàla zanakalahin’i Jôsefa, avy amin’ny fokon’i Jisakara;

⁸I Hôsea zanakalahin’i Nona, avy amin’ny fokon’i Efraîma;

⁹I Paltỳ zanakalahin’i Rafò, avy amin’ny fokon’i Benjamîna;

¹⁰I Gadiela zanakalahin’i Sôdỳ, avy amin’ny fokon’i Zebolòna;

¹¹I Gadỳ zanakalahin’i Sosỳ, avy amin’ny fokon’i Manase zanak’i Jôsefa;

¹²I Hamiela zanakalahin’i Gemalỳ, avy amin’ny fokon’i Dana;

¹³I Setora zanakalahin’i Mikaela, avy amin’ny fokon’i Asera;

¹⁴I Nahabỳ zanakalahin’i Vôtsỳ, avy amin’ny fokon’i Naftalỳ;

¹⁵I Geoela zanakalahin’i Makỳ, avy amin’ny fokon’i Gada.

¹⁶Ireo no anaran’ny lehilahy nalefan’i Mosesy hisafo ny tany Kanahàna. Nataon’i Mosesy hoe Josoa i Hôsea zanakalahin’i Nona[46].

¹⁷Nalefan’i Mosesy hisafo ny tany Kanahàna izy ireo ka nataony hoe: — Miakara avy any atsimo, dia mianiha ny tendrombohitra

¹⁸hahitanareo ny toetry ny tany sy ny mponina ao na mahery izy na malemy, ary koa na vitsy izy na maro.

¹⁹Jereo ny tany onenan’ireo vahoaka ireo na tsara na ratsy ary ny tanàna ipetrahany na mimanda na tobin-day.

²⁰Jereo ny tany raha lonaka na ngazana, na misy hazo maniry na tsia. Koa mandehana ary mahereza, dia mitondrà amin’ny vokatry ny tany. Fahamasahan’ny voaloboka rahateo tamin’izay.

²¹Dia niakatra izy ireo ka nisafo ny tany nanomboka teo amin’ny taniefitr’i Tsina ka hatrany Rehôba akaikin’i Lebô-Hamata.

²²Niakatra avy any atsimo izy ireo ka tonga tao Hebrôna izay nonenan’ny tarik’i Ahimàna sy i Sesay ary i Talmay, samy taranaky ny Hanakita. I Hebrôna dia niorina fito taona talohan’i Tsôhàna[47] any Ejipta.

²³Nankany amin’ny Lohasahan’i Eskôla ireo mpisafo tany ka nanapaka tahom-boaloboka misy sampahony[48], ary nolanjain’olon-droa tamin’ny hazo niaraka tamin’ny ampongabendanitra sy ny aviavy.

²⁴Dia nomena anarana hoe Lohasahan’i Eskôla na Lohasahan-tsampaho izany toerana izany, noho ny sampahom-boaloboka izay notapahin’ny Israelita teo.

²⁵Nony afaka efapolo andro, dia niverina avy nisafo ny tany ireo iraka.

²⁶Nankeo amin’i Mosesy sy i Aharôna ary ny Fiangonan’ny Israelita rehetra tao an-taniefitr’i Paràna any Kadesy[49] izy ireo, ka nanao tatitra tamin’ny besinimaro ary nampiseho azy ny vokatry ny tany.

²⁷Izao no notantarain’ireo mpisafo tamin’i Mosesy: — Nankany amin’ny tany izay nanirahanao anay izahay, ka hitanay fa tany tondra-dronono sy tantely tokoa ilay izy[50]. Itony no vokatra avy tany.

²⁸Saingy ny mponina ao aminy kosa dia mahery, ary ny tanàna dia mimanda sady lehibe. Hitanay tao koa aza ny taranaky ny Hanakita.

²⁹Ny Hamalekita no monina amin’ny faritra atsimo; ny Hetita sy ny Hivita ary ny Jebosita sy ny Amôrita no any an-tendrombohitra, fa ny Kanahanîta kosa no mipetraka amoron-dranomasina Mediteranea sy amoron’i Jôrdàna.

³⁰Nampanginin’i Kaleba ny vahoaka izay nimonomonona tamin’i Mosesy ka nataony hoe: — Aoka hiakarantsika ny tany ka halaintsika fa haharesy azy tokoa isika.

³¹Ireo olona niara-niakatra tamin’i Kaleba kosa nanao hoe: — Tsy afaka manafika ireo olona ireo isika fa mahery lavitra noho isika izy.

³²Dia nanao izay haharatsy laza ny tany izay nosafoiny tamin’ny Israelita izy ireo ka niteny hoe: — Ny tany izay nosafoinay dia tany mamono ny olona tonga monina ao[51], ary ny olona izay hitanay tao dia ranjanana avokoa.

³³Hitanay tao hatramin’ireo olona goavambe[52] taranak’i Hanàka aza; tahaka ny valala izahay miohatra aminy, ary dia toy izany koa no fijeriny anay.